ភ្នំពេញៈ សាលាឧទ្ធរណ៍កាលពីម្សិលមិញបានបើកសវនាការជំនុំជម្រះជនជាប់ចោទជាអតីតមន្ត្រីទំនាក់ទំនងរដ្ឋសភាព្រឹទ្ធសភា និងអធិការកិច្ចម្នាក់ ពាក់ព័ន្ធនឹងការបាញ់បុរសចាក់ភ្លេងម្នាក់ក្នុងក្លិបកម្សាន្តរ៉ក់ (Rock) ឲ្យរបួសបាក់ភ្លៅក្នុងជម្លោះហិង្សាកាលពីឆ្នាំ ២០១៧ ដែលសំណុំរឿងនេះត្រូវបានតុលាការរាជធានីភ្នំពេញផ្តន្ទាទោសដាក់ពន្ធនាគារ ២ ឆ្នាំកន្លះ។
យោងតាមកំណត់ហេតុរបស់សាលាឧទ្ធរណ៍បង្ហាញថា ជនជាប់ចោទឈ្មោះ ឌុច សុវណ្ណារ៉េត អាយុ ៣៤ ឆ្នាំ ជាអតីតមន្ត្រីនៃក្រសួងទំនាក់ទំនងរដ្ឋសភាព្រឹទ្ធសភាកាលពីថ្ងៃ ២៩ ខែវិច្ឆិកា ឆ្នាំ ២០១៧ បានចូលទៅច្រៀងខារ៉ាអូខេនៅក្នុងមជ្ឈមណ្ឌលកម្សាន្តរ៉ក់ដែលស្ថិតនៅតាមមហាវិថីព្រះមុនីវង្សក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញក្នុងបន្ទប់ ២០៣។ ពេលនោះស្រាប់តែមានជម្លោះជាមួយបុរសម្នាក់ ឈ្មោះ សីហា ប៉ុន្តែត្រូវបានកងសន្តិសុខដែលបម្រើការនៅក្លិបកម្សាន្តនោះឃាត់ និងមានការសម្របសម្រួលត្រូវគ្នាវិញ តែប៉ុន្មាននាទីក្រោយមកក៏ឈ្លោះវាយតប់គ្នាម្តងទៀត។
កំណត់ហេតុបន្តថា ពេលនោះអ្នកចាក់ភ្លេងម្នាក់ឈ្មោះ បៀ សំអឿន អាយុ ៣៣ ឆ្នាំ បានឃាត់ តែត្រូវឈ្មោះ ឌុច សុវណ្ណារ៉េត បាញ់ឲ្យរបួសជើងស្តាំ ១ គ្រាប់ និងត្រគាកខាងឆ្វេង ១ គ្រាប់ និងបាញ់ជាច្រើនគ្រាប់ទៀតមុនរត់គេចខ្លួន។
ប៉ុន្តែក្រោយមកនៅយប់មួយនាដើមខែមករាឆ្នាំ ២០១៨ សមត្ថកិច្ចស្រាវជ្រាវចាប់ជនសង្ស័យបាននៅខេត្តឧត្តរមានជ័យ ហើយនាំខ្លួនមករាជធានីភ្នំពេញវិញ។
សំណុំរឿងនេះត្រូវបានសាលាដំបូងរាជធានីភ្នំពេញប្រកាសសាលក្រមនៅថ្ងៃទី ២១ មីនា ឆ្នាំ ២០១៩ ដោយសម្រេចប្តូរបទចោទពីបទឃាតកម្មតាមបញ្ញត្តិមាត្រា ១៩៩ នៃក្រមព្រហ្មទណ្ឌមកជាបទអំពើហិង្សាមានស្ថានទម្ងន់ទោសផ្តន្ទាទោសដាក់ពន្ធនាគារ ២ ឆ្នាំកន្លះវិញ។
ខណៈជនរងគ្រោះអវត្តមានក្នុងបន្ទប់សវនាការពីម្សិលមិញជនជាប់ចោទឈ្មោះ ឌុច សុវណ្ណារ៉េត បានឆ្លើយប្រាប់ចៅក្រមថា កាលពីឈ្លោះគ្នានោះគាត់គ្មានកាំភ្លើងជាប់ខ្លួនទេ ប៉ុន្តែមានការវាយតប់គ្នាហើយភាគីម្ខាងទៀតបានជ្រុះកាំភ្លើងខ្លី ១ ដើម។ ឃើញដូចនោះគាត់ក៏រើសកាំភ្លើងពីលើឥដ្ឋរួចបាញ់តែម្តងទៅ។
ជនជាប់ចោទថា៖ «ខ្ញុំមិនចេះបាញ់កាំភ្លើងទេ តែរើសកាំភ្លើងបានក៏បាញ់ទៅ។ ខ្ញុំសុំឲ្យតុលាការបន្ថយទោសដល់ខ្ញុំ...»។
កញ្ញា យិន សុគន្ធារី តំណាងមហាអយ្យការបានសន្និដ្ឋានថា ជនជាប់ចោទបានសារភាពពីទង្វើរបស់គាត់ដែលស៊ីចង្វាក់គ្នាដូចការរៀបរាប់ក្នុងបណ្តឹងរបស់ជនរងគ្រោះ។ ហេតុដូច្នេះសូមតម្កល់សាលក្រមសាលាដំបូងរាជធានី-ភ្នំពេញទុកជាបានការដដែល។
ក៏ប៉ុន្តែលោក ម៉ម ស៊ីដាណា មេធាវីការពារជនជាប់ចោទបានថ្លែងក្នុងអង្គសវនាការថា កាំភ្លើងដែលកូនក្តីលោកបាញ់នោះមិនមែនជាកម្មសិទ្ធិរបស់គាត់ទេ ប៉ុន្តែអំពើបាញ់ប្រហារនោះគឺកូនក្តីរបស់លោកទទួលកំហុសហើយ។
លោកប្រាប់ចៅក្រមថា៖ «កូនក្តីរបស់ខ្ញុំប្តឹងមកនេះដោយសារគាត់មិនសុខចិត្តនឹងទោសច្រើនឆ្នាំពេក។
សូមតុលាការបន្ថយទោសដល់គាត់ផង»។
ក្រោយជំនុំជម្រះលោកចៅក្រម សេង ស៊ីវុត្ថា ប្រធានក្រុមប្រឹក្សាជំនុំជម្រះថ្លែងថា សាលដីកាសំណុំរឿងនេះនឹងប្រកាសនៅថ្ងៃទី ៨ ខែកញ្ញា ខាងមុខ៕