ភ្នំពេញៈ សហគមន៍ពលរដ្ឋមួយ ក្នុងខណ្ឌពោធិ៍សែនជ័យ រាជធានីភ្នំពេញ បានផ្តុំគ្នានៅលើផ្លូវមួយដែលសុទ្ធតែភក់ពីម្សិលមិញ ព្រោះតែបារម្ភខ្លាចអាជ្ញាធរមកបណ្តេញពួកគេជាលើកទីពីរ។
ប្រជា ពលរដ្ឋជាច្រើននៅក្នុងភូមិអណ្តូង មិនទៅធ្វើការងារទេ ហើយប្រសិនបើនរណាចុះមករុះរើផ្ទះគាត់ ពួកគេនឹងត្រៀមខ្លួនរួចជាស្រេចដើម្បីការពារ។
លោក ហម ហូយ អាយុ៣៣ឆ្នាំ និយាយថា៖«យើងនឹងមិនទៅណាទេ។ យើងបារម្ភថា អាជ្ញាធរចុះមកបំផ្លាញផ្ទះយើង ពីព្រោះពេលកំណត់ គឺនៅថ្ងៃនេះ»។
ពលរដ្ឋ១៩គ្រួសារ បានទទួលលិខិតពីអាជ្ញាធរកាលពីសប្តាហ៍មុន ដែលពួកគេបញ្ជាឲ្យគ្រួសារទាំងនោះរុះរើផ្ទះចាកចេញពីទី នេះ ដោយមិនមានសំណងដើម្បីធ្វើផ្លូវ និងលូបង្ហូរទឹក។
អ្នក ភូមិប្រាប់ថា គេត្រូវតែគោរពតាមបញ្ជារបស់អាជ្ញាធរ បើមិនដូច្នោះទេនឹងត្រូវប្រឈមនឹងកម្លាំងមានសមត្ថកិច្ច។
អ្នកភូមិឈ្មោះ នួន ទុម អាយុ៤៣ឆ្នាំ ប្រាប់ថា លិខិតនោះធ្វើឲ្យគាត់មានកង្វល់ខ្លាំងណាស់។
ដូច គ្រួសារ១៨ទៀតដែរ នួន ទុម និងក្រុមគ្រួសារក៏ត្រូវបណ្តេញមកពីសហគមន៍សម្បុកចាប ក្នុងខណ្ឌចំការមន នៅឆ្នាំ២០០៦។ គាត់បន្តថា ខ្ញុំមិនចេញទៅណាទៀតទេ ពីព្រោះថា វាគ្មានកន្លែងណាត្រូវទៅ»។ គាត់បន្តថា៖ «ខ្ញុំដេកមិនលក់ និងមិនទៅធ្វើការពីព្រោះខ្ញុំខ្លាចអាជ្ញាធរនឹងចុះមក បំផ្លាញផ្ទះខ្ញុំ»។
ក្រុមគ្រួសារដែលភ័យខ្លាចនឹងការបណ្តេញ ចេញរស់នៅក្នុងផ្ទះតូចៗ ដែលពួកគេបានសង់បន្ទាប់ពីត្រូវបង្ខំឲ្យមករស់នៅក្នុងភូមិ អណ្តូងនេះ។ អាជ្ញាធរមិនដែលធ្វើតាមការសន្យា ដែលថានឹងផ្តល់កន្លែងល្អប្រសើរជាងមុនទេ។
អ្នកស្រី ទុម ថា ប្តីគាត់និងកូនប្រាំនាក់នៅជាន់ក្រោម ពួកគេនៅបន្ទប់រួមគ្នាតូចចង្អៀត ពេលភ្លៀងម្តងៗ បន្ទប់នោះត្រូវទឹកលិច។
គាត់បន្តថា៖ «យើងបានព្យាយាមរស់នៅឲ្យមានសុភមង្គលនៅទីនេះ បើទោះជាយើងមិនមានម្ហូបអាហារឬប្រាក់កាសគ្រប់គ្រាន់ក៏ដោយ តែឥឡូវគេចង់បណ្តេញយើងចេញពីកន្លែងនេះទៀត»។
ផ្នែកមួយចំនួន នៃភូមិអណ្តូងពេញទៅដោយភក់កាលពីម្សិលមិញ ដោយសារផ្លូវមិនមានការឈូសឆាយត្រឹមត្រូវ និងទឹកភក់ ធ្វើឲ្យរថយន្តធំៗមិនអាចចូលទៅភូមិនេះបានទេ សូម្បីតែដើរដោយថ្មើរជើងក៏ពិបាកដែរ ព្រោះទឹកលិច និងមានសំរាម និងកាកសំណល់ផ្សេងៗពាសពេញ។
មេភូមិអណ្តូង៣ លោក សុខ ឆាម បាននិយាយថា អាជ្ញាធរបានសុំឲ្យអ្នកភូមិទាំងនោះរើផ្ទះចេញ ខណៈដែលអាជ្ញាធរចុះធ្វើការកែលម្អហេដ្ឋារចនាសម្ព័ន្ធ។
លោក ថា៖ «យើងមិនបណ្តេញពួកគេរហូតទេ។ យើងគ្រាន់តែឲ្យគាត់ចេញមួយរយៈ ដោយសារយើងត្រូវការធ្វើលូ ដើម្បីកុំឲ្យទឹកជន់លិចកន្លែងពួកគេរស់នៅ។ មិនគួរភ័យខ្លាចទេ ពីព្រោះយើងនឹងឲ្យគាត់មកវិញ និងរស់នៅកន្លែងដដែលបន្ទាប់ពីដាក់លូទឹករួច»។
ប៉ុន្តែ អ្នកភូមិ បូ សុផាន អាយុ៣៦ឆ្នាំ ប្រាប់ថា អាជ្ញាធរសង្កាត់ហៅគ្រួសារទាំងអស់ទៅប្រជុំពីថ្ងៃអង្គារ ដែលនិយាយកាន់តែពិបាកយល់ថែមទៀត។ គាត់ថា ៖ «ពួកគេប្រាប់យើងថា វាស្រេចតែយើងថាតើចង់ចេញឬមិនចង់ ខ្ញុំមិនដឹងថាតើពួកគេចង់បានអ្វីនោះទេ»។
លោកបន្តថា នោះហើយជាមូលហេតុដែលអ្នកភូមិនៅតែចាំយាមការពារផ្ទះរបស់ ខ្លួន ត្រៀមខ្លួនទប់ទល់នឹងនគរបាលឬមន្រ្តីដទៃទៀតដែលអាចមកបំផ្លាញ ផ្ទះរបស់ពួកគេ។
លោក សុផាន បន្តឲ្យទៀតថា៖ «តើយើងនឹងទៅរស់នៅកន្លែងណាទៅ? ពួកគេមិនបានបង្ហាញយើង ឬក៏ប្រាប់ពួកយើងអំពីទី កន្លែងដែលយើងត្រូវទៅស្នាក់នៅបណ្តោះអាសន្នទេ ថ្ងៃកំណត់ក៏បានមកដល់»៕ PS
