កំពង់ស្ពឺៈ មនុស្ស៣៨នាក់នៅស្រុក បសេដ្ឋ ខេត្តកំពង់ស្ពឺ បានរងការពុល បន្ទាប់ពីបានហូបត្រីសមុទ្រ(ត្រីកន្ទុយរឹង)សម្រាប់អាហារ ថ្ងៃត្រង់រួមគ្នានៅពេលទៅស្ទូងស្រូវក្នុងភូមិ ហើយក្នុងនេះមាន ៥នាក់មានអាការធ្ងន់ធ្ងរ ប៉ុន្តែត្រូវបានមន្រ្តីមណ្ឌលសុខភាពស្រុក ចុះទៅជួយទាន់ពេល កាលពីថ្ងៃសៅរ៍។
លោក សម ចន្ថា អធិការនគរបាលស្រុក បសេដ្ឋ បានឲ្យដឹងថា កសិករជាង៣០នាក់ បានពុលនៅពេលនាំគ្នាហូបបាយថ្ងៃត្រង់ ជាមួយនឹងត្រីខសមុទ្រ រួមគ្នានៅឯវាលស្រែ។ លោកបញ្ជាក់ថា៖« ម្ចាស់ស្រែ បានជួលជនរងគ្រោះទៅស្ទូង ហើយពួកគេនាំគ្នាហូបបាយថ្ងៃត្រង់ជាមួយគ្នាជាមួយខត្រី សមុទ្រជាម្ហូប។ មួយសន្ទុះក្រោយពួកគេក៏ចាប់ផ្តើមវិលមុខ ឈឺក្បាល និងក្អួត»។
លោកបន្តថា នេះជាលើកទី១ សម្រាប់អ្នកភូមិដែលពុលត្រីសមុទ្រ ព្រោះតែការធ្វេសប្រហែស និងមិនគិតពីអនាម័យ។
លោក សម ចន្ថា បានប្រាប់ថា ៖ «អ្នកភូមិបានហូបត្រីខនោះ ដែលអ្នកខ្លះស្តាយហូបទាំងពោះត្រីដែលមានជាប់អាចម៍វាផងដែរ ទើបបានបណ្តាលឲ្យពុល ដែលការពុលនេះវាអាចគួបផ្សំនិងសុខភាពគាត់ខ្សោយផង។ ដោយសារតែអ្នកខ្លះមិនបានហូបអាហារពេលព្រឹកមុនចុះមកធ្វើការ ងារទេ រហូតដល់ថ្ងៃត្រង់។ ខ្ញុំក៏បានចុះទៅមើល ហើយបានពន្យល់ប្រាប់ឲ្យពួកគាត់កែទម្លាប់ និងគិតពីអនាម័យម្ហូបអាហារឲ្យបានល្អ»។
លោក សម ចន្ថា បន្តឲ្យដឹងថា ក្រុមមន្រ្តីសុខាភិបាលមកពីមណ្ឌលសុខភាពស្រុក បានចុះទៅចាក់ថ្នាំសង្គ្រោះឲ្យពួកគាត់ហើយស្ថានភាពជំងឺរបស់ ពួកគាត់ឥឡូវគ្រាន់បើហើយ ហើយក៏បានត្រឡប់ទៅធ្វើការវិញដូចធម្មតាដែរ។
ក្រុមអ្នករងគ្រោះ និងម្ចាស់ស្រែដែលចម្អិនអាហារនាំឲ្យពុលនេះមិនអាចទាក់ទងបានទេកាលពីម្សិលមិញ៕ NR
