The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​ភូមិ​៧​នាក់ នៅ​ព្រៃ​ឈរ ចុះ​ក្អួត​រាក​សង្ស័យ​ថា​ពុល​ទឹក​ស៊ីអ៊ីវ

អ្នក​ភូមិ​៧​នាក់ នៅ​ព្រៃ​ឈរ ចុះ​ក្អួត​រាក​សង្ស័យ​ថា​ពុល​ទឹក​ស៊ីអ៊ីវ

អ្នក​ភូមិ​៧​នាក់ នៅ​ព្រៃ​ឈរ ចុះ​ក្អួត​រាក​សង្ស័យ​ថា​ពុល​ទឹក​ស៊ីអ៊ីវ

កំពង់ចាមៈ យ៉ាង​ហោច​មាន​ប្រជាពលរដ្ឋ​៧​នាក់ ដែល​ភាគ​ច្រើន​ជា​កុមារ បាន​ពុល​អាហារ​ចុក​ពោះ​រាក​និង​ក្អួត​ចង្អោរ​និង​សង្ស័យ​ថា​បណ្តាល​មក​ពី​ហូប​បបរ ជាមួយ​ទឹក​ស៊ីអ៊ីវ​កាលពី​យប់​ថ្ងៃ​អង្គារ។

លោក អៀ ចាន់ថា នាយ​នគរបាល​ប៉ុស្តិ៍​ឃុំ​តុងរ៉ុង ស្រុក​ព្រៃឈរ បាន​ប្រាប់​ភ្នំពេញ ប៉ុស្តិ៍​ថា មាន​ក្មេង​៦​នាក់ មាន​អាយុ​ពី​បី​ឆ្នាំ​ដល់​១២​ឆ្នាំ និង​ស្ត្រី​ម្នាក់​អាយុ​៣៤​ឆ្នាំ ចុកពោះ​និង​រាក​ក្អួត​យ៉ាង​ខ្លាំង​កាលពី​យប់​ថ្ងៃ​អង្គារ ហើយ​សង្ស័យ​ថា​ពុល​ទឹក​ស៊ីអ៊ីវ ស៊ូគី! ស៊ូគី ដែល​ហូប​នឹង​បបរ ។

លោក​បន្ត​ថា៖«មិនមាន​នរណា​ម្នាក់​ស្លាប់​ទេ។ បច្ចុប្បន្ន គេ​មាន​អាការ​ធូរស្រាល​វិញ​ហើយ»។

អ្នក​ស្រី​ទេព គឹមហ៊ាន់ អាយុ​៣៤​ឆ្នាំ រស់នៅ​ភូមិ​ទ្រមក់ ឃុំ​តុងរ៉ុង ស្រុក​ព្រៃ​ឈរ ប្រាប់​ភ្នំពេញ​ប៉ុស្តិ៍ តាម​ទូរស័ព្ទ​កាលពី​ម្សិលមិញ​ថា កាលពី​ល្ងាច​ថ្ងៃ​អង្គារ គាត់​ទៅ​ទិញ​ទឹក​ស៊ីអ៊ីវ«ស៊ូគី! ស៊ូគី!» មួយ​ដប​មក​ហូប​ជាមួយ​នឹង​ឆា​ខាត់ណា ក្រោយ​ពី​ហូប​រួច​គាត់​និង​កូនៗ​បួន​នាក់ ក៏​ស្រាប់​តែ​ចុក​ពោះ​រាក​ក្អួត​តែ​ម្ដង។

អ្នក​ស្រី​បន្ត​ថា​ក្រោយ​ពី​គាត់​និង​កូនៗ​មាន​អាការ​ចុក​ពោះ​និង​រាក​ក្អួត គាត់​បាន​ឲ្យ​អ្នក​ភូមិ​ជួយ​ដឹក​ទៅ​មណ្ឌល​សុខភាព​ឃុំ​តុងរ៉ុង ប៉ុន្តែ​ដោយ​ទីនោះ​គ្មាន​ឱសថ​គ្រប់គ្រាន់ ក៏​បញ្ជូន​ទៅ​ពេទ្យ​ស្រុក។

អ្នក​ស្រី​ប្រាប់​ថា៖«ពេទ្យ​គេ​ទារលុយ​ពី​យើង​ម្នាក់ៗ​បី​ម៉ឺន​រៀល​ថ្លៃ​សេរ៉ូម ប៉ុន្តែ យើង​គ្មាន​លុយ ក៏​ត្រឡប់​មក​ផ្ទះ​វិញ​នាំ​គ្នា​ផឹក​ទឹក​ឃ្មុំ​លាយ​ក្រូច​ឆ្មារ​ទៅ...ឥឡូវ​ខ្ញុំ​និង​កូនៗ បាន​ធូរ​ហើយ»។

អ្នក​ភូមិ​ម្នាក់​ទៀត​ឈ្មោះ វ៉ាន់ បាន​ប្រាប់​ថា គាត់​បាន​ទិញ​ទឹក​ស៊ីអ៊ីវ​ម៉ាក​ដូច​គ្នា​នេះ យក​ទៅ​ស្រូប​បបរ​ឲ្យ​ចៅ​ទាំង​ពីរ​នាក់​ហូប ក្រោយ​ពី​ហូប​រួច​ចៅ​ទាំង​ពីរ ក៏​រាក​ក្អួត ស្រែក​យំ​ពេញ​ផ្ទះ។

គាត់​បន្ត​ថា៖«ខ្ញុំ​សង្ស័យ​ថា​ការ​ចុក​រាក​ក្អួត​របស់​ចៅ​ខ្ញុំ មក​ពី​ទឹក​ស៊ីអ៊ីវ​នេះ​ដែរ។ ឥឡូវ​ចៅ​ខ្ញុំ​បាន​ធូរ ហើយ​ក្រោយ​ពី​ព្យួរសេរ៉ូម​នៅ​មន្ទីរពេទ្យ​បង្អែក​ស្រុក​ព្រៃ​ឈរ​រួច»។

លោក សែម ចាន់ថុល ប្រធាន​មណ្ឌល​សុខភាព​ឃុំ​តុងរ៉ុង បាន​ប្រាប់​ភ្នំពេញ ប៉ុស្តិ៍​ថា គាត់​បាន​ចុះ​ទៅ​ប្រមូល​សំណាក​ដប​ទឹក​ស៊ីអ៊ីវ​ដែល​អ្នក​ភូមិ​ថា​ពុល​នោះ​មក​រក្សា​ទុក​ហើយ​ពី​ព្រឹក​ម្សិលមិញ។

លោក​បញ្ជាក់​ថា ៖ «ជា​ធម្មតា​ទឹក​ស៊ីអ៊ីវ ដែល​ហួស​កំណត់​ប្រើប្រាស់ អាច​បង្ក​ឲ្យ​មាន​បញ្ហា​ដល់​សុខ​ភាព ប៉ុន្តែ​តាម​ការ​ពិនិត្យ​លើ​គំរប​ដប​យើង​ឃើញថា​ដាក់​កំណត់​ពេល​ឲ្យ​ប្រើប្រាស់​រហូត​ដល់​ឆ្នាំ​២០១៤ ឯណោះ»។

លោក​បន្ត​ថា៖«ខ្ញុំ​មិន​ទាន់​ប្រាកដ​ទេ​ថា ការ​ពុល​អាហារ​នោះ​មក​ពី​ទឹក​ស៊ីអ៊ីវ​ឬក៏​យ៉ាង​ណា​ទេ ព្រោះ​កន្លែង​ខ្ញុំ​ពុំ​មាន​ឧបករណ៍​ធ្វើ​ពិសោធ​ទេ។ យើង​នឹង​បញ្ជូន​វា​ទៅ​ឲ្យ​ក្រុម​ជំនាញ​ពិនិត្យ»។

ពាក់ព័ន្ធ​នឹង​បញ្ហា​នេះ លោក ថោង តារា ប្រធាន​ទីផ្សារ​ក្រុមហ៊ុន​ទឹក​ស៊ីអ៊ីវ ស៊ូគី ស៊ូគី អះអាង​កាលពី​ម្សិលមិញ​ថា ទឹក​ស៊ីអ៊ីវ​ក្រុមហ៊ុន​លោក​បាន​ផលិត​ចេញពី​សណ្ដែក​សៀង​ពិតៗ គ្មាន​លាយ​សារធាតុ​គីមី​អ្វី​ឡើយ។ លោក​ថា៖«យើង​ហ៊ាន​ធានាថា​ទឹក​ស៊ីអ៊ីវ​ដែល​យើង​ផលិត​គឺមាន​រសជាតិ​ឆ្ងាញ់​ពិសា និង​មិន​ប៉ះពាល់​ដល់​សុខភាព​ទេ»។ លោក​ស្នើ​ឲ្យ​មាន​ការ​ត្រួត​ពិនិត្យ​ករណី​នេះ​ឲ្យ​បាន​ច្បាស់​លាស់ ព្រោះ​លោក​បារម្ភ​ថា៖«ការ​សនិ្នដ្ឋាន​របស់​អ្នក​ភូមិ អាច​ជះ​ឥទ្ធិពល​អាក្រក់​មក​លើ​កេរ្តិ៍​ឈ្មោះ​របស់​ក្រុមហ៊ុន»។

លោក ថៃ ផេង ម្ចាស់​ក្រុម​ហ៊ុន​ទឹក​ស៊ីអ៊ីវ«ស៊ូគី ស៊ូគី» បាន​ប្រាប់​ថា ក្រុមហ៊ុន​បាន​ផលិត​ទឹក​ស៊ីអ៊ីវ ច្រើន​ឆ្នាំ​មក​ហើយ មិន​ដែល​មាន​បញ្ហា​អ្វី​នោះ​ទេ ។លោក​ថ្លែង​ថា៖«យើង​តែងតែ​គិត​ដល់​អំពី​សុខភាព​ជា​ចម្បង ព្រោះ​គ្រួសារ​យើង​ខ្ញុំ​ក៏​បរិភោគ​ទឹកស៊ីអ៊ីវ​នេះ​ដែរ»។

លោក​បន្ត​ថា ៖ «យើង​គិត​ថា​ការ​ពុល​នោះ​អាច​មក​ពី​បន្លែ​មាន ជាតិ​គីមី​ពុល​ច្រើន​ជាង»៕

អត្ថបទគួរចាប់អារម្មណ៍