The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​លេង​ហ្វេសប៊ុក​ប្រតិកម្ម​ជាមួយ​ថៅកែ​ស្រាបៀរ​លីអូ.ឆាង

អ្នក​លេង​ហ្វេសប៊ុក​ប្រតិកម្ម​ជាមួយ​ថៅកែ​ស្រាបៀរ​លីអូ.ឆាង

អ្នក​លេង​ហ្វេសប៊ុក​ប្រតិកម្ម​ជាមួយ​ថៅកែ​ស្រាបៀរ​លីអូ.ឆាង

130314_07
ការអនុវត្តសាលក្រមឈូសបំផ្លាញផ្ទះអ្នកកែវផុសយកដីឲ្យលោកជៀម ផែន សហការី

ការ​អនុ​វត្ត​សាល​ក្រម​​ឈូស​បំផ្លាញ​ផ្ទះ​អ្នក​កែវ​ផុស​យក​ដី​ឲ្យ​លោក​ជៀម ផែន​។ រូបថត សហ​ការី

ភ្នំពេញៈ សមាជិក​នៃ​បណ្ដាញ​សង្គម​ហ្វេសប៊ុក​(Facebook) បាន​បញ្ចេញ​ប្រតិកម្ម​តប​ទៅ​លោក​ឧកញ៉ា ជៀម ផែន ម្ចាស់​ក្រុមហ៊ុន​នាំ​ចូល​ស្រាបៀរ Leo និង Chang ដោយ​ចែក​ចាយ​សារ​អំពាវនាវ​បន្ត​គ្នា​ឲ្យ​ឈប់​ពិសា​ស្រាបៀរ​ទាំង​ពីរ​មុខ​ នេះ ​ដោយ​សារ​សកម្មភាព​ឈូស​ឆាយ​កម្ទេច​លំនៅដ្ឋាន​ពលរដ្ឋ​៤៩ គ្រួសារ នៅ​កែវផុស កាល​ពី​ដើម​ខែ​មីនា។

សារ​អំពាវនាវ​នៃ​សមាជិក​បណ្ដាញ សង្គម​នេះ ខ្លះ​មាន​ដាក់​សញ្ញា​រូប​ក្បាល​ខ្មោច​ពណ៌​ក្រហម លើ​រូប​កំប៉ុង​ស្រាបៀរ Leo និង​ Chang និង​ដាក់​រូបថត​បង្ហាញ​ពី​សកម្មភាព​កម្ទេច​ផ្ទះ និង​ក្ដី​ឈឺចាប់​របស់​ជន​ក្រីក្រ នៅ​​ក្នុង​ភូមិ-ឃុំ​កែវផុស ស្រុក​ស្ទឹងហាវ ខេត្ត​ព្រះសីហនុ ផង។

សារអំពាវ​នាវ​នៃ​សមាជិក ហ្វេសប៊ុក ដែល​ប្រើ​ឈ្មោះ​ ទី ស្រីពេជ្រ លើក​ឡើង​ថា ​នាង​នឹង​ប្រាប់​មិត្តភក្តិ​ប្រុស​ស្រី នាង​ឲ្យ​ឈប់​ពិសា​ស្រាបៀរ​ទាំង​ពីរ​មុខ​នេះ​ និង​បាន​សរសេរ​ថា៖ «លោក​ជៀម ផែន ពិត​ជា​ជន​កំណាច អមនុស្សធម៌» ប្រើប្រាស់​លុយ​ពី​ការ​នាំ​ចូល​និង​លក់​ចែក​ចាយ​ស្រាបៀរ​ទាំង​ពីរ​មុខ​នេះ យក​ទៅ​ប្រើ​សមត្ថកិច្ច​ឲ្យ​ធ្វើ​បាប​ពលរដ្ឋ​ក្រីក្រ​រហូត​ដល់​អស់​ផ្ទះ​សម្បែង ដីធ្លី និង​ទី​ជម្រក​រស់​នៅ​។

សមាជិក​ហ្វេសប៊ុក​ម្នាក់​ទៀត លោក លីវ បាវី សរសេរ​ថា៖​ «បញ្ឈប់​ការ​ផឹក​ស្រាបៀរ​លីអូ និង​ស្រាបៀរ​ឆាង អាច​ជួយ​កាត់​បន្ថយ​ការ​បណ្ដេញ​ពលរដ្ឋ​ពី​លំនៅដ្ឋាន​ដោយ​ហិង្សា»។

ពាក់ព័ន្ធ​នឹង​ការ​អំពាវនាវ​នេះ លោក ខ័ណ្ឌ ចន្ទសុផល ប្រធាន​ក្រុម​បណ្ដាញ​សង្គម ហ្វេសប៊ុក​ព័ត៌មាន​ជាតិ​ថ្មីៗ ដោយ​សេរី​និង​ប្រតិកម្ម​រហ័ស ​បាន​ថ្លែង​ប្រាប់​ភ្នំពេញ ប៉ុស្តិ៍ រិះគន់​ទៅ​លើ​អ្នក​បញ្ជូន​សារ​ទាំង​នេះ​ថា ជា​ការ​ចូល​រួម​វាយ​ប្រហារ​ខាង​ពាណិជ្ជកម្ម​ដ៏​ធំ​មួយ ប្រឆាំង​ក្រុមហ៊ុន​ស្រាបៀរ Leo ​និង Chang ដោយ​ខ្វះ​ការ​ពិចារណា​ឲ្យ​បាន​ល្អិនល្អន់។​

លោក​ថ្លែង​ថា ៖ «​យើង​ពិនិត្យ​ឃើញ​ថា សារ​ទាំង​នោះ​បង្ហាញ​អំពី​ជម្លោះ​ផ្ទៃ​ក្នុង​លើ​ផ្នែក​ជំនួញ​ស្រាបៀរ ខណៈ​ស្រាបៀរ Leo និង Chang​ កំពុង​មាន​ប្រជាប្រិយភាព​ពី​អតិថិជន​របស់​ខ្លួន»។

លោក​ថ្លែង​ថា៖ «ខ្ញុំ​គិត​ថា យើង​មិន​គួរ​ភ្ជាប់​ទំនាស់​ដីធ្លី​ទៅ​នឹង​ជម្លោះ​មុខ​ជំនួញ​ស្រាបៀរ​នោះ​ទេ ...ចង់​មិន​ចង់ អ្នក​ផ្ដើម​គំនិត​នៅ​ក្នុង​ការ​បញ្ជូន​សារ​នេះ ជា​អ្នក​បម្រើ​ការងារ ឬ​ផលប្រយោជន៍​ឲ្យ​ក្រុមហ៊ុន​ស្រាបៀរ​ណា​មួយ ដែល​មាន​វិវាទ​ខាង​ផ្នែក​ទីផ្សារ​ពាណិជ្ជកម្ម ​ជាមួយ​នឹង​ក្រុមហ៊ុន​ស្រាបៀរ​ទាំង​ពីរ​នេះ​ក៏​ថា​បាន»។​

កាល​ពី​ថ្ងៃ​ទី៥ ខែ​មីនា កម្លាំង​ប្រដាប់​អាវុធ​អាជ្ញាធរ​ដែន​ដី​ខេត្ត​ព្រះសីហនុ និង​ព្រះរាជ​អាជ្ញា​សាលា​ដំបូង​ខេត្ត​បាន​ចុះ​អនុវត្ត​សាលក្រម​បណ្ដោះ​អាសន្ន​របស់​តុលាការ ដោយ​បាន​ឈូស​ឆាយ​ដី​និង​ផ្ទះ​ពលរដ្ឋ​៤៩​គ្រួសារ នៅ​កែវ​ផុស​យក​ដី​ទៅ​ឲ្យ​ឧកញ៉ា ជៀម ផែន ថៅកែ​ស្រា​បៀរ Leo-Chang ដែល​ជា​ភាគី​ឈ្នះ​ក្ដី។

ក្រោយ​ពី​បាត់បង់​ដីធ្លី​និង​លំនៅ​ដ្ឋាន គ្រួសារ​ពលរដ្ឋ​ក្រីក្រ​ទាំង​នេះ បាន​នាំ​គ្នា​ទៅ នៅ​លើ​ឆ្នេរ​ខ្សាច់់​មាត់​សមុទ្រ​ចម្ងាយ​ពី​ភូមិ​ធ្លាប់​រស់នៅ​ប្រមាណ ២​គីឡូ​ម៉ែត្រ។​ ដោយ​ឃើញ​នូវ​ការ​លំបាក​វេទនា លោក​ឧកញ៉ា ​ម៉ុង ឫទ្ធី បាន​ប្រកាស​ទទួល​យក​ពួក​គេ​ឲ្យ​ទៅ​រស់នៅ​ជា​បណ្ដោះ​អាសន្ន​នៅ​ផ្ទះ ជា​បុរី​កម្មករ​របស់​លោក ដោយ​ផ្ដល់​ការងារ​នៅ​ក្នុង​ក្រុមហ៊ុន​លោក​ថែម​ទៀត​ ខណៈ​ក្រុម​សង្គម​ស៊ីវិល​មួយ​ចំនួន​បាន​នាំ​យក​ស្បៀង​អាហារ​និង​សម្ភារ ប្រើប្រាស់​ខ្លះ ទៅ​ផ្គត់ផ្គង់​អ្នក​ទាំង​នោះ ដើម្បី​សម្រួល​ការ​ខ្វះខាត​មួយ​រយៈ​ខ្លី។​

តាម​របាយការណ៍​ព័ត៌មាន​របស់​មជ្ឈមណ្ឌល​ព័ត៌មាន​ដើម​អម្ពិល តាម​ប្រព័ន្ធ​អ៊ីនធឺណិត​ពី​ម្សិលមិញ ការ​ចុះ​អនុវត្ត​សាលក្រម​បណ្ដោះ​អាសន្ន​នេះ​បាន «បំពាន»​លើ​ថ្នាក់​លើ​ ខ្លួន។ ក្នុង​របាយការណ៍​ព័ត៌មាន​នេះ បាន​ដក​ស្រង់​សេចក្ដី​ណែនាំ​លោក ឌិត មុន្ទី ប្រធាន​តុលាការ​កំពូល ទៅ​កាន់​ប្រធាន​តុលាការ​សាលាឧទ្ធរណ៍ រួម​ទាំង​ប្រធាន​តុលាការ​រាជធានី ខេត្ត-ក្រុង​នានា​ថា​៖ «ការ​សម្រេច​ឲ្យ​អនុវត្ត បណ្ដោះ​អាសន្ន​នូវ​សាលក្រម​ឬ​សាល​ដីកា​រដ្ឋ​ប្បវេណី ​ដែល​ទាក់ទង​នឹង​ការ​ទាមទារ​សិទ្ធិ​លើ​អចលនវត្ថុ មិន​ត្រូវ​មាន​តទៅ​ទៀត​ទេ ក្នុង​ស្ថានភាព​បច្ចុប្បន្ន ខណៈ​រាជរដ្ឋាភិបាល​កំពុង​តែ​អនុវត្ត​យ៉ាង​ក្ដៅ​គគុក​នូវ​នយោបាយ​កំណែ​ទម្រង់​ដី​ធ្លី»។

លោកឧកញ៉ា ជៀម ផែន ​និង​អ្នក​គ្រប់គ្រង​ការ​ចែក​ចាយ​ស្រាបៀរ​ទាំង​ពីរ​មុខ​នេះ មិន​អាច​ទាក់​ទង​រក​ការ​បញ្ជាក់​តប​ទៅ​នឹង​ការ​អំពាវនាវ​នៃ​សមាជិក​អ្នក​លេង​ហ្វេសប៊ុក​នេះ​បាន​ទេ ពី​ម្សិលមិញ៕

អត្ថបទគួរចាប់អារម្មណ៍