ភ្នំពេញៈ សាលាឧទ្ធរណ៍កាលពីថ្ងៃទី ២១ ខែ មិថុនា បានបើកសវនាការជំនុំជម្រះជនជាប់ចោទម្នាក់ ក្នុងចំណោម ៣ នាក់ ពាក់ព័ន្ធព្រួតគ្នាវាយលោក ស៊ុយ សារ៉េត ជាសាស្ត្រាចារ្យនៅសាកលវិទ្យាល័យកម្ពុជា កាលពីថ្ងៃទី ១១ មីនា ឆ្នាំ ២០១៨ ហើយត្រូវបានតុលាការថ្នាក់ក្រោមផ្តន្ទាទោសដាក់ពន្ធនាគារម្នាក់ ៣ ឆ្នាំ តែឲ្យអនុវត្តទោស ១៨ ខែ និងរួមគ្នាសងប្រាក់ ៥០០ លានរៀល និងពិន័យប្រាក់ម្នាក់ ៥ លានរៀល។
តាមកំណត់ហេតុតុលាការបង្ហាញថា កាលពីរសៀលថ្ងៃទី ១១ មីនា ឆ្នាំ ២០១៨ មានករណីបង្កគ្រោះថ្នាក់ចរាចរណ៍មួយកើតឡើងហើយពេលនោះមាន ប្រជាពលរដ្ឋបានដេញវាយរថយន្តខណៈលោក ស៊ុយ សារ៉េត ដែលជាសាស្ត្រាចារ្យ សាកលវិទ្យាល័យកម្ពុជា ហើយបានវាយកម្ទេចរថយន្តរបស់លោក ដោយចោទប្រកាន់ថា បានបើកបុករះសម្លាប់មនុស្ស ២ ទៅ ៣ នាក់ ពីផ្លូវក្នុងសង្កាត់ទួលសង្កែ ខណ្ឌឫស្សីកែវ រួចបើករត់គេចរហូតដល់ម្តុំពេទ្យលោកសង្ឃ ក្នុងខណ្ឌទួលគោក រាជធានីភ្នំពេញ។
កំណត់ហេតុបង្ហាញបន្តថា លុះដល់រសៀលថ្ងៃទី ១៦ មីនា ឆ្នាំ ២០១៨ ដដែល នគរបាលព្រហ្មទណ្ឌកម្រិតស្រាលរាជធានីភ្នំពេញ បានចាប់ខ្លួនជនសង្ស័យបាន ៣ នាក់ ជនសង្ស័យទាំង ៣ នាក់ ១- ឈ្មោះ យាត ទិត្យា អាយុ ២១ ឆ្នាំ ទី២- ឈ្មោះ អាន វិនទី ប្រុសអាយុ ២១ ឆ្នាំ និងទី៣- ឈ្មោះ អាន ផល្លី អាយុ ៣១ ឆ្នាំ។
សំណុំរឿងនេះត្រូវបានសាលាដំបូងរាជធានីភ្នំពេញកាលពីថ្ងៃទី ២០ វិច្ឆិកា ឆ្នាំ ២០១៨ សម្រេចផ្តន្ទាទោសដាក់ពន្ធនាគារម្នាក់ៗ ៣ ឆ្នាំ តែឲ្យអនុវត្តទោសក្នុងពន្ធនាគារ ១៨ ខែ ហើយទោសដែលនៅសល់ត្រូវព្យួរ និងបង្គាប់ឲ្យរួមគ្នាសងប្រាក់ទៅជនរងគ្រោះចំនួន ៥០០ លានរៀល និងពិន័យម្នាក់ៗ ៥ លានរៀលទៀត ក្រោមការចោទប្រកាន់ពីបទហិង្សាដោយចេតនាមានស្ថានទម្ងន់ទោស និងទី២- បទធ្វើឲ្យខូចខាតដោយចេតនាមានស្ថានទម្ងន់ទោស យោងតាមមាត្រា ២១៨ និងមាត្រា ៤១១ នៃក្រមព្រហ្មទណ្ឌ។
នៅក្នុងបន្ទប់សវនាការកាលពីថ្ងៃជំនុំជម្រះ ទី ២១ មិថុនា ឆ្នាំ ២០១៩ នោះជនជាប់ចោទឈ្មោះ អាន ផល្លី បានឆ្លើយប្រាប់ ចៅក្រមថា ខ្លួនពិតជាបានប្រព្រឹត្តដូចការចោទប្រកាន់របស់សាលាដំបូងរាជធានីភ្នំពេញមែនហើយខ្លួនបានព្រមទទួលយកទណ្ឌកម្មទោស។
អាន ផល្លី និយាយថា៖ «ប៉ុន្តែ ខ្ញុំសុំតុលាការបន្ថយប្រាក់សំណង ព្រោះខ្ញុំក្រគ្មានលទ្ធភាពសងទេ»។
ក្រោយជំនុំជម្រះលោកស្រីចៅក្រម យ៉េត ម៉ូលិន ថ្លែងថា សាលដីកានៃសំណុំរឿងនេះនឹងប្រកាសនៅថ្ងៃទី ៨ ខែ កក្កដា ខាងមុខ៕