.jpg)
ជនជាប់ចោទនៅសាលាឧទ្ធរណ៍កាលពីម្សិលមិញ។ រូបថត សហការី
ភ្នំពេញៈ សាលាឧទ្ធរណ៍កាលពីម្សិលមិញបានបើកសវនាការជំនុំជម្រះជនជាប់ចោទម្នាក់ពាក់ព័ន្ធនឹងករណីរំលោភកូនស្រីបង្កើតប្រព្រឹត្តនៅឃុំនាងទើត ស្រុកតំបែរ ខេត្តត្បូងឃ្មុំក្នុងឆ្នាំ ២០១៧ ខណៈសំណុំរឿងនេះត្រូវបានសាលាដំបូងខេត្តនេះផ្តន្ទាទោសដាក់គុក ១០ ឆ្នាំ។
បើតាមកំណត់ហេតុរបស់តុលាការបង្ហាញថា ជនជាប់ចោទឈ្មោះ នួន រដ្ឋា ហៅ ពៅ អាយុ ៣៨ ឆ្នាំ មានកូនស្រីម្នាក់ឈ្មោះ ន. ស អាយុ ១៤ ឆ្នាំ និងបានលែងលះគ្នាជាមួយប្រពន្ធដើមរស់នៅឃុំ-ស្រុកខាងលើ។ ក្រោយមកជនជាប់ចោទរូបនេះបានយកប្រពន្ធចុងម្នាក់ទៀតមករួមរស់ជាមួយគ្នា។
កំណត់ហេតុបន្តថាក្នុងរយៈកាលរស់នៅនោះដោយសារក្មេងស្រីរងគ្រោះគិតថាខ្លួនគ្មានម្តាយ ហើយរស់នៅជាមួយម្តាយចុងហាក់មិនស្និទ្ធស្នាលដូចម្តាយបង្កើតក៏មកដេកជាមួយឪពុក។ ប៉ុន្តែបែរជាឪពុកបង្កើត (ជនជាប់ចោទ) រូបនេះចាប់រំលោភសេពសន្ថវៈទៅវិញ ដែលតាមចម្លើយរបស់នាងប្រាប់សមត្ថកិច្ចថា ឪពុកបានចាប់រំលោភនាងក្នុងខែសីហា និងខែកញ្ញា ឆ្នាំ ២០១៧ បានសម្រេចចំនួន ៣ ដង។
កំណត់ហេតុដែលបានដកស្រង់សម្តីក្មេងរងគ្រោះបន្តថា ឪពុកនាងតែងតែលួងលោមនាងមុន និងក្រោយពេលរំលោភម្តងៗ ហើយគាត់តែងតែគំរាមមិនឲ្យនាងនិយាយរឿងនេះប្រាប់អ្នកភូមិទេ ជាហេតុធ្វើឲ្យនាងភិតភ័យ ហើយក៏មិនដែលប្រាប់នរណាម្នាក់ឲ្យដឹងដែរ សូម្បីតែម្តាយចុងនាង។
តាមកំណត់ហេតុដដែលសរសេរថា មុនថ្ងៃសមត្ថកិច្ចចាប់ខ្លួនគឺក្មេងរងគ្រោះ និងម្តាយចុងរបស់នាងតែងត្រូវជនជាប់ចោទវាយដំធ្វើបាបស្ទើររាល់ថ្ងៃដូច្នេះហើយទើបក្មេងស្រីរងគ្រោះប្រាប់រឿងនេះឲ្យម្តាយចុងដឹង ហើយស្ត្រីជាម្តាយចុងនោះក៏បានប្តឹងមកប៉ុស្តិ៍នគរបាល ឃុំនាងទើតឲ្យចាប់ខ្លួននៅខែកញ្ញា ឆ្នាំ ២០១៧ តែម្តង។
សំណុំរឿងនេះត្រូវសាលាដំបូងខេត្តត្បូងឃ្មុំប្រកាសសាលក្រមផ្តន្ទាទោសដាក់ពន្ធនាគារ ១០ ឆ្នាំ កាលពីថ្ងៃទី ១១ ខែ មេសា ឆ្នាំ ២០១៨ ចោទពីបទរំលោភសេពសន្ថវៈតាមបញ្ញត្តិមាត្រា ២៤០ នៃក្រមព្រហ្មទណ្ឌ។
នៅក្នុងបន្ទប់សវនាការសាលាឧទ្ធរណ៍ពីម្សិលមិញ ជនជាប់ចោទបានប្រាប់ចៅក្រមថា គាត់តែងតែឆ្លៀតឱកាសចាប់រំលោភកូនស្រីបង្កើតពេលនាងដេកជាមួយគាត់ក្នុងផ្ទះ និងពេលម្តាយចុងនាងមិននៅផ្ទះ។ ប៉ុន្តែគាត់ចាប់កូនរំលោភបានតែ ២ ដងទេមិនដូចអ្វីដែលកូនស្រីគាត់ប្រាប់សមត្ថកិច្ចឡើយ។
ជនជាប់ចោទអះអាងថា៖ «អ្វីដែលខ្ញុំប្រព្រឹត្តខ្ញុំសុំទទួលកំហុស ហើយខ្ញុំប្តឹងមកសាលាឧទ្ធរណ៍ ព្រោះខ្ញុំចង់ឲ្យតុលាការបន្ថយទោសដល់ខ្ញុំ ៥ ឆ្នាំ។ តែបើមិនបាន ៥ ឆ្នាំបាន ១ ឆ្នាំក៏បានដែរ»។
ទោះយ៉ាងណាលោកចៅក្រម ងួន រតនា បានប្រាប់ជនជាប់ចោទក្នុងបន្ទប់សវនាការដែរថា លោកជាឪពុកបង្កើត ឬ ជាឪពុកចុងក៏ដោយ ក៏មិនត្រូវប្រព្រឹត្តទង្វើបែបនេះដែរ។ អំពើនេះនៅក្នុងសង្គមគេស្អប់ខ្ពើមណាស់។
លោកបានថ្លែងថា៖ «ពេលសវនាការនេះ លោកហាក់មិនបង្ហាញពីអារម្មណ៍សោកស្តាយចេញពីខ្លួនទេ។ លោកបានបន្សល់ទុកការឈឺចាប់ឲ្យកូនស្រីលោក»។
លោក ជុំ សែនសុទ្ធា តំណាងមហាអយ្យការសន្និដ្ឋានថា ជនជាប់ចោទបានសារភាពហើយគាត់ប្តឹងទាស់មកសាលាឧទ្ធរណ៍គឺគាត់សុំបន្ថយទោសដែលគាត់ថា បើមិនបាន ៥ ឆ្នាំ ក៏សុំបន្ថយទោស ១ ឆ្នាំក៏បានដែរ ព្រោះឆាប់បានចេញទៅផ្ទះវិញ។ ប៉ុន្តែសាលាដំបូងខេត្តត្បូងឃ្មុំផ្តន្ទាទោសគាត់ដាក់ពន្ធនាគារ ១០ ឆ្នាំសមល្មមហើយ។
លោកថ្លែងថា៖ «បើតាមបញ្ញត្តិនៃច្បាប់គឺបទល្មើសរបស់គាត់ត្រូវផ្តន្ទាទោសពី ៧ ឆ្នាំទៅ ១៥ ឆ្នាំឯណោះ។ តែនេះតុលាការថ្នាក់ក្រោមដាក់ ១០ ឆ្នាំសមរម្យហើយ។ ខ្ញុំសូមតម្កល់សាលក្រមនៅដដែល»។
លោក ចាន់ សុភា មេធាវី ការពារសិទ្ធិឲ្យជនជាប់ចោទសន្និដ្ឋានថា កូនក្តីរបស់លោកពិតជាបានប្រព្រឹត្តលើកូនស្រីរបស់គាត់មែន។ ប៉ុន្តែគាត់មិនបានធ្វើឲ្យក្មេងរងគ្រោះមានរបួសស្នាមទេ ហើយគាត់ថាពេលគាត់ចេញពីពន្ធនាគារវិញគាត់នឹងធ្វើអំពើល្អ។
លោកបន្តថា៖ «ខ្ញុំសូមដល់តុលាការមេត្តាបន្ថយទោសដល់កូនក្តីរបស់ខ្ញុំផង ដោយផ្អែកលើមាត្រា ៩៣ និង ៩៤ នៃក្រមព្រហ្មទណ្ឌ»។
ក្រោយជំនុំជម្រះលោក ចៅក្រម ងួន រតនា ប្រធានក្រុមប្រឹក្សាជំនុំជម្រះថ្លែងថា សាលដីការឿងនេះនឹងប្រកាសនៅថ្ងៃទី ៣១ ខែតុលា៕
