ភ្នំពេញៈ សាលាឧទ្ធរណ៍បានចេញដីកាកោះហៅលោក ស ម៉ូរ៉ា ប្រធានសហជីពកម្មករចំណីអាហារ និងសេវាកម្មឲ្យចូលខ្លួនដើម្បីសាកសួរទាក់ទងនឹងការធ្វើបាតុកម្មប្រឆាំងក្រុមហ៊ុនស្រាបៀរកម្ពុជាដែលសំណុំរឿងក្តីនេះចុះថ្ងៃទី ៩ ខែមីនា ឆ្នាំ ២០១៨។ ក្រុមហ៊ុនបានប្តឹងឧទ្ធរណ៍ទាមទារសំណងជំងឺចិត្តបន្ទាប់ពីតុលាការខេត្តព្រះសីហនុបានបដិសេធបណ្តឹងប្រឆាំងនឹងលោក ស ម៉ូរ៉ា កាលពីខែកក្កដាក្នុងឆ្នាំនេះ។
យោងតាមដីកាកោះហៅរបស់លោក ងួន អ៊ិម ប្រធានក្រុមប្រឹក្សាជំនុំជម្រះបង្គាប់ដល់ឈ្មោះ ស ម៉ូរ៉ា ឲ្យបង្ហាញខ្លួននៅថ្ងៃទី ៥ ខែកញ្ញា វេលាម៉ោង ៨:៣០ ព្រឹកនៅឯសាលាឧទ្ធរណ៍។
ប្រសិនបើលោក ម៉ូរ៉ា មិនចូលខ្លួននោះតុលាការទទួលស្គាល់ថា សេចក្តីអះអាងអំពីចំណុចសាកសួររបស់ភាគីម្ខាងទៀតជាការពិតបាន។ ដីកានោះបានបញ្ជាក់ថា លោក ស ម៉ូរ៉ា និង ខែម ម៉ៅ គឺជាចុងចម្លើយ ហើយដើមចោទគឺក្រុមហ៊ុនស្រាបៀរកម្ពុជា។
លោក ទូច ថារិទ្ធិ អ្នកនាំពាក្យសាលាឧទ្ធរណ៍បានបញ្ជាក់ថាករណីនេះត្រូវបានប្តឹងដោយក្រុមហ៊ុន។
លោកថ្លែងថា៖ «ផ្អែកលើនីតិវិធីតុលាការយើងក៏នឹងចេញដីការកោះហៅភាគីដើមចោទដែរ»។
ប្រធានសហជីព ២ រូបគឺលោក ស ម៉ូរ៉ា និងលោក ខែមម៉ៅ ត្រូវបានក្រុមហ៊ុនស្រាបៀរកម្ពុជាប្តឹងទាមទារសំណងចំនួន ៦ ម៉ឺនដុល្លារ បន្ទាប់ពីមានកូដកម្មប្រឆាំងក្រុមហ៊ុនកាលពីខែសីហា ឆ្នាំ ២០១៧។ កម្មករប្រហែល ១០០ នាក់បានធ្វើកូដកម្មរយៈពេល ៥ ថ្ងៃដើម្បីប្រឆាំងតវ៉ានឹងការបណ្តេញអ្នកគ្រប់គ្រងឃ្លាំងចេញពីការងារ។
ការសម្រេចរបស់ចៅក្រមខេត្តព្រះសីហនុនៅក្នុងខែមីនាឆ្នាំ ២០១៨ គឺបានទាមទារឲ្យមេដឹកនាំសហជីពមូលដ្ឋានឈ្មោះ ខែម ម៉ៅ សងប្រាក់ចំនួន ៣០០០ ដុល្លារទៅឱ្យក្រុមហ៊ុនស្រាបៀរកម្ពុជាហើយទម្លាក់ការចោទចំពោះលោក ម៉ូរ៉ា។
លោក ស ម៉ូរ៉ា បានអះអាងថាលោកនឹងទៅបង្ហាញខ្លួនតបតាមដីកានោះប្រសិនបើលោកអាចរកមេធាវីការពារក្តីបាន។
លោកថ្លែងថា៖ «គោលបំណងរបស់ខ្ញុំគឺយើងចង់ចូលខ្លួនតាមដីកាកោះហៅ ប៉ុន្តែយើងកំពុងធ្វើទំនាក់ទំនងជាមួយមេធាវី ដូច្នេះខ្ញុំមិនដឹងថា តើខ្ញុំអាចទៅទាន់ពេលវេលា ឬក៏អត់នោះទេ។ ប្រសិនបើយើងមិនអាចស្វែងរកការជួយគាំទ្រពីមេធាវីបានទាន់ពេលវេលាទេ នោះយើងនឹងស្នើលើកទៅពេលក្រោយ»។
លោកបានចាត់ទុកថាពាក្យបណ្តឹងនេះគឺមានគោលបំណងគំរាមកំហែងមិនឱ្យបង្កើតសហជីពនៅក្នុងរោងចក្រ។ លោកថា៖ «វាគ្រាន់តែជាបច្ចេកទេសសម្រាប់ក្រុមហ៊ុនដើម្បីធ្វើការគំរាមកំហែងដល់សហជីពដែលព្យាយាមការពារផលប្រយោជន៍របស់កម្មករប៉ុណ្ណោះ ហើយយើងសង្ឃឹមថាសាលាឧទ្ធរណ៍នឹងទម្លាក់ការចោទប្រកាន់យើងចោល»៕ NS