ភ្នំពេញៈ សាលាឧទ្ធរណ៍កាលពីម្សិលមិញបានបើកសវនាការ ជំនុំជម្រះបុរស ២ នាក់ឪពុកនិងកូនពាក់ព័ន្ធករណីផលិតនិងជួញដូរគ្រឿងញៀនមេតំហ្វេតាមីនចំនួន ១១២,៧១ ក្រាមនៅសង្កាត់អូរឫស្សីទី ៤ ខណ្ឌ ៧ មករាកាលពីឆ្នាំ ២០១១។
នៅក្នុងបន្ទប់សវនាការកាលពីម្សិលមិញ បុរសជាប់ចោទឈ្មោះ ឌិន សុខជា អាយុ ២៦ ឆ្នាំ បានឆ្លើយប្រាប់ចៅក្រមថា ខ្លួនមានឪពុកឈ្មោះ សុខ ដារ៉ា អាយុ ៥៨ ឆ្នាំ និងមានម្តាយចុងឈ្មោះ ហ៊ឹម វ៉ាន់ ដែលម្តាយចុងជួលផ្ទះគេស្នាក់នៅក្នុងសង្កាត់អូរឫស្សីទី៤ ខណ្ឌ ៧ មករា។ ប៉ុន្តែខ្លួនមិនបានរស់នៅជាមួយម្តាយចុងនោះទេ។ នៅថ្ងៃទី ១០ ខែកក្កដាឆ្នាំ ២០១១ ខ្លួនរួមជាមួយម្តាយ និងប្អូនស្រីឈ្មោះ ង្វៀង ធីធី, សុខ គឹមមី, មីនី និង ឌិន គឹមហេង បានទៅធ្វើពិធីសែនកុងម៉ានៅផ្ទះកើតហេតុ។
ឌិន សុខ ជានិយាយប្រាប់ចៅក្រមថា៖ «នៅថ្ងៃនោះ ខ្ញុំ និងគ្រួសារខ្ញុំ កំពុងសែនកុងម៉ា ស្រាប់តែប៉ូលិសចូលចាប់ពួកខ្ញុំ ប៉ុន្តែសមត្ថកិច្ចឆែកខ្លួនពួកខ្ញុំ មិនឃើញមានអ្វីទេ ហើយក៏បង្ហួសទៅផ្ទះប្រពន្ធចុងឪពុកខ្ញុំ ដែលនៅខណ្ឌដាច់ពីគ្នា។ សមត្ថកិច្ចប្រាប់ថា រកឃើញឧបករណ៍ផលិតគ្រឿងញៀន និងថ្នាំញៀនមួយចំនួនដែលនៅខាងក្រោយផ្ទះខ្ញុំ ដែលជាផ្ទះម្តាយចុងរបស់ខ្ញុំ ប៉ុន្តែខ្ញុំមិនឃើញសមត្ថកិច្ចចាប់គាត់ទេ។ ខ្ញុំសូមតុលាការដោះលែងខ្ញុំវិញ ព្រោះខ្ញុំមិនបានប្រព្រឹត្តទេ»។
ដោយឡែកជនជាប់ចោទ សុខ ដារ៉ា ដែលជាឪពុក បានប្រាប់ចៅក្រមដែរថា មុនកើតហេតុ ៦ ខែខ្លួនបានជាប់ឃុំនៅពន្ធនាគារព្រៃសឯណោះទេ ពាក់ព័ន្ធបទចោទជួញដូរគ្រឿងញៀន និងត្រូវតុលាការផ្តន្ទាទោស ដាក់ពន្ធនាគារ ២ ឆ្នាំ។ប៉ុន្តែពេលកើតហេតុនោះ ខ្លួនក៏ត្រូវសមត្ថកិច្ចថា ជាប់ពាក់ព័ន្ធនឹងបទល្មើសនោះដែរ។
សុខ ដារ៉ា និយាយថា៖ «ខ្ញុំមានប្រពន្ធទី ២ មែន ប៉ុន្តែខ្ញុំមិនដឹងថា នៅក្នុងផ្ទះដែលគាត់ជួលស្នាក់នៅនោះ មានឧបករណ៍ផលិតគ្រឿងញៀន ឬយ៉ាងណាទេ ព្រោះខ្ញុំជាប់ឃុំមុនកើតហេតុការណ៍ទៅទៀត។ ខ្ញុំសូមតុលាការដោះលែងខ្ញុំវិញ ព្រោះខ្ញុំមិនបានប្រព្រឹត្តដូចការចោទប្រកាន់ទេ»។
សំណុំរឿងនេះ ត្រូវសាលាដំបូងរាជធានីភ្នំពេញកាលពីខែមេសាឆ្នាំ ២០១២ បានសម្រេចផ្តន្ទាទោសជនជាប់ចោទ សុខ ដារ៉ា, សុខ គឹមមី, មីនី (ស្លាប់ក្នុងពន្ធនាគារ) និងឈ្មោះ ឌិន សុខជា ឲ្យជាប់ពន្ធនាគារម្នាក់ ១៥ ឆ្នាំចោទបទផលិតនិងជួញដូរគ្រឿងញៀន។ រីឯឈ្មោះង្វៀង ធីធី ជាប់ពន្ធនាគារ ៥ ឆ្នាំនិងឈ្មោះ គឹម ហេង ជាប់ពន្ធនាគារ ៥ ឆ្នាំពីបទជួញដូរគ្រឿងញៀន។
លោក តេង បូរ៉ា មេធាវីការពារសិទ្ធិឲ្យឈ្មោះ ឌិន សុខជា និងឈ្មោះ សុខ ដា ថ្លែងក្នុងសវនាការថា៖ «សូម្បីតែកំណត់ហេតុរបស់ប៉ូលិស ដែលចុះប្រតិបត្តិការបង្ក្រាបគ្រឿងញៀននោះក៏អះអាងនៅសាលាដំបូងរាជធានីភ្នំពេញថា ឈ្មោះ សុខ ដារ៉ា គ្មានវត្តមាននៅកន្លែងកើតហេតុទេ។ យ៉ាងណាសូមក្រុមប្រឹក្សាជំនុំជម្រះ ដោះលែងកូនក្តីខ្ញុំ ឲ្យមានសេរីភាពវិញ ព្រោះរឿងនេះមានវិមតិសង្ស័យច្រើន ហើយបើយោងមាត្រ ៣៨ នៃរដ្ឋធម្មនុញ្ញចែងថាវិមតិសង្ស័យត្រូវបានជាប្រយោជន៍របស់ជនជាប់ចោទ»។
លោក នូ ចន្ថា មេធាវីការពារសិទ្ធិឲ្យឈ្មោះ ឌិន គឹមហេង, សុខ គឹមមី (អវត្តមាន) សន្និដ្ឋានថា រឿងនេះតាមពិតឈ្មោះហ៊ឹមវ៉ាន់ (ប្រពន្ធចុងជនជាប់ចោទ) ជាអ្នកពាក់ព័ន្ធផ្ទាល់។ ដូច្នេះសូមក្រុមប្រឹក្សាជំនុំជម្រះសម្រាលទោសឲ្យកូនក្តីលោកផង។
ចំណែកលោក អុឹម សុផាន តំណាងមហាអយ្យការ សន្និដ្ឋានថា រឿងនេះផ្ទះដែលជនជាប់ចោទទៅសែននោះខណ្ឌដាច់ពីផ្ទះដែលសមត្ថកិច្ចរកឃើញឧបករណ៍គ្រឿងញៀននិងគ្រឿងញៀន ឯជនជាប់ចោទ សុខ ដារ៉ា គាត់ថា នៅថ្ងៃនោះគាត់នៅជាប់ពន្ធនាគារទេ។
លោកថា៖ «រឿងនេះ ដើម្បីរកយុត្តិធម៌ថា អ្នកណាជាអ្នកប្រព្រឹត្តពិតនោះ គួរក្រុមប្រឹក្សាជំនុំជម្រះធ្វើការស៊ើបអង្កេតឡើងវិញ ហើយមិនត្រូវចាប់អ្នកដែលស្ថិតនៅបន្ទប់ផ្សេងថា ជាអ្នកប្រព្រឹត្តនោះទេ»។
ក្រោយពីធ្វើការជំនុំជម្រះលោកស្រី ចាន់ ម៉ាឌីណា ប្រធានក្រុមប្រឹក្សាជំនុំជម្រះបានថ្លែងថា សាលដីកានេះ នឹងត្រូវប្រកាសនៅថ្ងៃទី ១៤ ខែមីនាខាងមុខ៕