The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​ស្រឡាញ់​បរិស្ថាន​អំពាវនាវ​ឲ្យ​រដ្ឋាភិបាល​ទប់​ស្កាត់​ការ​បំផ្លាញ​ព្រៃ

អ្នក​ស្រឡាញ់​បរិស្ថាន​អំពាវនាវ​ឲ្យ​រដ្ឋាភិបាល​ទប់​ស្កាត់​ការ​បំផ្លាញ​ព្រៃ

អ្នក​ស្រឡាញ់​បរិស្ថាន​​ ​ក្នុង​ទិវា​បរិស្ថាន​កាល​ពី​ម្សិល​​​មិញ​។
អ្នក​ស្រឡាញ់​បរិស្ថាន​​ ​ក្នុង​ទិវា​បរិស្ថាន​កាល​ពី​ម្សិល​​​មិញ​។ ហេង ជីវ័ន

អ្នក​ស្រឡាញ់​បរិស្ថាន​អំពាវនាវ​ឲ្យ​រដ្ឋាភិបាល​ទប់​ស្កាត់​ការ​បំផ្លាញ​ព្រៃ

ភ្នំពេញៈ ក្រុម​អ្នក​ស្រឡាញ់​បរិស្ថាន​ប្រមាណ​ជាង ២០០ នាក់​បាន​ប្រមូល​ផ្តុំ​គ្នា​ប្រារព្ធ​ទិវា​បរិស្ថាន​ពិភពលោក​កាល​ពី​ម្សិលមិញ​ដោយ​ស្នើ​ឲ្យ​រដ្ឋាភិបាល​និង​តំណាង​រាស្ត្រ​ជាប់​ឆ្នោត​ពិនិត្យ​ចំពោះ​ការ​អនុវត្ត​ច្បាប់ និង​ទប់​ស្កាត់​ការ​កាប់​បំផ្លាញ​ព្រៃឈើ និង​ធនធាន​ធម្មជាតិ​ដែល​កំពុង​កើត​ឡើង​យ៉ាង​អនាធិបតេយ្យ។

អ្នក​គាំទ្រ​បរិស្ថាន​វ័យ​ក្មេង​រួម​ទាំង​ព្រះសង្ឃ មន្ត្រី​សិទ្ធិ​មនុស្ស និង​សកម្មជន​ដីធ្លី​មួយ​ចំនួន​ត្រូវ​បាន​អាជ្ញាធរ​រារាំង​មិន​ឲ្យ​ដង្ហែ​ជា​ក្បួន​ក្នុង​ទិវា​នេះ​ទេ ប៉ុន្តែ​ពួក​គេ​អាច​ជួប​ជុំ​គ្នា​បាន​នៅ​ក្នុង​តំបន់​ដែល​ត្រូវ​បាន​កំណត់​គឺ​នៅ​មុខ​ក្រសួង​ទំនាក់​ទំនង​ជាមួយ​រដ្ឋសភា ព្រឹទ្ធសភា។

លោក ទឹម ម៉ាឡៃ ប្រធាន​បណ្តាញ​យុវជន​កម្ពុជា​បាន​ថ្លែង​ថា ការ​ជួប​ជុំ​អាច​ធ្វើ​ទៅ​បាន​តែ​នៅ​ក្នុង​ចន្លោះ​ផ្លូវ​ប្រមាណ​ជា ៣០០ ម៉ែត្រ​តែ​ប៉ុណ្ណោះ ប៉ុន្តែ​លោក​នឹង​ចាត់​តំណាង​ចំនួន ១០ នាក់​ដើម្បី​នាំ​យក​ញត្តិ​ទៅ​ដាក់​តាម​ស្ថាប័ន​ចំនួន ៤។

លោក​ថ្លែង​ថា៖ «យើង​នឹង​យក​ញត្តិ​ទៅ​ដាក់​នៅ​ក្រសួង​បរិស្ថាន ក្រសួង​កសិកម្ម ស្ថានទូត​ចិន និង​ស្ថានទូត វៀតណាម។ យើង​ដាក់​ទៅ​ស្ថាប័ន​ទាំង​នេះ​ដោយ​សារ​តែ​ពួក​គេ​មាន​ការ​ពាក់​ព័ន្ធ ជា​ពិសេស​គឺ ប្រទេស​ចិន និង​ប្រទេស​វៀតណាម ដែល​ប្រទេស​ទាំង​ពីរ​នេះ​មាន​ការ​វិនិយោគ​ច្រើន​ជាង​គេ​នៅ​ក្នុង ប្រទេស​កម្ពុជា ហើយ​ដែល​មាន​ការ​ប៉ះ​ពាល់​ច្រើន​ជាង​គេ​ដូច​ជា ព្រៃ​ឈើ សត្វ​ព្រៃ រ៉ែ​ជាដើម»។

យុវជន ស៊ុន ចាន់ថន អាយុ ២៤​ឆ្នាំ ដែល​បាន​គូរ​រូប​ដើម​ឈើ​នៅ​លើ​មុខ​និយាយ​ថា៖ «រូប​នៅ​លើ​មុខ​របស់​ខ្ញុំ​នេះ គឺ​រូប​ដើម​ត្រល់​ដែល​ខ្ញុំ​ចង់​បង្ហាញ​ថា ដើម​នេះ ជិត​ផុត​ពូជ​ហើយ​ដូច​នេះ​យើង​ទាំង​អស់​គ្នា គួរ​តែ​នាំ​គ្នា​ចូល​រួម​ការពារ និង​ដាំ​ដើម​ត្រល់​នេះ​ឡើង​វិញ»។

លោក ស៊ុន ចាន់ថន បាន​ស្នើ​ឲ្យ​រដ្ឋាភិបាល​ត្រូវ​សហការ​ជាមួយ​នឹង​សហគមន៍ និង​អង្គការ​នានា​ដែល​ធ្វើ​ការ​ទាក់​ទង​នឹង​ព្រៃឈើ ធនធាន​ធម្មជាតិ​ដោយ​ជំរុញ និង​លើក​ទឹក​ចិត្ត​ដល់​ពួកគេ​នៅ​ពេល​ដែល​ពួក​គេ​ធ្វើ​សកម្មភាព​ទប់​ស្កាត់​ឬ​ផ្តល់​ព័ត៌មាន​ទាក់​ទង​នឹង​ការ​កាប់​បំផ្លាញ​ព្រៃឈើ។

យោង​តាម​សេចក្តី​ថ្លែង​ការណ៍​រួម​បាន​ឲ្យ​ដឹង​ថា ការ​បាត់​បង់​ធនធាន​ធម្មជាតិ និង​ព្រៃឈើ​បាន​ផ្តល់​ផល​វិបាក​ជា​អវិជ្ជមាន​ដល់​ការ​ប្រែ​ប្រួល​អាកាសធាតុ​ដូច​ជា កំណើន​សីតុណ្ហភាព​ខ្ពស់ ការ​ផ្លាស់​ប្តូរ​របប​ទឹក​ភ្លៀង ទឹក​ជំនន់ ការ​បាត់បង់​នូវ​ប្រព័ន្ធ​ជីវចម្រុះ​ទាំង​ក្នុង​ទឹក និង​លើ​ដី​កាន់​តែ​ធ្ងន់​ធ្ងរ​ទៅៗ​នៅ​ប៉ុន្មាន​ឆ្នាំ​ចុង​ក្រោយ​នេះ។

សេចក្តី​ថ្លែង​ការណ៍​បន្ត​ថា៖ «ប្រសិន​បើ​រាជ​រដ្ឋាភិបាល ក្រសួង​ពាក់​ព័ន្ធ និង​ស្ថាប័ន​តំណាង​រាស្រ្ត​មិន​យក​ចិត្ត​ទុក​ដាក់ និង​ធ្វើ​ការ​ដោះស្រាយ​បញ្ហា​ការ​កាប់​បំផ្លាញ​ព្រៃឈើ​នេះ​ឲ្យ​ទាន់​ពេល​វេលា​ប្រកប​ដោយ​ប្រសិទ្ធភាព​ទេ ព្រៃឈើ និង​ធនធាន​ធម្មជាតិ​ដ៏​មាន​តម្លៃ​របស់ កម្ពុជា នឹង​ត្រូវ​វិនាស ហើយ​បាន​ជះ​ឥទ្ធិពល​ដល់​ជីវភាព​រស់​នៅ​របស់​ប្រជាជន​នៅ​តំបន់​ជនបទ និង​បរិស្ថាន​កាន់​តែ​ធ្ងន់ធ្ងរ​ទៅៗ»។

ក្រុម​បណ្តាញ​យុវជន​ទាំង​នោះ បាន​ស្នើ​ឲ្យ​រដ្ឋាភិបាល​ធ្វើ​ការ​ត្រួត​ពិនិត្យ​ទៅ​លើ​ក្រុមហ៊ុន​ដី​សម្បទាន​សេដ្ឋកិច្ច សម្បទាន​រ៉ែ នៅ​តំបន់​ព្រៃឡង់ ជំរុញ​ឲ្យ​រាជ​រដ្ឋាភិបាល​បញ្ឈប់​រាល់​បទ​ល្មើស​ព្រៃឈើ​ដែល​កំពុង​កើត​មាន លុប​គម្រោង​សាង​សង់​ទំនប់​វារី​អគ្គិសនី​ស្ទឹង​ជាយ​អារែង និង​ទំនប់​សេសាន​ក្រោម ២ និង​បញ្ឈប់​ការ​គំរាម​កំហែង​គ្រប់​រូបភាព​លើ​អ្នក​ការពារ​ព្រៃឈើ​ការពារ​ធនធាន​ធម្មជាតិ និង​បរិស្ថាន។

លោក​នាយក​រដ្ឋ​មន្ត្រី ហ៊ុន សែន បាន​ចេញ​សារ​លិខិត​មួយ​ក្នុង​ឱកាស​ប្រារព្ធ​ទិវា​បរិស្ថាន​ជាតិ និង​ទិវា​បរិស្ថាន​ពិភពលោក​ដោយ​លោក​បាន​ចាត់​ទុក​កិច្ច​ការពារ​បរិស្ថាន ជា​វិធានការ​ដ៏​ចាំបាច់​បំផុត​ដើម្បី​ធានា​ចីរភាព នៃ​ការ​អភិវឌ្ឍ​សេដ្ឋកិច្ច​សង្គម ដោយ​ប្តេជ្ញា​ធ្វើ​ការ​ថែរក្សា​ព្រៃឈើ​ឲ្យ​បាន​គង់​នៅ ៦០ ភាគរយ​នៃ​ផ្ទៃ​ដី​ប្រទេស​កម្ពុជា៕

អត្ថបទគួរចាប់អារម្មណ៍