The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​បុរី​កីឡា​ចូល​បោះ​តង់​លើ​ដី​ជម្លោះ​កាន់​តែ​ច្រើន

អ្នក​បុរី​កីឡា​ចូល​បោះ​តង់​លើ​ដី​ជម្លោះ​កាន់​តែ​ច្រើន

អ្នក​បុរី​កីឡា​ចូល​បោះ​តង់​លើ​ដី​ជម្លោះ​កាន់​តែ​ច្រើន

130326_09a
អ្នកភូមិនៅបុរីកីឡា ជួបជុំគ្នាធ្វើសន្និសីទកាសែតតវ៉ាឲ្យក្រុមហ៊ុននិងអាជ្ញាធរដោះស្រាយដីផ្ទះ សុភចរិយា

ភ្នំពេញៈ ​ពលរដ្ឋ​ក្រី​ក្រ​នៃ​សហគមន៍​បុរី​កីឡា បាន​នាំ​គ្នា​ចូល​ទៅ​បោះ​តង់​កាន់​តែ​ច្រើន​ឡើង​នៅ​លើ​ទី​តាំង​ដី ដែល​ម្ចាស់​ក្រុម​ហ៊ុន​ផាន​អ៊ីម៉ិច​អះអាង​ថា ​បាន​លក់​ទៅ​ឲ្យ​អ្នក​ផ្សេង បើ​ទោះ​ជា​កង​សន្តិសុខ​ក្រុមហ៊ុន​បាន​ធ្វើ​ការ​រុះរើ និង​រឹប​អូស​យក​តង់ និង​គំរាម​ចាប់​ខ្លួន​ពួកគេ​ឲ្យ​នគរបាល​ក្តី។

កាលពីថ្ងៃទី១០ ខែ​មីនា​មុន​នេះ មាន​សេចក្ដី​រាយ​ការណ៍​ថា​មាន​តែ​ពលរដ្ឋ​បួន​គ្រួសារ​ប៉ុណ្ណោះ បាន​ព្យាយាម​ចូល​ទៅ​បោះ​តង់​ស្នាក់​នៅ​ជា​បណ្ដោះ​អាសន្ន​នៅ​លើ​ទីតាំង​ដី ដែល​អ្នកស្រី ស៊ុយ សុផាន ​អះ​អាង​ប្រាប់​ភ្នំពេញ​ប៉ុស្តិ៍​ថា បាន​លក់​ទៅ​ឲ្យ​ឧកញ៉ា ស៊ី គង់ទ្រីវ ដើម្បី​រង់ចាំ​ដំណោះ​ស្រាយ​ពី​ក្រុមហ៊ុន​និង​អាជ្ញាធរ​រាជធានី។

ប៉ុន្តែ១ថ្ងៃ​ក្រោយ​ពី​កង​សន្តិសុខ​ក្រុមហ៊ុន​ផាន​អ៊ីម៉ិច រឹប​អូស​យក​ដំបូល​តង់​ស្បៀង​និង​ទ្រព្យ​សម្បត្តិ​មួយ​ចំនួន​ពី​ពួកគេ ក្រុម​អ្នក​ភូមិ​បាន​នាំ​គ្នា​ចូល​ទៅ​បោះ​តង់​ស្នាក់​នៅ​បន្ថែម​ទៀត ​បច្ចុប្បន្ន បាន​កើន​ឡើង​រហូត​ដល់​៤៥ គ្រួសារ។ក្នុង​កម្មវិធី​សន្និសីទ​កាសែត​កាល​ពី​ព្រឹក​ម្សិល​មិញ អ្នក​ស្រី ស ស៊ន ដែល​ទៅ​បោះ​តង់​មុន​គេ​បង្អស់ នៅ​លើទី​តាំង​ដី​នោះ បាន​ច្រាន​ចោល​នូវ​ការ​ចោទ​របស់​អ្នក​ស្រី ស៊ុយ ​សុផាន ដែល​ថា​ពួក​គាត់​ទន្ទ្រាន​ចូល​កាន់​កាប់​«រំលោភ​លើ​សិទ្ធិ​របស់​ម្ចាស់​ កម្មសិទ្ធិ​ករ​ថ្មី» ហើយគំរាម​ពួក​គាត់​ថា​ អាច​នឹង​ប្រឈម​នឹង​ការប្ដឹង​ឡើង​តុលាការ​ពី​ម្ចាស់​កម្មសិទ្ធិ​ករ​ថ្មី​នោះ។

អ្នក​ស្រី​ថ្លែង​ថា៖​«យើង​នឹង​មិន​ចាក​ចេញ​ពី​ទី​នេះ រហូត​ដល់​មាន​ដំណោះ​ស្រាយ។ ទី​នេះ​ជា​ទី​តាំង​ដី​ចាស់​របស់​ខ្ញុំ ដែល​ក្រុមហ៊ុន​ឈូស​កម្ទេច​ផ្ទះ​ខ្ញុំ​កាល​ពី​ដើម​ឆ្នាំ​មុន ដោយ​គ្មាន​សំណង»។

ជា​មួយ​គ្នា​នោះ អ្នក​ស្រី ស៊ូ អីុម បន្ទរ​ថា៖«​យើង​មិន​ខ្វល់​ថា​គាត់ [អ្នក​ស្រី​ ស៊ុយ​ សុ​ផាន]​ លក់ ឬ ផ្ទេរ​កម្ម​សិទ្ធិទី​តាំង​ដី​មួយ​កន្លែង​នេះ​ទៅ​ឲ្យ​អ្នក​ណា​ទេ ​យើង​គ្រាន់​តែ​ចាំថា គាត់​ឈូស​ឆាយ​កម្ទេ​ច​ផ្ទះ​និង​រឹប​អូស​យក​ដី​របស់​ពួក​យើង ដោយ​គ្មាន​សំណង»។

អ្នកស្រី សេង គន្ធា អាយុ​៣៦ ឆ្នាំ ដែល​អះអាង​ថា បាន​រស់​នៅ​ក្នុង​តំបន់​បុរីកីឡា ពី​ឆ្នាំ​១៩៩៥ បាន​លើក​បង្ហាញ​ឯកសារ​ជា​ច្រើន រួម​មាន ​ប័ណ្ណស្នាក់នៅ អង្កេត ប័ណ្ណសមាជិក​សហគមន៍ ប័ណ្ណ​បោះឆ្នោត និង​ឯកសារ​មួយ​ចំនួន​ទៀត។ អ្នក​ស្រី​និយាយ​ទាំង​ទឹក​ភ្នែក​ថា៖ «ខ្ញុំ​មិន​ចង់​រស់​នៅ​ក្នុង​ស្ថានភាព​ដ៏​អាក្រក់​បែប​នេះ​ទេ ខ្ញុំ​ចង់​ឲ្យ​ក្រុម​ហ៊ុន និង​អាជ្ញាធរ​ដោះ​ស្រាយ​ផ្ដល់​ទី​ជម្រក​ស្នាក់​នៅ​ឲ្យ​សមរម្យ ដើម្បី​ងាយ​ស្រួល​ក្នុង​ការ​ចេញ​ប្រកប​មុខ​របរ​ផ្គត់ផ្គង់​ការ​រៀន​សូត្រ កូនៗ​របស់​យើង​ខ្ញុំ»។

អ្នកស្រីប្រាប់ទៀតថា មេ​ក្រុម​សន្តិ​សុខ​ម្នាក់ ដែល​មាន​ឈ្មោះ សារី តែង​តែ​ដើរ​កាត់​ជំ​រំបោះ​តង់​ថ្មី​លើ​ដី​ចាស់​ពួក​គាត់​ បាន​គំរាម​ពួក​គាត់​ថា​ បើ​ពួក​គាត់​មិន​ព្រម​រុះរើ និង​ដើរ​ចេញ​ពី​ទី​តាំង​នេះ​ទេ ថ្ងៃ​ណា​មួយ​ បើ​មាន​អ្នក​ណា​មក​ពី​ខាង​ក្រៅ«ចូល​អារក​សម្លាប់ ឬ ជះ​ទឹក​អាស៊ីត​លើ កុំ​បន្ទោស​ក្រុមហ៊ុន។ ដែល​នេះ​ជា​សម្តី​គំរាម​យ៉ាង​ធ្ងន់ធ្ងរ​មក​លើ​យើង​ខ្ញុំ»។

កាល​ពី​ម្សិល ​មិញ គេ​មិន​ឃើញ​វត្តមាន​របស់​ក្រុម​សន្តិ​សុខ ក្រុមហ៊ុន​រារាំង ​សកម្មភាព​អ្នក​ភូមិ​ទាំង​នេះ​ឡើយ ហើយ​ក៏​មិន​អាច​ទំនាក់​ទំនង​​សុំ​ការ​បំភ្លឺ​ពី​មេ​ក្រុម​សន្តិសុខ ដែល​អ្នក​ភូមិ​​លើក​ឡើង​នោះ​ទេ។ ចំណែក​ឯ​អ្នក​ស្រី​ ស៊ុយ សុផាន​ ក៏​មិន​អាច​ទំនាក់​ទំនង​សុំ​ការ​អធិប្បាយ​បន្ថែម​ពី​ករណី​នេះ​បាន​ដែរ​កាល ​ពី​ម្សិលមិញ ដោយ​អ្នក​ស្រី ជាប់​រវល់​ចុះ​តាម​ខេត្ត។

លោក ណើប លី ប្រធាន​កម្ម​វិធី​ពង្រឹង​អំណាច​សហគមន៍ នៃ​លេខា​ធិការ​ដ្ឋាន​នៃ​ក្រុម​បេសកកម្ម​ពិសេស​សិទ្ធិ​លំនៅ​ដ្ឋាន​បាន​ប្រាប់​ថា នេះ​ជា​ពេល​មួយ ដែល​ភាគី​ក្រុមហ៊ុន និង​អាជ្ញាធរ​រាជធានី​ត្រូវ​ដោះ​ស្រាយ​ជូន​ពលរដ្ឋ។

លោកបន្តថា៖«ការ ​ចូលបោះតង់​ស្នាក់​នៅ​សា​ជា​ថ្មី​លើ​ដី​ចាស់​នេះ គឺ​បង្ហាញ​ថា ពួកគាត់​មិន​ចង់​ឲ្យ​មាន​ការ​អូស​បន្លាយ​ដំណោះ​ស្រាយ​តទៅ​ទៀត​ទេ ដូច្នេះ​ទាំង​ក្រុមហ៊ុន​និង​អាជ្ញាធរ​ចាំ​បាច់​ត្រូវ​តែ​ដោះស្រាយ​ជូន​ពួកគាត់​ឲ្យ​បាន​ឆាប់»៕

អត្ថបទគួរចាប់អារម្មណ៍