The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​បាត់​ផ្ទះ​នៅ​បឹងកក់​មួយ​ក្រុម​ជួប​អភិបាល​ក្រុង​ជា​ថ្មី

អ្នក​បាត់​ផ្ទះ​នៅ​បឹងកក់​មួយ​ក្រុម​ជួប​អភិបាល​ក្រុង​ជា​ថ្មី

អ្នក​បាត់​ផ្ទះ​នៅ​បឹងកក់​មួយ​ក្រុម​ជួប​អភិបាល​ក្រុង​ជា​ថ្មី

130709_06b
នគរបាលរាជធានីចាប់អ្នកភូមិបឹងកក់ដែលតវ៉ាកន្លងមក ហេង ជីវ័ន

ភ្នំពេញៈ តំណាង​ពលរដ្ឋ​ចំនួន ៤៨​គ្រួសារ​នៅ​បឹងកក់ ដែល​ទាមទារ​ឲ្យ​អាជ្ញាធរ​ដាក់​បញ្ចូល​ពួក​គាត់​ទៅ​ក្នុង​ដី​ទំហំ​១២,៤៤ ហិកតា​បាន​និយាយ​ថា កិច្ច​ពិភាក្សា​រក​ដំណោះស្រាយ​ដីធ្លី ជាមួយ​អាជ្ញាធរ​រាជធានី កាល​ពី​ម្សិលមិញ បាន​បោះ​ជំហាន​មួយ​កម្រិត​បន្ទាប់​ពី​ក្រុម​អ្នក​ភូមិ​បាន​ឯកភាព​ធ្វើ​ការ​ជ្រើស​រើស​តំណាង​របស់​ខ្លួន​នៅ​តាម​ភូមិ​នីមួយៗ។

លោក ចាន់ ពុទ្ធិសាក់ តំណាង​ពលរដ្ឋ​ដែល​នៅ​មិន​ទាន់​ទទួល​បាន​ដំណោះស្រាយ បាន​និយាយ​ថា នៅ​ក្នុង​ជំនួប​ពិភាក្សា​កាល​ពី​រសៀល​ថ្ងៃ​ម្សិលមិញ លោក​ប៉ា សុជាតិវង្ស​អភិបាល​រាជធានី​បាន​បង្ហាញ​ពី​ការ​ចាប់​ផ្ដើម​នៃ​ការ​ដោះស្រាយ​ទំនាស់​ដី​ធ្លី​នៅ​បឹងកក់​ដែល​ធ្វើ​ឲ្យ​ក្រុម​អ្នក​ភូមិ​មាន​ទំនុក​ចិត្ត​ដោយ​រំពឹង​ថា នឹង​ទទួល​បាន​ដំណោះស្រាយ​ពិត​ប្រាកដ។

លោក​ថ្លែង​ថា​៖«​ថ្វី​បើ​លក្ខខណ្ឌ​ខ្លះ​ដាក់​គំនាប​មិន​ឲ្យ​ដើរ​ចេញ​តវ៉ា​ក៏​ដោយ​ប៉ុន្តែ​បាន​ផ្តល់​ទំនុក​ចិត្ត​ក្នុង​ការ​ដោះស្រាយ​ដែល​វា​ជា​បំណង​ប្រាថ្នា​របស់​យើង​ខ្ញុំ​ជា​យូរ​មក​ហើយ»។

លោក​បន្ត​ថា កិច្ច​ពិភាក្សា​បាន​ឈាន​ដល់​ចំណុច​ឯកភាព​គ្នា​មួយ​ក្នុង​ការ​ជ្រើសរើស តំណាង​តាម​ភូមិ​ដែល​តំណាង​ទាំង​នោះ គឺជា​អ្នក​ដែល​រងគ្រោះ​និង​មិន​ទាន់​ទទួល​បាន​ដំណោះស្រាយ​នៅ​ឡើយ។​តំណាង​ទាំង​នោះ នឹង​ត្រូវ​បាន​អនុញ្ញាត​ឲ្យ​ចូល​រួម​នៅ​ក្នុង​ការ​ឃ្លាំ​មើល​គ្រប់​នីតិវិធី នៃ​ដំណើរ​ការ​ចុះ​អង្កេត​និង​ដោះស្រាយ​ទំនាស់​តាម​គ្រួសារ​នីមួយៗ​ដើម្បី​ឲ្យ​ប្រាកដ​ថា មាន​តម្លាភាព​ឬ​អត់?

ដោយ​ឡែក​ប្រជា​ពលរដ្ឋ​ក្រីក្រ នៅ​បុរីកីឡា​បាន​និយាយ​ថា អាជ្ញាធរ​រាជធានី​មក​ទល់​ពេល​នេះ​នៅ​តែ​មិន​មាន​ភាព​ប្រាកដ​ប្រជា ចំពោះ​ការ​ផ្ដល់​ដំណោះ​ស្រាយ​ណា​មួយ​ដល់​ពួក​គាត់​ឡើយ។

អ្នក​ស្រី​ឆាយ គឹមហ៊ន តំណាង​ពលរដ្ឋ​បុរីកីឡា បាន​និយាយ​ថា កាល​ពី​ព្រឹក​ម្សិលមិញ ពួក​គាត់​បាន​ទៅ​ស្នើ​ឲ្យ​អាជ្ញាធរ​រាជធានី​ពន្លឿន​ការ​ដោះស្រាយ​បញ្ហា​លំនៅឋាន និង​ស្បៀង​អាហារ​ដល់​ពួក​គាត់​ឲ្យ​បាន​មុន​ថ្ងៃ​បោះឆ្នោត​។ ទោះ​ជា​បែប​ណា​សំណើ​របស់​ពួក​គាត់​មិន​ទទួល​បាន​ការ​ឆ្លើយ​តប​ជា​វិជ្ជមាន​ទេ។ អ្នក​ស្រី​បាន​បន្ត​ថា ក្នុង​ជំនួប​កាល​ពី​ព្រឹក​ម្សិលមិញ លោក កើត ឆែ នាយក​រដ្ឋបាល​សាលា​រាជធានី​នៅ​តែ​មិន​ផ្ដល់​កាល​បរិច្ឆេទ​ជាក់​លាក់​ណា​មួយ​សម្រាប់​ការ​ដោះស្រាយ​បញ្ហា​លំនៅឋាន​និង​ស្បៀង​អាហារ​ដល់​ពួក​អ្នក​ស្រី​នោះ​ទេ ក្រៅ​ពី​សុំ​ឲ្យ​ពួក​អ្នក​ស្រី​រង់ចាំ​ដោយ​ស្ងៀម​ស្ងាត់​មួយ​រយៈ​ទៀត​។

អ្នក​ស្រី​ថ្លែង​ថា៖​«បច្ចុប្បន្ន យើង​កំពុង​តែ​ប្រឈម​មុខ​ខ្លាំង​បំផុត​ចំពោះ​ការ​ខ្វះ​ខាត​ទាំង​ទី​ជម្រក និង​ស្បៀង​អាហារ ដូច្នេះ​យើង​មិន​ចង់​បាន​ការ​សន្យា​ដោយ​គ្មាន​ដំណោះស្រាយ​ដដែលៗ បែប​នេះ​ទេ​។ យ៉ាង​ហោច​ណាស់​អាជ្ញាធរ​គួរ​តែ​ដោះស្រាយ​ស្បៀង​អាហារ និង​តង់​កៅស៊ូ​ឲ្យ​យើង​ខ្ញុំ​ជា​មុន​សិន​ដែរ មិន​គួរ​អត់​ទាំង​អស់​បែប​នេះ​ទេ»។

លោក​ឡុង ឌីម៉ង់ អ្នក​នាំ​ពាក្យ​សាលា​រាជធានី មិន​អាច​ទាក់​ទង​សុំ​ការ​អធិប្បាយ​បាន​ទេ កាល​ពី​ម្សិលមិញ៕

អត្ថបទគួរចាប់អារម្មណ៍