ភ្នំពេញៈ សាលាឧទ្ធរណ៍កាលពីម្សិលមិញបានជំនុំជម្រះជនជាប់ចោទ ២ នាក់ប្តីប្រពន្ធពាក់ព័ន្ធករណីចាក់សម្លាប់ស្ត្រីម្នាក់កាលពីថ្ងៃទី ៦ មិថុនាឆ្នាំ ២០១៦ នៅសង្កាត់ទឹកថ្លា ខណ្ឌសែនសុខ រាជធានីភ្នំពេញជាសំណុំរឿងដែលត្រូវបានតុលាការថ្នាក់ក្រោមផ្តន្ទាទោសដាក់គុកម្នាក់ៗ ១០ ឆ្នាំ និងបង្គាប់ឲ្យរួមគ្នាសងជំងឺចិត្តដល់គ្រួសារជនរងគ្រោះ ៤០ លានរៀល។
នៅក្នុងបន្ទប់សវនាការពីម្សិលមិញលោក ឯក សាម៉េត ដែលប្ដីស្ត្រីរងគ្រោះឈ្មោះ ឈួន ចន្ថា អាយុ ៣៥ ឆ្នាំបានឆ្លើយថាមុនពេលកើតហេតុ ប្រពន្ធគាត់បានលក់បាយហើយពេលនោះស្ត្រីជាប់ចោទ ឈ្មោះ ឆោម ណៃ អាយុ ៣៣ ឆ្នាំបានចាក់ទឹកបង្ហូរនៅមុខកន្លែងលក់បាយគាត់។
លោកបន្តថាពេលនោះប្រពន្ធលោកបានប្រាប់ថា កុំឲ្យចាក់ទឹកបែបនេះ បន្ទាប់មកក៏មានការឈ្លោះគ្នាដោយមានទាំងប្ដីស្ត្រីជាប់ចោទចូលរួមផង។ ក្នុងជម្លោះនោះស្រាប់តែស្ត្រី ឆោម ណៃ បានចាក់ប្រពន្ធលោកនឹងកាំបិតត្រូវត្រង់ដោះផ្នែកខាងឆ្វេង ហើយបានស្លាប់ បន្ទាប់ពីដឹកដល់មន្ទីរពេទ្យ។
តាមកំណត់ហេតុតុលាការបង្ហាញថាសំណុំរឿងនេះត្រូវសាលាដំបូងរាជធានីភ្នំពេញប្រកាសសាលក្រមកាលពីថ្ងៃទី ២១ ឧសភា ឆ្នាំ ២០១៧ ផ្តន្ទាទោស ២ នាក់ប្ដី-ប្រពន្ធដាក់គុកម្នាក់ៗ ១០ ឆ្នាំ និងបង្គាប់ឲ្យរួមគ្នាសងជំងឺចិត្តទៅប្តីស្ត្រីរងគ្រោះ ៤០ លានរៀលចោទពីបទហិង្សាដោយចេតនាមានស្ថានទម្ងន់ទោសដោយមរណភាពនៃជនរងគ្រោះ។
ប៉ុន្តែ ២ នាក់ប្តីប្រពន្ធនោះបានប្តឹងឧទ្ធរណ៍ ហើយសំណុំរឿងនេះអគ្គព្រះរាជអាជ្ញានៃសាលាឧទ្ធរណ៍ក៏បានប្តឹងទាស់តុលាការថ្នាក់ក្រោមចំពោះការដាក់ទោសពួកគេតិចពេកផងដែរ។
នៅក្នុងបន្ទប់សវនាការកាលពីម្សិលមិញស្ត្រីជាប់ចោទឈ្មោះ ឆោម ណៃ បានឆ្លើយថា៖ «ខ្ញុំពិតជាបានចាក់លើជនរងគ្រោះប្រាកដមែន ហើយខ្ញុំសូមតុលាការបន្ថយទោសដល់ខ្ញុំផង។
ចំណែកប្តីរបស់ខ្ញុំគាត់មិនបានចាក់ស្ត្រីរងគ្រោះដូចការចោទទេ។ នេះបើនរណាប្រព្រឹត្តត្រូវតែមានទោស តែប្តីខ្ញុំគាត់មិនប្រព្រឹត្តគួរត្រូវបានរួចខ្លួន»។
លោក ម៉ម ស៊ីដាណា មេធាវីការពារសិទ្ធិឲ្យភាគីប្ដីស្ត្រីរងគ្រោះបានសន្និដ្ឋានថា ស្ត្រីជាប់ចោទពិតជាបានចាក់សម្លាប់កូនក្តីរបស់លោកមែន ហើយគាត់ក៏បានសារភាពនៅដំណាក់កាលនគរបាល និងនៅតុលាការថ្នាក់ក្រោមថា បានចាក់លើកូនក្តីលោកដែរ។ ជាមួយគ្នានេះសូម្បីតែមេធាវីរបស់ជនជាប់ចោទក៏ទទួលស្គាល់ថាកូនក្តីរបស់ខ្លួនកាន់កាំបិតដែរ។
លោកថ្លែងថា៖ «ដូច្នេះអ្វីដែលជនជាប់ចោទសារភាព វាស៊ីចង្វាក់នឹងការអះអាងរបស់សាក្សី ហើយខ្ញុំសូមឯកភាពនឹងការប្តឹងរបស់អគ្គព្រះរាជអាជ្ញាដើម្បីបន្ថែមទោសលើជនជាប់ចោទទាំង ២ នាក់»។
លោក ឃុត សុឃាង ព្រះរាជអាជ្ញា និងជាតំណាងមហាអយ្យការសន្និដ្ឋានថាឆ្លងតាមការពិនិត្យលើអង្គហេតុ និងការឆ្លើយសារភាពរបស់ជនជាប់ចោទនៅដំណាក់កាលនគរបាលយុត្តិធម៌ និងនៅតុលាការថ្នាក់ក្រោមបង្ហាញថាពួកគេពិតជាបានប្រព្រឹត្តដូចការចោទប្រកាន់មែន។ ស្ត្រីជាប់ចោទពិតជាមានចេតនាចាក់លើជនរងគ្រោះ ប៉ុន្តែគាត់មិនបានគិតថា ចំកន្លែងស្លាប់។
លោកថ្លែងថា៖ «ខ្ញុំសូមក្រុមប្រឹក្សាជំនុំជម្រះតម្កល់សាលក្រមរបស់តុលាការថ្នាក់ក្រោមចំពោះស្ត្រីជាប់ចោទ ប៉ុន្តែប្តីរបស់ស្ត្រីជាប់ចោទសូមក្រុមប្រឹក្សាពិចារណា។ ព្រោះខាងភាគីប្តីស្ត្រីរងគ្រោះថា ជនជាប់ចោទជាប្តីបានចាក់បន្ថែមលើស្ត្រីរងគ្រោះ តែស្នាមចាក់មានតែ ១ កាំបិតទេ។ ដូច្នេះសូមក្រុមប្រឹក្សាពិចារណាទៅលើប្តីស្ត្រីជាប់ចោទ»។
រីឯលោកស្រីមេធាវី ការពារសិទ្ធិឲ្យជនជាប់ចោទទាំង ២ នាក់ប្តីប្រពន្ធដែលសុំមិនបញ្ចេញឈ្មោះបានថ្លែងថា ដើមហេតុដែលនាំឲ្យមានជម្លោះនេះ បើតាមលោកស្រីមើលអង្គហេតុបង្ហាញថា មុនដំបូងស្ត្រីរងគ្រោះបានឆ្លងថ្នល់ ហើយបានចាប់យកថាសដាក់ដំឡូងរបស់កូនក្តីលោកស្រីដែលកំពុងលក់ ចាក់ចោល។ បញ្ហានេះហើយ ទើបកូនក្តីលោកស្រីបានខឹង ហើយក៏បានក្លាយជាហិង្សាទៅ រីឯកូនក្តីលោកស្រីជាប្តីរបស់ស្ត្រីរងគ្រោះគឺគាត់មិនបានចាក់លើស្ត្រីរងគ្រោះទេ ដោយគាត់គ្រាន់តែបានទៅជួយប៉ុណ្ណោះ។
លោកស្រីថា៖ «ខ្ញុំសូមតុលាការលើកលែងបទចោទឲ្យបុរសជាកូនក្តីខ្ញុំរួចខ្លួន។ ចំណែកឯប្រពន្ធគាត់សូមតុលាការបន្ថយទោសគាត់ផង»។
ក្រោយពីបានជំនុំជម្រះរួចលោកស្រី គឹម ដានី ប្រធានក្រុមប្រឹក្សាជំនុំជម្រះបានថ្លែងថាសាលដីកានៃសំណុំរឿងនេះនឹងត្រូវប្រកាសនៅថ្ងៃទី ២៧ ខែធ្នូ ខាងមុខ៕