The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​បឹងកក់​ដាក់​ញត្តិ​ជា​ថ្មី​ជូន​លោក​នាយក​រដ្ឋ​មន្ត្រី

អ្នក​បឹងកក់​ដាក់​ញត្តិ​ជា​ថ្មី​ជូន​លោក​នាយក​រដ្ឋ​មន្ត្រី

អ្នក​បឹងកក់​ដាក់​ញត្តិ​ជា​ថ្មី​ជូន​លោក​នាយក​រដ្ឋ​មន្ត្រី

121204_05
អ្នកភូមិបឹងកក់និងថ្មគោលអង្គុយនៅមុខវិមានសន្តិភាពកាលពីម្សិលមិញ ហេង ជីវ័ន

ភ្នំពេញៈ ប្រជា​ពលរដ្ឋ​សហគមន៍​បឹងកក់ និង​សហគមន៍​ថ្ម​គោល ប្រមាណ ៥០ នាក់ បាន​ប្រមូល​ផ្ដុំ​គ្នា នៅ​មុខ​វិមាន​សន្តិភាព​កាល​ពី​ម្សិលមិញ​ដើម្បី​ដាក់​ញតិ្ត​សុំ​កិច្ច​អន្តរាគមន៍ ដោះ​ស្រាយ​បញ្ហា​វិវាទ​ដី​ធ្លីដ៏​រ៉ាំរ៉ៃ​ជា​ថ្មី​ទៀត របស់​ពួក​គាត់ ពី​លោក​នាយក​រដ្ឋ​មន្ត្រី​ហ៊ុន សែន។

អ្នក​ស្រី ហេង មុំ តំណាង​ពលរដ្ឋ​រង​គ្រោះ​ពី​សហគមន៍​បឹងកក់ ​និយាយ​ថា​ ការ​ដែល​ពួក​គាត់​មក​ជួប​ប្រជុំ​ដាក់​ញតិ្ត​ស្នើ​សុំ​កិច្ច​អន្តរាគមន៍​ពី ​លោក​នាយក​រដ្ឋ​សាជាថ្មី​នេះ ព្រោះ​កាល​ពី​មួយ​សប្តាហ៍​មុន​លោក​នាយក​រដ្ឋ​មន្ត្រី បាន​ថ្លែង​ជា​សាធារណៈ​នៅ​ក្នុង​ពិធី​សម្ពោធ​ការ​បញ្ចុះ​បឋម​សិលា​ស្ពាន​ អាកាស​ស្ទឹង​មាន​ជ័យ​ថា លោក​នឹង​ធ្វើ​ការ​ដោះស្រាយ​រាល់​បញ្ហា​វិវាទ​ដី​ធ្លីទាំង​អស់ ជូន​ប្រជា​ពលរដ្ឋ បើ​ប្រជា​ពលរដ្ឋ​មក​ពឹង​លោក​ឲ្យ​ជួយ។ អ្នក​ស្រី​ថ្លែង​ថា៖«យើង​ខ្ញុំ​សុំ​ឲ្យ​សម្ដេច​តេជោ​ហ៊ុន សែន និង​លោក​ជំទាវ​ ប៊ុន ​រ៉ានី ជួយ​រក​យុត្តិធម៌​ឲ្យ​យើង​ខ្ញុំ ព្រោះ​អាជ្ញាធរ​មូលដ្ឋាន​បាន​បំផ្លាញ​ផ្ទះ​សម្បែង​ និង​ទ្រព្យ​សម្បត្តិ​យើង​ខ្ញុំ និង​បាន​កាត់​ពួក​យើង​ខ្ញុំ​ ៥៧​ គ្រួសារ ក្នុង​ចំណោម​ ៧៩៤ គ្រួសារ​ ចេញ​ពី​គម្រោង​ដី​១២,៤៤ ហិកតា ដែល​ជា​ការ​ផ្ដល់​ប្រទាន​កម្ម​ពី​សម្តេច»។

អ្នក​ស្រី ង៉ែត ឃុន វ័យ ៧២ ឆ្នាំ ដែល​ធ្លាប់​ត្រូវ​បាន​នគរបាល​រាជ​ធានី​ វាយ​បែក​ក្បាល​ដេរ​ជា​ច្រើន​ថ្នេរ​បាន​បន្ទរ​ថា អាជ្ញាធរ បាន​បដិសេធ​មិន​ផ្ដល់​ប្លង់​កម្មសិទ្ធិ​ដី​ធ្លី​ឲ្យ​ទេ ដោយ​សំអាង​ថា​ ផ្ទះនិង​ដី​របស់​ពួកគាត់​ ស្ថិតនៅ​ក្នុង​និយាម​កាម​ដី​របស់​ក្រុម​ហ៊ុន​ស៊ូកាគូអ៊ីន ខណៈ​អាជ្ញាធរ នៅ​មិន​ទាន់​បាន​បោះ​បង្គោល​កំណត់​ព្រំ​ប្រទល់​ដី​១២,៤៤​ ហិកតា នៅ​ឡើយ​។ អ្នក​ស្រី​ថ្លែង​ថា​៖«យើង​ខ្ញុំ​សុំ​ឲ្យ​សម្ដេច​តេជោ​ហ៊ុន សែន លោក​ផ្ដល់​ប្លង់​កម្ម​សិទ្ធិ​ដីធ្លី ស្រប​ច្បាប់​ជូន​ពួក​​យើង​ខ្ញុំ និង​សុំ​ឲ្យ​លុប​ចោល​នូវ​បទ​ចោទ​ប្រកាន់​លើ​អ្នក​ភូមិ​យើង​ខ្ញុំ ព្រោះ​ពួក​យើង​ខ្ញុំ​ មិន​បាន​ប្រព្រឹត្ត​ដូច​ការ​ចោទ​ប្រកាន់​របស់​អាជ្ញាធរ និង​តុលាការ​ទេ»។

ក្រោយ ពីការ​ប៉ុន​ប៉ង​ដាក់​ញតិ្ត​ដោយ​ផ្ទាល់ ជូន​លោក​ឧប​នាយក​រដ្ឋ​មន្ត្រី​សុខ​ អាន​និង​ទីប្រឹក្សា​ផ្ទាល់​លោក​នាយក​រដ្ឋ​មន្ត្រី​ហ៊ុន សែន ​មិន​បាន​សម្រេច​ ក្រុម​អ្នក​ភូមិ​ទាំង​នេះ​បាន​សម្រេច​ដាក់​ញតិ្ត​ជូន​តាម​រយៈ​លោក ប៊ុន អ៊ុយ រដ្ឋ​លេខាធិការ​ទីស្ដីការ​គណៈរដ្ឋ​មន្ត្រី និង​លោក​ ជា វ៉ាន់ដេត ទីប្រឹក្សា​ផ្ទាល់​ លោក​ឧបនាយក​រដ្ឋ​មន្ត្រី​សុខ អាន។

ក្នុង​ជំនួប ពិភាក្សា​ផ្ទាល់​ រយៈពេល​ជាង​មួយ​ម៉ោង ជា​មួយ​មន្ត្រី​ជាន់​ខ្ពស់ ​នៃ​ទីស្ដីការ​គណៈរដ្ឋ​មន្ត្រី ទាំង​ពី​រូប​ខាង​លើ​នេះ តំណាង​អ្នក​ភូមិ​ចំនួន​៥​ នាក់ ដែល​ក្នុង​នោះ ក៏​មាន​តំណាង​សហគមន៍ ថ្ម​គោល ដែល​ស្ថិត​នៅ​ក្បែរ​ព្រលាន​យន្ត​ហោះ​អន្តរជាតិ​ភ្នំពេញ បាន​លើក​ឡើង​អំពី​បញ្ហា​ផ្សេង​ៗ​ទាក់ទង​ទៅ​នឹង​គម្រោង​នៃ​ការ​បណ្ដេញ​ពួក គាត់ ចេញ​ពី​លំនៅដ្ឋាន​របស់​អាជ្ញាធរ​ខណ្ឌ​ពោធិ៍សែនជ័យ ខណៈ​តំណាង​អ្នក​បឹងកក់ បាន​លើក​ឡើង​នូវ​បញ្ហា​បួន​ចំណុច ក្នុង​នោះ ការ​ផ្ដល់​ប្លង់​កម្មសិទ្ធិ​ដី​ធ្លី ការ​បោះ​បង្គោល​កំណត់​ព្រំ​ប្រទល់​ដី​១២,៤៤ ហិកតា ការ​សុំ​ឲ្យ​ដោះ​លែង​សកម្មជន​ដី​ធ្លី និង​លុប​ចោល​បទ​ចោទ​ប្រកាន់​ប្រឆាំង​ស្ត្រី​១៣ នាក់​។

ក្រុម តំណាង​អ្នក​តវ៉ា​ទាំង​នេះ រំពឹង​ថា សំណើ​និង​ញតិ្ត​របស់​ពួក​គាត់ នឹង​បាន​ទៅ​ដល់​ដៃ​របស់​លោក​ឧបនាយក​រដ្ឋ​មន្ត្រី​សុខ​ អាន  និង​លោក​នាយក​រដ្ឋ​មន្ត្រី​ហ៊ុន សែន ហើយ​ជឿថា​ ដំណោះ​ស្រាយ​ពិត​ប្រាកដ​នឹង​កើត​មាន​ក្នុង​រយៈ​ពេល​ដ៏​ខ្លី​ខាង​មុខ​នេះ។

អ្នក ស្រី​ទេព វន្នី តំណាង​ម្នាក់​ ក្នុង​ចំណោម​បួន​នាក់​ ពី​សហគមន៍​បឹងកក់ បាន​ថ្លែង​ថា លោក ជា​ វ៉ាន់​ដេត និង លោក ប៊ុន អ៊ុយ បាន​ផ្ដល់​ទំនុក​ចិត្ត​យ៉ាង​ខ្លាំង​ថា​ លោក​នឹង​ពាំ​នាំ​នូវ​សំណូម​ពរ​ដោយ​ទទូច​របស់​ពួក​គាត់ ព្រម​ទាំង​ញតិ្ត ដែល​មាន​ស្នាម​មេ​ដៃ​របស់​ប្រជា​សហគមន៍​រង​គ្រោះ ទៅ​ប្រគល់​នឹង​ជម្រាប​ជូន​លោក​ឧប​នាយក​រដ្ឋ​មន្ត្រី​ សុខ អាន ដើម្បី​ចាត់​វិធានការ​ដោះ​ស្រាយ​តាម​ផ្លូវ​ច្បាប់។

អ្នក​ស្រី​ថ្លែង​ថា៖ «យើង​រំពឹង​ថា យើង​នឹង​ទទួល​បាន​ដំណោះ​ស្រាយ​ពិត​ប្រាកដ ប្រសិន​បើ​មន្ត្រី​រដ្ឋាភិបាល​ថ្នាក់​លើ​ លោក​ពិត​ជា​មាន​ឆន្ទៈ ក្នុង​ការ​ដោះ​ស្រាយ​ បញ្ចប់​ជម្លោះ​ដី​ធ្លី ដ៏​រ៉ាំរ៉ៃ ក្នុង​តំបន់​បឹងកក់​មែន​នោះ»៕

អត្ថបទគួរចាប់អារម្មណ៍