.jpg)
លោក សេរី កុសល ដែលជាដើមបណ្ដឹងនៃបទបរិហារកេរ្តិ៍។ រូបថត ហ្វេសប៊ុក
ភ្នំពេញៈ សាលាឧទ្ធរណ៍ពីម្សិលមិញបានលើកយកសំណុំរឿងបរិហារកេរ្តិ៍លោក សេរី កុសល អនុប្រធានអាជ្ញាធរជាតិដោះស្រាយទំនាស់ដីធ្លីមកជំនុំជម្រះជាសំណុំរឿងដែលសាលាដំបូងខេត្តឧត្តរមានជ័យសម្រេចឱ្យចុងចោទសងជំងឺចិត្តទៅដើមបណ្ដឹង ៣០ លានរៀល។
បើតាមលោកចៅក្រម ស៊ិន វិសាល ប្រធានក្រុមប្រឹក្សាជំនុំជម្រះនៃសាលាឧទ្ធរណ៍បានអានកំណត់ហេតុសាលាដំបូងខេត្តថាកាលពីអំឡុងខែមីនា ឆ្នាំ ២០១៧ មានស្ត្រីម្នាក់ឈ្មោះ ហេង ម៉េត អាយុ ៤២ ឆ្នាំរស់នៅភូមិសិទ្ធិសេរី ឃុំគោកមន ស្រុកបន្ទាយអម្ពិល ខេត្តឧត្តរមានជ័យ បានបង្ហោះសារតាមប្រព័ន្ធផ្សព្វផ្សាយសង្គមហ្វេសប៊ុកដោយសរសេរថាលោក សេរី កុសល អាងខ្លួនមានបុណ្យស័ក្ដិធំបានដើររំលោភយកដីប្រជារាស្ត្រ។
បន្ទាប់ពីឃើញសារនោះមក លោក សេរី កុសល បានដាក់ពាក្យបណ្តឹងចូលទៅសាលាដំបូងខេត្តឧត្តរមានជ័យ។ ក្នុងបណ្តឹងនោះបានរៀបរាប់ថា ស្ត្រីឈ្មោះ ហេង ម៉េត បានធ្វើឲ្យប៉ះពាល់ខ្លាំងដល់កិត្តិយសរបស់លោក សេរី កុសល ដែលជាមន្ត្រីជាន់ខ្ពស់ក្នុងជួររដ្ឋាភិបាលកម្ពុជា និងភរិយារបស់លោកឈ្មោះ យិន សោភា ផងដែរ។
សំណុំរឿងនេះត្រូវសាលាដំបូងខេត្តឧត្តរមានជ័យសម្រេចកាលពីថ្ងៃទី ២៨ ខែកុម្ភៈឆ្នាំ ២០១៨ ដោយបង្គាប់ឲ្យស្ត្រីឈ្មោះ ហេង ម៉េត សងសំណងរដ្ឋប្បវេណីទៅលោក សេរី កុសល ចំនួន ២០ លានរៀលដើម្បីប៉ះប៉ូវនូវការខូចខាតដល់កិត្តិយសរបស់លោក រីឯ ១០ លានរៀលជាសំណងជំងឺចិត្តទៅភរិយារបស់លោក និងរឹបអូសកាមេរ៉ាមេម៉ូរីចំនួន ១ គ្រឿងផងដែរ។
កំណត់ហេតុបង្ហាញទៀតថាបន្ទាប់ពីសាលាដំបូងខេត្តចេញសាលក្រមហើយនោះ ភាគីទាំង ២ បានសម្រុះសម្រួលគ្នានៅសាលាខេត្តឧត្តរមានជ័យ និងអាជ្ញាធរស្រុកផងដែរ។ ប៉ុន្តែក្រោយមកភាគីចាញ់ក្តីបានប្តឹងទាស់មកសាលាឧទ្ធរណ៍ទៀត។
លោក សេរី កុសល បានឆ្លើយប្រាប់ចៅក្រមក្នុងបន្ទប់សវនាការពីម្សិលមិញថា លោកសុខចិត្តទទួលយកសាលក្រមរបស់សាលាដំបូងខេត្ត ហើយពេលនោះខាងស្ត្រីឈ្មោះ ហេង ម៉េត បានពឹងមន្ត្រីយោធារហូតដល់តំណាងរាស្ត្រដើម្បីមកចរចាជាមួយលោកហើយក៏មានការព្រមព្រៀងគ្នា។ ប៉ុន្តែមិនដឹងយ៉ាងម៉េចបានជាស្ត្រីរូបនោះប្តឹងមកសាលាឧទ្ធរណ៍ហើយលោកក៏ប្តឹងស្របតាមដែរទៅ។
លោកប្រាប់ចៅក្រមថា៖ «ខ្ញុំប្តឹងស្ត្រីនោះព្រោះគាត់បរិហារកេរ្តិ៍ខ្ញុំដែលកាលនោះគាត់បង្ហោះសារតាមហ្វេសប៊ុកដោយគ្រាន់តែមានអ្នកឡាយរហូតដល់ជិត ១ សែននាក់។ ស្ត្រីនោះក្រោយពីយល់ព្រមគ្នាហើយ ហេតុអ្វីគាត់នៅតែបង្ហោះសារបរិហារកេរ្តិ៍ខ្ញុំទៀត។ ប៉ុន្តែខ្ញុំព្រមទទួលយកសាលក្រមរបស់តុលាការខេត្តឧត្តរមានជ័យ»។
កញ្ញា សារ កញ្ញារិទ្ធ ព្រះរាជអាជ្ញា និងជាតំណាងមហាអយ្យការសន្និដ្ឋានថា៖ «តាមអង្គហេតុរឿងនេះស្ត្រីនោះព្រមទទួលស្គាល់កំហុសហើយក៏មានភាពស៊ីចង្វាក់គ្នានឹងការអះអាងរបស់ដើមបណ្តឹងផងដែរ។ ដូច្នេះខ្ញុំយល់ឃើញថា ការសម្រេចរបស់សាលាដំបូងខេត្តឧត្តរមានជ័យត្រឹមត្រូវហើយ»។
ក្រោយជំនុំជម្រះលោកចៅក្រម ស៊ិន វិសាល បានឱ្យដឹងថាសាលដីកានៃសំណុំរឿងនេះនឹងលើកទៅប្រកាសនៅថ្ងៃទី ៣០ ខែកក្កដាខាងមុខ៕
