ភ្នំពេញៈ រដ្ឋាភិបាលនៃសាធារណរដ្ឋឥណ្ឌូនេស៊ី បានយល់ព្រមជាមួយរាជរដ្ឋាភិបាលកម្ពុជា ក្នុងការបញ្ជូនអ្នកសង្កេតការណ៍ ដើម្បីចូលរួមសង្កេតការបោះឆ្នោតជ្រើសតាំងតំណាងរាស្ត្រនៅកម្ពុជា ដែលគ្រោងនឹងរៀបចំនៅថ្ងៃទី ២៩ ខែក្កដា ឆ្នាំ២០១៨នេះ។ យោងតាមសេចក្ដីប្រកាសព័ត៌មានរបស់ក្រសួងការបរទេសចេញផ្សាយនៅថ្ងៃនេះ ក្រោយពីដំណើរទស្សនកិច្ចផ្លូវការ៣ថ្ងៃរបស់ លោក ប្រាក់ សុខុន រដ្ឋមន្ត្រីក្រសួងការបរទេសទៅឥណ្ឌូនេស៊ីពីថ្ងៃទី១-៣ ខែកុម្ភះ។
សេចក្ដីប្រកាសព័ត៌មាននេះបានឲ្យដឹងថា៖ «ភាគីទាំងពីរ ក៍បានផ្លាស់ប្ដូរទស្សនៈគ្នាស្ដីពីការប្រែប្រួលនៃសភាពការណ៍តំបន់ និង អន្តរជាតិដោយផ្ដោតលើការយកចិត្តទុកដាក់រួម ក្នុងការរួមចំណែកដល់សន្តិភាព និង វិបុលភាព នៅក្នុងតំបន់ និង ពិភពលោក។
ក្រៅពីនេះ ភាគីឥណ្ឌូនេស៊ីក៍បានឯកភាពតាមការអញ្ជើញរបស់ភាគីកម្ពុជា បញ្ជូនអ្នកសង្កេតការណ៍បោះឆ្នោត ឥណ្ឌូនេស៊ី ដើម្បីចូលរួមសង្កេតការណ៍ ការបោះឆ្នោតសកល នាខែ កក្កដា ឆ្នាំ ២០១៨ នៅកម្ពុជា នាពេលខាងមុខនេះ»។
គណបក្សសង្គ្រោះជាតិ ជាគណបក្សប្រឆាំង ដែលទទួលបានសម្លេងគាំទ្រច្រើនជាងគេនៅក្នុងចំណោមគណបក្សប្រឆាំងដ៍ទៃទៀត ដែលចូលរួមបោះឆ្នោតសកល ឆ្នាំ ២០១៣ ត្រូវបានតុលាការកំពូលសម្រេចរំលាយចោលដោយជាប់ចោទពីអំពើរក្បត់ជាតិនិងមន្ត្រីជាន់ខ្ពស់បក្សជាង ១០០ នាក់ត្រូវបានហាមឃាត់មិនឲ្យធ្វើនយោបាយប្រាំឆ្នាំ។ អតីត ប្រធានគណបក្សនេះ កំពុងជាប់ឃុំរងចាំការកាត់សេចក្ដីដោយតុលាការ គណបក្សនេះ នឹងបាត់សិទ្ធិចូលរួមការបោះឆ្នោតខាងមុខនេះ៕