.jpg)
ក្រុមជនជាប់ចោទនៅសាលាឧទ្ធរណ៍កាលពីម្សិលមិញ។ រូប សារុំ
ភ្នំពេញៈ សាលាឧទ្ធរណ៍កាលពីម្សិលមិញបានជំនុំជម្រះជនជាប់ចោទ ២ នាក់ ក្នុងចំណោម ៣ នាក់ (ម្នាក់មិនប្តឹងឧទ្ធរណ៍) ពាក់ព័ន្ធករណីវាយជនជាប់ចោទម្នាក់ក្នុងពន្ធនាគារបណ្ដាលឲ្យរបួសធ្ងន់ជាករណីដែលតុលាការថ្នាក់ក្រោមផ្តន្ទាទោសម្នាក់ៗ ២ ឆ្នាំ បន្ថែមពីលើបទល្មើសលួចដែលមានទោស ២ ឆ្នាំ។
លោកចៅក្រម ញូង ធុល ប្រធានក្រុមប្រឹក្សាជំនុំជម្រះបានអានកំណត់ហេតុថា កាលពីថ្ងៃទី ៥ ខែ មេសា ឆ្នាំ ២០១៧ មានជនជាប់ចោទឈ្មោះសាន ឡុង អាយុ ២៥ ឆ្នាំ, ឈ្មោះ ពុន ដាំ អាយុ ២៤ ឆ្នាំ និងជនជាប់ចោទម្នាក់ទៀតឈ្មោះជីវ័ន្ត បានប្រើហិង្សាវាយដំទៅលើអ្នកជាប់ឃុំដូចគ្នាបណ្តាលឲ្យរបួសធ្ងន់ដេកដួលលើឥដ្ឋក្នុងបន្ទប់នៃមណ្ឌលកែប្រែព្រៃស។ បន្ទាប់មកត្រូវមន្រ្តីពន្ធនាគារកសាងសំណុំរឿងបញ្ជូនមកជំនុំជម្រះនៅសាលាដំបូងរាជធានីភ្នំពេញ។
លោកចៅក្រម បានអានបន្តថា សំណុំរឿងនេះត្រូវបានសាលាដំបូងរាជធានីភ្នំពេញប្រកាសសាលក្រមសម្រេចផ្តន្ទាទោសលើជនជាប់ចោទ ៣ នាក់ ខាងលើឲ្យជាប់ពន្ធនាគារក្នុងម្នាក់ៗ ២ ឆ្នាំ ដោយចោទពីបទហិង្សាបន្ថែមពីលើទោសលួចពីមុនដែលជាប់ពន្ធនាគារក្នុងម្នាក់ៗ ២ ឆ្នាំ។
លោកចៅក្រម បានបន្តថារឿងនេះអ្នកប្រព្រឹត្តហិង្សាមាន ៣ នាក់ តែម្នាក់ទៀតមិនបានប្តឹងទាស់មកសាលាឧទ្ធរណ៍ទេព្រោះគាត់ព្រមទទួលកំហុស។
លោកចៅក្រមបានប្រាប់ទៅជនជាប់ចោទក្នុងសវនាការពីម្សិលមិញថា៖ «ការប្រើហិង្សានេះជនរងគ្រោះត្រូវបានទាត់ ១ ជើង ចំដើមទ្រូងហើយបើទាត់ចំកន្លែងដំណំគឺជនរងគ្រោះអាចស្លាប់បាន»។
ចំពោះជនជាប់ចោទឈ្មោះពុនដាំ បានឆ្លើយប្រាប់ចៅក្រមថា ជនដែលគាត់វាយនោះជាប់ចោទពីបទមនុស្សឃាតហើយមូលហេតុដែលគាត់វាយលើជននោះដោយសារគេនិយាយមើលងាយគាត់ថាអាខ្មៅ។
ជនជាប់ចោទរូបនេះបានបញ្ជាក់ថា៖ «ខ្ញុំទាត់ជនរងគ្រោះ ១ ជើង ចំដើមទ្រូងមែនព្រោះខ្ញុំខឹងគាត់ពេកតែខ្ញុំសុំតុលាការបន្ធូរបន្ថយទោសដល់ខ្ញុំផង។ តាមពិតទោសខ្ញុំពីមុនត្រូវចេញពីពន្ធនាគារនៅឆ្នាំ ២០១៧ តែដោយសារខ្ញុំបង្កបទល្មើសមួយទៀតទើបជាប់ឃុំបន្ត»។
ដោយឡែកជនជាប់ចោទឈ្មោះ សាន ឡុង បានប្រាប់ចៅក្រមដែរថាគាត់មិនបានវាយទៅលើជនរងគ្រោះទេតែពេលនោះគេចោទគាត់ថាបានវាយលើផ្ទៃមុខជនរងគ្រោះ។ «ខ្ញុំសុំតុលាការឲ្យខ្ញុំរួចផុតពីបទចោទនេះផង»។
លោក ប៉ែន សារ៉ាត តំណាងមហាអយ្យការសន្និដ្ឋានថា ឆ្លងតាមការសួរដេញដោលជនជាប់ចោទបានឆ្លើយសារភាពប្រាប់ក្រុមប្រឹក្សាជំនុំជម្រះថាពួកគេពិតជាបានវាយដំលើជនជាប់ឃុំដូចគ្នាមែន។«អាស្រ័យហេតុនេះសូមក្រុមប្រឹក្សាជំនុំជម្រះពិចារណាតាមច្បាប់»។
ក្រោយជំនុំជម្រះប្រមាណ ២០ នាទីរួចមក លោកចៅក្រម ញូង ធុល បានថ្លែងថា សាលដីកានៃសំណុំរឿងនេះនឹងប្រកាសនៅថ្ងៃទី ១៣ ខែ មិថុនា ខាងមុខនេះ៕
