.jpg)
មន្ត្រីយោធាដែលឈូសឆាយដីព្រៃរដ្ឋជិត ៧០ ហិកតា។ រូបថត ហ្វ្រេសញូវ
ស្ទឹងត្រែងៈ តុលាការខេត្តស្ទឹងត្រែងបានសម្រេចចោទប្រកាន់មន្ត្រីយោធាឋានៈឧត្តមសេនីយ៍ទោម្នាក់ឈ្មោះ ចាន់ សំអាត តាមបញ្ញត្ដិនៃច្បាប់ព្រៃឈើពាក់ព័ន្ធនឹងការឈូសឆាយដីព្រៃរដ្ឋជិត ៧០ ហិកតា ប៉ុន្ដែតុលាការបានសម្រេចអនុញ្ញាតឲ្យជនជាប់ចោទរូបនេះនៅក្រៅឃុំក្រោមការត្រួតពិនិត្យរបស់តុលាការ ដោយសារជនជាប់ចោទមានជំងឺធ្ងន់ធ្ងរ។
លោក យ៉ា ណារិន ប្រធានសាលាដំបូងខេត្តស្ទឹងត្រែងបានថ្លែងប្រាប់ភ្នំពេញប៉ុស្ដិ៍កាលពីថ្ងៃព្រហស្បតិ៍ម្សិលមិញថា ក្រោយចៅក្រមស៊ើបសួរបានបញ្ចប់ការសាកសួរមន្ត្រីយោធាឈ្មោះ ចាន់ សំអាត រួចកាលពីថ្ងៃពុធទី ២៩ ខែមេសា បានសម្រេចចោទប្រកាន់តាមទោសបញ្ញត្ដិនៃច្បាប់ព្រៃឈើ។ ប៉ុន្ដែតុលាការសម្រេចឲ្យជនជាប់ចោទរូបនេះនៅក្រៅឃុំក្រោមការត្រួតពិនិត្យរបស់តុលាការ។
លោកថ្លែងថា៖ «ការដែលតុលាការយើងសម្រេចឲ្យគាត់នៅក្រៅឃុំ ក្រោមការត្រួតពិនិត្យរបស់តុលាការនេះគឺពាក់ព័ន្ធទៅនឹងបញ្ហាសុខភាពរបស់គាត់។ យើងសម្រេចដោះលែងគាត់ឲ្យនៅក្រៅឃុំកាលពីថ្ងៃទី ២៩ ខែមេសា។ គាត់មានសុខភាពធ្ងន់ធ្ងរដោយសារគាត់វះពោះហើយនិងប្លោកនោម ក្រពះអី គឺនៅក្រៅទាំងអស់។ ដូច្នេះយើងមិនអាចដាក់គាត់នៅក្នុងហ្នឹងបាន (ពន្ធនាគារ) តែដាក់នឹងគឺស្លាប់ហើយ»។
លោក ណារិន បន្តថា៖ «ប៉ុន្ដែកាលពីថ្ងៃទី ២៩ ខែមេសា នោះគឺយើងបានចោទប្រកាន់គាត់ហើយ។ ចោទប្រកាន់គាត់តាមច្បាប់ព្រៃឈើ»។ ប៉ុន្ដែទោះជាយ៉ាងណាលោក ណារិន មិនបានបញ្ជាក់ថា ការចោទប្រកាន់តាមច្បាប់ព្រៃឈើនេះស្ថិតក្នុងមាត្រាណាមួយនោះទេ។
កាលពីថ្ងៃទី ២៣ ខែមេសា សមត្ថកិច្ចចម្រុះខេត្ដស្ទឹងត្រែងក្រោមការបញ្ជារបស់អភិបាលខេត្ដស្ទឹងត្រែងបានឃាត់ខ្លួនលោក ចាន់ សំអាត រួចបញ្ជូនទៅតុលាការពាក់ព័ន្ធនឹងការឈូសឆាយដីព្រៃរបស់រដ្ឋជិត ៧០ ហិកតានៅភូមិស្រឡៅ ឃុំអន្លង់ជ្រៃ ស្រុកថាឡាបរិវ៉ាត់។
លោក ប៊ី វណ្ណី មន្ដ្រីសម្របសម្រួលសមាគមអាដហុកប្រចាំខេត្ដស្ទឹងត្រែង សោកស្ដាយចំពោះការអនុវត្ដនីតិវិធីច្បាប់របស់តុលាការដែលសម្រេចឲ្យជនជាប់ចោទជាមន្ដ្រីស្ថិតនៅក្រៅឃុំបែបនេះ។ លោកថា ការអនុវត្ដបែបនេះ គឺខ្វះភាពយុត្ដិធម៌ចំពោះការអនុវត្ដនីតិវិធីច្បាប់រវាងមន្ដ្រីមានអំណាច និងប្រជាពលរដ្ឋធម្មតា ព្រោះកន្លងមកចំពោះពលរដ្ឋធម្មតាពេលធ្វើខុសគឺតែងតែត្រូវបានឃុំខ្លួន មិនមានការលើកលែងនោះទេ។
លោកបានថ្លែងថា៖ «រឿងនេះបង្ហាញថា ការអនុវត្ដច្បាប់គឺមានភាពធូរស្រាល ចំពោះមន្ដ្រីធំៗដែលប្រព្រឹត្តបទល្មើសគឺយើងឃើញថា តុលាការមិនមានឆន្ទៈក្នុងការអនុវត្ដច្បាប់ឲ្យបានតឹងរ៉ឹង និងមានភាពសុក្រឹតនោះទេ។ ប៉ុន្ដែចំពោះការអនុវត្ដច្បាប់ចំពោះពលរដ្ឋគឺមានការឃុំខ្លួនជាបន្តបន្ទាប់។ ដូច្នេះយើងឃើញថា ការអនុវត្ដច្បាប់នេះគឺមានស្ដង់ដា ២ រវាងមន្ដ្រី និងពលរដ្ឋ»។
លោក វណ្ណី បានទាមទារឲ្យតុលាការមានការអនុវត្តច្បាប់ឲ្យបានស្មើភាពគ្នាទាំងមន្ត្រី និងពលរដ្ឋ។ លោកបន្ដថា ប្រសាសន៍ និងគោលនយោបាយរបស់លោកនាយករដ្ឋមន្ត្រី ហ៊ុន សែន គឺធ្លាប់បានលើកឡើងថា ប្រសិនបើមន្ដ្រីរាជការណាដែលប្រព្រឹត្ដខុសច្បាប់នោះគឺត្រូវអនុវត្ដទៅតាមនីតិវិធីច្បាប់ និងព្រមានដកតំណែងផងដែរ៕
