The Phnom Penh Post Search

Search form




Logo of Phnom Penh Post newspaper Phnom Penh Post - ឥណ្ឌា​ផ្តល់​កម្ចី​$៥៧​លាន​សង់​ធារា​សាស្ត្រ

ឥណ្ឌា​ផ្តល់​កម្ចី​$៥៧​លាន​សង់​ធារា​សាស្ត្រ

ឥណ្ឌា​ផ្តល់​កម្ចី​$៥៧​លាន​សង់​ធារា​សាស្ត្រ

121224_05
កសិករខេត្តកណ្តាលកាប់ស្រែស្ទូងស្រូវកន្លងមក កសិករត្រូវការទឹកជាចាំបាច់ គឹមឡុង

ភ្នំពេញៈ ឥណ្ឌា​បាន​យល់​ព្រម​ផ្ដល់​ប្រាក់​កម្ចី​ចំនួន​៥៧​លាន​ដុល្លារ​អាមេរិក ដល់​កម្ពុជា សម្រាប់​យក​មក​អនុវត្ត​គម្រោង​អភិវឌ្ឍន៍​ចំនួន​ពីរ គឺ​គម្រោង​តភ្ជាប់​បណ្តាញ​អគ្គិសនី និង​គម្រោង​សាង​សង់​ប្រព័ន្ធ​ធារាសាស្ត្រ។ នេះ​បើ​តាម លោក ហោ ណាំហុង រដ្ឋ​មន្ត្រី​ក្រសួង​ការ​បរទេស។

ក្នុង​ដំណើរ​មាតុ​ភូមិ​និវត្តន៍ ​ពី​ប្រទេស​ឥណ្ឌា​របស់​មេដឹក​នាំ​អាស៊ាន កាល​ពី​ថ្ងៃ​សុក្រ​សប្ដាហ៍​មុន នៅ​ឯ​ព្រលាន​យន្ត​ហោះ​អន្តរជាតិ​ភ្នំពេញ លោក​ ហោ ណាំហុង បាន​ថ្លែង​ប្រាប់​អ្នក​សារ​ព័ត៌មាន​ថា ក្នុង​ជំនួប​រវាង​លោក​នាយក​រដ្ឋ​មន្ត្រី ហ៊ុន សែន ដែល​បច្ចុប្បន្ន​ជា​ប្រធាន​អាស៊ាន និង​នាយក​រដ្ឋ​មន្ត្រី​ឥណ្ឌា លោក ម៉ាន់ ម៉ូហាន់ស៊ីង ឥណ្ឌា​បាន​យល់​ព្រម​ផ្ដល់​ប្រាក់​កម្ចី ឥណ្ឌទាន​ដល់​កម្ពុជា​៥៧​លាន​ដុល្លារ សម្រាប់​គម្រោង​ពីរ គឺគ​ម្រោង​តបណ្តាញ​អគ្គិសនី ពី​ខេត្ត​ក្រចេះ ទៅ​ស្ទឹង​ត្រែង ចំនួន ២០​លាន​ដុល្លារ និង​គម្រោង​សាង​សង់​ប្រព័ន្ធ​ធារា​សាស្ត្រ​នៅ​ស្ទឹង​ស្វា​ស្លាប់ ក្នុង​ខេត្ត​កំពង់​ស្ពឺ ចំនួន​៣៧​លាន​ដុល្លារ។ លោក​ថ្លែង​ថា​៖«សម្តេច​តេ​ជោ​ ក៏​បាន​ជំរុញ​ឲ្យ​ឥណ្ឌា វិនិយោគ​ច្រើន​ថែម​ទៀត​ លើ​ការ​ហោះ​ហើរ​ត្រង់​ ពី​ឥណ្ឌា មក​ខេត្ត​សៀម​រាប ដើម្បី​ផ្លាស់​ប្តូរ​ទេសចរណ៍ និង​ដើម្បី​ឲ្យ​ប្រជាជន​ប្រទេស​ទាំង​ពីរ​កម្ពុជា និង​ឥណ្ឌា បាន​ស្គាល់​គ្នា​កាន់​តែ​ជិតស្និទ្ធ​ថែម​ទៀត»។

បច្ចុប្បន្ន ឥណ្ឌា​បាន​ជួយ​ជួស​ជុល​ប្រាសាទ​តាព្រហ្ម​នូវ​ទឹក​ប្រាក់​ចំនួន​៥លាន​ ដុល្លារ ហើយ​នៅ​ពេល​អនាគត ឥណ្ឌា​នឹង​បន្ត​ជួយ​ជួស​ជុល​ប្រាសាទ​ផ្សេង​ទៀត។ លោក​បាន​បន្ត​ថា​៖«រាល់​ពេល​ដែល​សម្តេច ធ្វើ​ដំណើរ​ទស្សន​កិច្ច​ម្តងៗ តែង​តែ​ទទួល​បាន​នូវ​ផល​ប្រយោជន៍​ជូន​ដល់​ប្រជា​ពលរដ្ឋ​កម្ពុជា ក្នុង​ក្រប​ខ័ណ្ឌ​ទេ្វ​ភាគី និង​ក្នុង​ក្របខ័ណ្ឌ​តំបន់​»។

នៅ​ក្នុង​ ជំនួប​កិច្ច​ប្រជុំ​កំពូល​លើក​ទី​ ២០ អាស៊ាន-ឥណ្ឌា លោក​ ហ៊ុន សែន បាន​អំពាវនាវ​ដល់​ឥណ្ឌា​ឲ្យ​ឆាប់​បន្ត​ធ្វើ​ផ្លូវ​ហាយវេ ដែល​មាន​ស្រាប់​នៅ​ឥណ្ឌា​ចូល​មក​មីយ៉ាន់ម៉ា ថៃ និង​បន្ត​មក​ឡាវ និង​កម្ពុជា ដែល​ការ​សាង​សង់​ផ្លូវ​នេះ​ មាន​ក្នុង​ផែន​ការ​របស់​ឥណ្ឌា​រួច​ហើយ និង​ការ​សាងសង់​ផ្លូវ​ហាយវេ​ថ្មី​មួយ​ទៀត​ បន្ត​ពី​ឥណ្ឌា​មក​មីយ៉ាន់ម៉ា  ឡាវ និង​មក​កម្ពុជា។ ដូច្នេះ​មាន​ផ្លូវ​ហាយវេ​ចំនួន​២​ដែល​ឥណ្ឌា ត្រូវ​ធ្វើ​ ដើម្បី​ជា​ផល​ប្រយោជន៍​ហេដ្ឋា​រចនា​សម្ព័ន្ធ​ដល់​ប្រទេស​កម្ពុជា​ផង​ដែរ។

លោក ម៉ាន់ ម៉ូហាន់ស៊ីង បាន​បន្ត​ការ​គាំទ្រ​នូវ​តួនាទី​ស្នូល​របស់​អាស៊ាន​ ក្នុង​វេទិកា​តំបន់​អាស៊ាន និង​អាស៊ី​ខាង​កើត ដោយ​ធ្វើ​យ៉ាង​ណា​ឲ្យ​ទំហំ​ពាណិជ្ជកម្ម​អាស៊ាន-ឥណ្ឌា​ ឈាន​ដល់​១០០​ពាន់​លាន​ដុល្លារ​ នៅ​ឆ្នាំ ២០១៥ ដែល​ទំហំ​ទឹក​ប្រាក់​ពាណិជ្ជកម្ម​អាស៊ាន-ឥណ្ឌា​មាន​ទំហំ​តែ​ជាង​៧០​ពាន់​លាន​ដុល្លារ​អាមេរិក​ប៉ុណ្ណោះ​នៅ​ក្នុង​ឆ្នាំ​២០១១ និង​ជំរុញ​ឲ្យ​បាន​ដល់ ២០០ ពាន់​លាន​ដុល្លារ​អាមេរិក​នៅ​ត្រឹម​ឆ្នាំ ២០២២។

លោក​ឧប​នាយក​រដ្ឋ​មន្ត្រី ហោ ណាំហុង បាន​មាន​ប្រសាសន៍​ឲ្យ​ដឹង​ទៀត​ថា៖«អង្គ​ប្រជុំ​ក៏​បាន​ស្វាគមន៍ ការ​ចុះ​ហត្ថលេខា​លើ​កិច្ច​ព្រម​ព្រៀង​វិនិយោគ ​ពាណិជ្ជកម្ម រវាង អាស៊ាន-ឥណ្ឌា...ពីព្រោះ​វា​មាន​សារៈសំខាន់​ណាស់​ ដែល​ជំរុញ​ឲ្យ​ឥណ្ឌា​ ធ្វើ​ការ​វិនិយោគ​ច្រើន​ថែម​ទៀត​ នៅ​ក្នុង​បណ្តា​ប្រទេស​អាស៊ាន»៕

អត្ថបទគួរចាប់អារម្មណ៍