The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​បឹង​កក់​សុំ​បញ្ចូល​គ្រួសារ​នៅ​សល់​ក្នុង​ដី​អនុក្រឹត្យ

អ្នក​បឹង​កក់​សុំ​បញ្ចូល​គ្រួសារ​នៅ​សល់​ក្នុង​ដី​អនុក្រឹត្យ

អ្នក​បឹង​កក់​សុំ​បញ្ចូល​គ្រួសារ​នៅ​សល់​ក្នុង​ដី​អនុក្រឹត្យ

130503_05a
សកម្មជនបឹងកក់ ព្យាយាមរកអន្តរាគមន៍ទោះជួបការប្រឈមយ៉ាងណាក៏ដោយ រូប ហុង មិនា

ភ្នំពេញៈ សហគមន៍​បឹង​កក់ និង​អង្គការ​សង្គម​ស៊ីវិល​ដែល​ធ្វើ​ការ​ទាក់​ទង​និង​សិទ្ធិ​លំនៅឋាន​និង​ដី​ធ្លី ចេញ​សេចក្ដី​ថ្លែង​ការណ៍​រួម​មួយ​កាលពី​ម្សិលមិញ ជំរុញ​ឲ្យ​អាជ្ញាធរ​ធ្វើ​ការ​ដោះស្រាយ​បញ្ចប់​វិវាទ​ដី​ធ្លី​ក្នុង​តំបន់​បឹង​កក់ តាម​ការ​ដាក់​បញ្ចូល​ចំនួន​គ្រួសារ​ដែល​នៅ​សល់​ទៅ​ក្នុង​ដី​អនុក្រឹត្យ​១២,៤៤ ហិកតា និង​ផ្ដល់​ប័ណ្ណ​កម្មសិទ្ធិ​ឲ្យ​ផង​។

សេចក្ដី​ថ្លែង​ការណ៍​នោះ​បាន​បង្ហាញ​ពី​លទ្ធផល​សិក្សា​លម្អិត​មួយ នៅ​លើ​ទីតាំង​ដី​សម្បទាន​១២,៤៤​ហិកតា ដែល​ប្រមុខ​រដ្ឋាភិបាល​ធ្វើ​ប្រទានកម្ម​ផ្ដល់​ជូន​ពលរដ្ឋ​សេសសល់​ក្នុង​តំបន់​បឹង​កក់​តាម​អនុក្រឹត្យ​លេខ​១៨៣ ចុះ​ថ្ងៃ​ទី១១ ខែ​សីហា ឆ្នាំ​២០១១ នោះ បាន​រក​ឃើញ​ដី​ឡូត៍​ទំនេរ​មាន​៤០០​ឡូត៍ គ្រប​ដណ្ដប់​លើ​ផ្ទៃ​ដី​ជាង​២​ហិកតា​ក្នុង​ទំហំ​ដី​នោះ។

ថ្លែង​នៅ​ក្នុង​សន្និសីទ​កាសែត​ពី​ព្រឹក​ម្សិលមិញ នៅ​ភោជនីយដ្ឋាន​ផាក​កាហ្វេ ភ្នំពេញ លោក ចាន់ រិទ្ធិសក្តិ តំណាង​ពី​សហគមន៍​បឹងកក់ ដែល​ត្រូវ​កាត់​ឈ្មោះ​ចេញ​ពី​ទីតាំង​ដី​១២,៤៤​ហិកតា បាន​បញ្ជាក់​ថា ការ​បង្ហាញ​នូវ​លទ្ធផល​នេះ ក្នុង​គោល​បំណង​សុំ​ឲ្យ​អាជ្ញាធរ​ពាក់​ព័ន្ធ​គ្រប់​ស្ថាប័ន​ទាំង​អស់​ជួយ​ពិនិត្យ​និង​ដោះស្រាយ បញ្ចប់​វិបត្តិ​ដី​ធ្លី​ជូន​ពួក​គាត់​ឲ្យ​បាន​ឆាប់​តាម​ដែល​អាច​ធ្វើ​ទៅ​បាន។

លោក​និយាយ​ថា ៖ «ប្រជា​ពលរដ្ឋ​ក្នុង​សហគមន៍​បឹង​កក់​ខ្ញុំ រួម​ទាំង​អង្គការ​សង្គម​ស៊ីវិល​យល់​ថា ផែនការ​នេះ​ជា​មធ្យោបាយ​ដ៏​សម​ស្រប​មួយ ឆ្ពោះ​ទៅ​រក​ដំណោះស្រាយ​បញ្ចប់​ជម្លោះ​ដី​ធ្លី​តំបន់​បឹង​កក់ ដែល​នេះ​ជា​បំណង​ប្រាថ្នា​តែ​មួយ​គត់​របស់​ប្រមុខ​រដ្ឋាភិបាល​កម្ពុជា និង​យើង​ខ្ញុំ​ចង់​បាន»។

អ្នក​ស្រី ខែក ចាន់រស្មី សកម្មជន​ស្ត្រី​នៃ​សហគមន៍​បឹង​កក់ ដែល​ចូល​រួម​ឆ្លើយ​សំណួរ​អ្នក​សារ​ព័ត៌មាន​បាន​លើក​ឡើង​ថា ដោយ​មាន​ការ​ជួយ​ជ្រោម​ជ្រែង​ពី​អង្គការ​ក្រៅ​រដ្ឋាភិបាល លើ​បញ្ហា​ច្បាប់​និង​បច្ចេកទេស​កន្លង​មក ពួក​គាត់​បាន​នាំ​គ្នា​ចង​ក្រង​ស្ថិតិ​ប្រជា​ពលរដ្ឋ​ដែល​បាន​កាត់​ចេញ​ពី​ដី​១២,៤៤​ហិកតា គឺ​មាន​ចំនួន​៦១​គ្រួសារ។

អ្នក​ស្រី​បន្ត​ថា៖ «​ក្នុង​ចំណោម​នេះ​មាន​តែ​៤៨​គ្រួសារ​ប៉ុណ្ណោះ ដែល​ពួកគេ​ចង់​ឲ្យ​មាន​ការ​ដោះ​ស្រាយ​ដាក់​បញ្ចូល​គ្រួសារ​គេ​ទៅ​ក្នុង​ដី​ទំនេរ​៤០០​ប្លង់ ដែល​យើង និង​អង្គការ​ក្រៅ​រដ្ឋាភិបាល​រក​ឃើញ​នោះ។ ចំណែក​១៣​គ្រួសារ​ទៀត​នៅ​មិន​ទាន់​សម្រេច​ចិត្ត​ច្បាស់​លាស់​នៅ​ឡើយ»។

ម្ចាស់​ពាន​រង្វាន់​ស្ត្រី​និង​សិទ្ធិ​មនុស្ស ពី​អឺរុប​និង​អាមេរិក ប្រចាំ​ឆ្នាំ​២០១៣ អ្នក​ស្រី ទេព វន្នី បាន​ថ្លែង​ថា ដី​ទំនេរ​ចំនួន​៤០០​ឡូត៍​នោះ គឺជា​ដី​របស់​ប្រជា​ពលរដ្ឋ​ក្នុង​តំបន់​បឹង​កក់ ដែល​សម្រេច​ចិត្ត​ទាំង​បង្ខំ​ក្នុង​ការ​ទទួល​យក​គោលការណ៍ ៨​ពាន់​ដុល្លារ និង​ពីរ​លាន​រៀល​ជា​ថ្នូរ​នឹង​ការ​ចាក​ចេញ​ពី​តំបន់​នេះ នៅ​មុន​ពេល​ប្រមុខ​រាជ​រដ្ឋាភិបាល​សម្រេច​ចេញ​អនុក្រឹត្យ​ស្តី​ពី​«ការ​កែ​សម្រួល​ក្រឡា​ផ្ទៃ​ដី​តំបន់​អភិវឌ្ឍន៍​បឹងកក់ ដែល​ក្រោយ​មក​អាជ្ញាធរ​រាជធានី​ភ្នំពេញ ទំនង​ជា​បាន​ចេញ​ជា​ប្លង់​កម្មសិទ្ធិ​ឲ្យ​ក្រុមហ៊ុន​ស៊ូកា​គូអ៊ីន។

លោក ឡាវ ម៉េងឃីន សមាជិក​ព្រឹទ្ធសភា​មក​ពី​គណបក្ស​ប្រជាជន​កម្ពុជា​និង​ជា​ម្ចាស់​ក្រុមហ៊ុន​ស៊ូកា​គូអ៊ីន មិន​អាច​ទំនាក់​ទំនង​បាន​ទេ​ជុំវិញ​បញ្ហា​នេះ។ តែ លោក ឡាវ វណ្ណ អតីត​អគ្គ​នាយក​រង​ក្រុមហ៊ុន​នេះ បាន​ប្រាប់​ភ្នំពេញ ប៉ុស្តិ៍​ថា​៖​«ក្រុម​អ្នក​ភូមិ​គួរ​តែ​ពិនិត្យ​និង​សិក្សា​ពី​ផ្លូវ​ច្បាប់​ឲ្យ​បាន​ច្រើន​មុន​នឹង​សម្រេច​ចិត្ត​និយាយ​ពី​បញ្ហា​នេះ ព្រោះ​ក្រុមហ៊ុន​មិន​បាន​ប្រព្រឹត្ត​អ្វី​រំលោភ​ទៅ​លើ​ច្បាប់​នោះ​ទេ»។ លោក​មិន​ប្រាប់​បញ្ហា​លម្អិត​ទេ ដោយ​បាន​ជំរុញ​ឲ្យ​សួរ​ទៅ​ខាង​អាជ្ញាធរ​រាជធានី​ភ្នំពេញ​ជុំវិញ​បញ្ហា​នេះ។

លោក ឡុង ឌីម៉ង់ អ្នក​នាំ​ពាក្យ​សាលា​រាជធានី​ភ្នំពេញ​ថ្លែង​ថា លោក​មិន​ទាន់​ទទួល​ព័ត៌មាន ឬ​របាយ​ការណ៍​លម្អិត អំពី​បញ្ហា​នេះ​ឡើយ។ លោក​ថា៖ «ខ្ញុំ​មិន​ទាន់​ដឹង​ច្បាស់​ពី​បញ្ហា​នេះ​ទេ ប៉ុន្តែ រឿង​នេះ​វា​ពិត​ជា​គួរ​ឲ្យ​ភ្ញាក់​ផ្អើល​ណាស់»។

លោក អ៊ី សារ៉ុម ប្រធាន​សមាគម​ធាង​ត្នោត បាន​លើក​ឡើង​ថា បញ្ហា​នេះ​អាជ្ញាធរ​ពាក់​ព័ន្ធ​គួរ​តែ​ពិនិត្យ​អង្កេត​សា​ជា​ថ្មី​អំពី​ករណី​នេះ ព្រោះ​វា​ជា​មធ្យោបាយ​ក្នុង​ការ​ស្វែង​រក​ដំណោះស្រាយ​បញ្ចប់​វិវាទ​ដី​ធ្លី​នៅ​ក្នុង​តំបន់​នេះ៕

អត្ថបទគួរចាប់អារម្មណ៍