ភ្នំពេញៈ រដ្ឋមន្ត្រីក្រសួងការបរទេសលោក S. Jaishankar និងរដ្ឋមន្ត្រីក្រសួងអភិវឌ្ឍន៍ធនធានមនុស្សលោក Ramesh Pokhriyal'' Nishank'' នៃប្រទេស ឥណ្ឌា បានសម្ពោធដាក់ឱ្យដំណើរការជាផ្លូវការនូវកម្មវិធីផ្តល់អាហារូបករណ៍ថ្នាក់បណ្ឌិត (PhD Fellowships) ចំនួន ១០០០ កន្លែងដល់និស្សិតមកពីប្រទេសអាស៊ានកាលពីថ្ងៃចន្ទឱ្យចូលសិក្សានៅវិទ្យាស្ថានបច្ចេកវិទ្យាឥណ្ឌា (IIT)។
សេចក្តីប្រកាសព័ត៌មានក្រសួងការបរទេសឥណ្ឌាចេញកាលពីថ្ងៃចន្ទបញ្ជាក់ថា IIT Delhi ត្រូវបានចាត់តាំងដោយក្រសួងអភិវឌ្ឍន៍ធនធានមនុស្ស តំណាងឱ្យ IIT ដើម្បីដើរតួជាអ្នកសម្របសម្រួល កម្មវិធីអាហារូបករណ៍នេះ។ IIT បានបង្កើតវិបផតថលមួយ (http://asean.iitd.ac.in) ដើម្បីគ្រប់គ្រងដំណើរការដាក់ពាក្យសុំអាហារូបករណ៍ និងទទួលពាក្យចូលរៀន។ និស្សិតអាស៊ាន អាចចូលវិបផតថលនេះ ដើម្បីដាក់ពាក្យសុំអាហារូបករណ៍ថ្នាក់បណ្ឌិត ដើម្បីជ្រើសរើស IIT ផ្សេងៗគ្នាសម្រាប់សិក្សា។
សេចក្តីប្រកាសព័ត៌មានបន្តថា៖ «និស្សិតអាស៊ានជំនាន់ដំបូង នឹងត្រូវចូលរៀននៅខែមករាឆ្នាំ ២០២០។ ក្រសួងអភិវឌ្ឍន៍ធនធានមនុស្សនឹងផ្តល់អាហារូបករណ៍ដល់និស្សិតអាស៊ានដូចគ្នាទៅនឹងនិស្សិតថ្នាក់បណ្ឌិតឥណ្ឌា ព្រមទាំងផ្តល់ប្រាក់ឧបត្ថម្ភសម្រាប់ការស្រាវជ្រាវប្រចាំឆ្នាំ ។ IIT នឹងផ្តល់ប្រាក់អាហារូបករណ៍បន្តិចបន្តួចសម្រាប់ចំណាយលើការរស់នៅរបស់និស្សិតដែលត្រូវបានជ្រើសរើសពីធនធានថវិកាផ្ទាល់ខ្លួនរបស់ពួកគេ»។
បើតាមសេចក្តីប្រកាសព័ត៌មានកម្មវិធីអាហារូបករណ៍នេះចំណាយថវិកាសរុបប្រមាណ ៤៥ លានដុល្លារអាមេរិកដែលជាគំនិតផ្តួចផ្តើមអភិវឌ្ឍន៍សមត្ថភាពធំបំផុតតែមួយគត់របស់ឥណ្ឌាក្នុងភាពជាដៃគូជាមួយអាស៊ាន។
លោក រស់ សុវាចា អ្នកនាំពាក្យក្រសួងអប់រំបានប្រាប់ភ្នំពេញប៉ុស្តិ៍កាលពីថ្ងៃពុធថាជាទូទៅក្រសួងអប់រំធ្វើការផ្សព្វផ្សាយជាសាធារណ:អំពីឱកាសអាហារូបករណ៍ជាតិ តំបន់ និង អន្តរជាតិ ដល់សិស្ស និងនិស្សិតតាមយន្តការដែលមានស្រាប់របស់នាយកដ្ឋានទំនាក់ទំនងវប្បធម៌ និងអាហារូបករណ៍។
លោកបញ្ជាក់ថា៖ «[ក្រសួង] សហការជាមួយគ្រប់គ្រឹះស្ថានសិក្សាពាក់ព័ន្ធ ជាពិសេសគ្រឹះស្ថានឧត្តមសិក្សា [និងផ្សព្វផ្សាយ] តាមបណ្តាញសង្គម Facebook ផ្លូវការរបស់ក្រសួងអប់រំ យុវជន និងកីឡា និងក្រសួងស្ថាប័នពាក់ព័ន្ធ»។
ក្រសួងអប់រំក៏បានផ្សព្វផ្សាយដំណឹងអាហារូបករណ៍នេះ តាមហ្វេសប៊ុកផ្លូវការរបស់ក្រសួងផងដែរកាលពីថ្ងៃពុធ។ ត្រឹមរយៈប្រមាណ ២ ម៉ោងមានអ្នកចែករំលែកព័ត៌មាន (Share) ចំនួន ២៣១ ដង និងមានអ្នកចូលមកបញ្ចេញមតិ (Comment) ចំនួន ២៥ មតិ។
លោក ថ្លាង ស៊ីខេង និស្សិតបញ្ចប់ការសិក្សាថ្នាក់អនុបណ្ឌិតគ្រប់គ្រងពាណិជ្ជកម្ម (MBA) ពីប្រទេសឥណ្ឌានៅឆ្នាំ ២០០៩ បានប្រាប់ភ្នំពេញប៉ុស្តិ៍ កាលថ្ងៃពុធថា ខណៈដែលឥណ្ឌាប្រកាសផ្តល់អាហារូបករណ៍នេះ វាជាឱកាសរបស់និស្សិតកម្ពុជាក្នុងការចូលរួមក្នុងកម្មវិធីនេះនៅក្នុងសាលាដ៏ល្បីមួយរបស់ឥណ្ឌា។ ការអភិវឌ្ឍធនធានមនុស្សគឺជារឿងចាំបាច់ និងចម្បង ទោះបីជាផ្នែកអ្វីក៏ដោយឱ្យតែនិស្សិតកម្ពុជាអាចធ្វើទៅរួច។ វាគឺជាការល្អបំផុត។
លោកថ្លែងថា៖ «សម្រាប់ ឥណ្ឌា និងខ្មែរ ឥណ្ឌាជាមិត្តរបស់ខ្មែរយូរហើយ។ បើគេបើកទូលាយកាន់តែល្អហើយ។ លើកហ្នឹងឃើញបើកសម្រាប់អាស៊ាន។ អ៊ីចឹងអាចថាជាគោលការណ៍ថ្មីរបស់ឥណ្ឌា។ អាចថា គាត់សម្លឹងចាប់យកអាស៊ានធ្វើជាដៃគូវែងឆ្ងាយ»។
កម្មវិធីអាហារូបករណ៍នេះចាប់ផ្តើមទទួលពាក្យចាប់ពីថ្ងៃទី ១៧ ខែកញ្ញាដល់ថ្ងៃទី ៣១ ខែតុលាខាងមុខនេះ។ ការសិក្សាមានរយៈពេល ៥ ឆ្នាំសម្រាប់ថ្នាក់បណ្ឌិតនេះ។
កាលពីខែមករា ឆ្នាំ ២០១៨ នាយករដ្ឋមន្ត្រីឥណ្ឌាលោក Shri Narendra Modi ក៏បានថ្លែងនៅក្នុងកិច្ចប្រជុំកំពូលខួបលើកទី ២៥ នៃអាស៊ាន ឥណ្ឌានៅទីក្រុងញូវដែលី ប្រទេសឥណ្ឌាអំពីការផ្តល់អាហារូបករណ៍ថ្នាក់បណ្ឌិតរហូតដល់ ១០០០ សម្រាប់និស្សិតអាស៊ាននៅ IIT ដ៏ល្បីនេះផងដែរ។ នេះបើយោងតាមសេចក្តីប្រកាសព័ត៌មាន។ ចំពោះព័ត៌មានបន្ថែមសម្រាប់អាហារូបករណ៍នេះ សូមចូលទៅកាន់គេហទំព័រ៖ http://asean.iitd.ac.in៕