.jpg)
ជនជាប់ចោទនៅសាលាឧទ្ធរណ៍កាលពីម្សិលមិញ។ រូបថត គឹម សារុំ
ភ្នំពេញៈ សាលាឧទ្ធរណ៍កាលពីម្សិលមិញបានបើកសវនាការជំនុំជម្រះបុរសជនជាតិអាមេរិកម្នាក់ពាក់ព័ន្ធនឹងការជួញដូរគ្រឿងញៀន ០,៣ ក្រាមប្រព្រឹត្តកាលពីឆ្នាំ ២០១៦ ជាសំណុំរឿងដែលតុលាការថ្នាក់ក្រោមផ្ដន្ទាទោសដាក់គុក ៣ ឆ្នាំ។
តាមអង្គហេតុកាលពីថ្ងៃទី ១០ ខែកញ្ញា ឆ្នាំ ២០១៦ នគរបាលប្រឆាំងគ្រឿងញៀននៅមូលដ្ឋានបានចុះបង្ក្រាបករណីជួញដូរគ្រឿងញៀននៅសង្កាត់ផ្សារថ្មីទី ៣ ក្នុងខណ្ឌដូនពេញ និងបានឃាត់ខ្លួនស្ត្រីខ្មែរម្នាក់ឈ្មោះ ផាន ស្រីភ័ក្រ អាយុ ៣០ ឆ្នាំ និងបុរសអាមេរិកាំងម្នាក់ឈ្មោះ អេន ដ្រូ ចន អាយុ ៤២ ឆ្នាំ។
ក្នុងប្រតិបត្តិការនោះសមត្ថកិច្ចចាប់បានកញ្ចប់គ្រឿងញៀនពីស្ត្រីឈ្មោះ ផាន ស្រីភ័ក្រ ហើយ បានយកសំណាកគ្រឿងញៀននោះធ្វើកោសល្យវិច័យឃើញមានទម្ងន់ ០,៣ ក្រាម។
សំណុំរឿងនេះត្រូវសាលាដំបូងបើកសវនាការ និងប្រកាសសាលក្រម សម្រេចផ្តន្ទាទោសឈ្មោះ អេន ដ្រូ ចន និងស្ត្រី ឈ្មោះ ផាន ស្រីភ័ក្រ ម្នាក់ៗឲ្យជាប់គុក ៣ ឆ្នាំ និងពិន័យប្រាក់ម្នាក់ៗ ៦ លានរៀលចោទពីបទជួញដូរគ្រឿងញៀនតាមបញ្ញត្តិមាត្រា ៤០ ច្បាប់ស្តីពីការត្រួតពិនិត្យគ្រឿងញៀន។
នៅក្នុងសវនាការពីម្សិលមិញជនជាប់ចោទអេន ដ្រូ ចន បានឆ្លើយថានៅថ្ងៃកើតហេតុនោះគាត់បានជួលបន្ទប់ជាន់ទី ២ ក្នុងផ្ទះសំណាក់ឈ្មោះ សូរិយាស្កាយ ដើម្បីស្នាក់នៅ។ ពេលនោះគាត់មានមិត្តភក្តិជនជាតិអាមេរិកម្នាក់ស្នាក់នៅទីនោះដែរ តែបន្ទប់ផ្សេងគ្នាដោយគាត់មាននារី ផាន ស្រីភ័ក្រ ជាសង្សារ។
លោកប្រាប់ចៅក្រមថា៖ «ខ្ញុំជាអ្នកទេសចរហើយខ្ញុំក៏ធ្លាប់ប្រើប្រាស់គ្រឿងញៀនដែរ ប៉ុន្តែពេលប៉ូលិសឃាត់ខ្លួនខ្ញុំនោះគេមិនបានរកឃើញគ្រឿងញៀនក្នុងដៃខ្ញុំទេ។ គ្រឿងញៀននោះប៉ូលិសចាប់បាននៅនឹងខ្លួនស្ត្រីឈ្មោះ ផាន ស្រីភ័ក្រ ទេ» ។
ដោយឡែកស្ត្រីជាប់ចោទ ផាន ស្រីភ័ក្រ មិនបានប្តឹងឧទ្ធរណ៍ទេ តែត្រូវបានកោះហៅឱ្យចូលខ្លួនធ្វើជាសាក្សី និងបានឆ្លើយប្រាប់ចៅក្រមថានៅមុនថ្ងៃឃាត់ខ្លួនរូបនាង និងសង្សាររួមជាមួយបុរសជាប់ចោទបានជួលបន្ទប់ផ្ទះសំណាក់ខាងលើស្នាក់នៅ ប៉ុន្តែនាងស្នាក់នៅជាន់ទី ៣ ទេ។
ស្ត្រីជាប់ចោទបញ្ជាក់ថា៖ «ខ្ញុំស្នាក់នៅបន្ទប់ជាន់ទី ៣ ទេហើយគ្រឿងញៀននោះមានទម្ងន់ ២ ហ៊ុនកន្លះខ្ញុំទិញពីឈ្មោះ អេន ដ្រូ មែន ក្នុងតម្លៃ ៥៥ ដុល្លារ តែមិនទាន់ឲ្យលុយគាត់ទេ។ បន្ទាប់មកបានប្រហែល ១ ម៉ោងប៉ូលិសក៏ទៅចាប់ខ្លួនឈ្មោះ អេន ដ្រូ ទៀត»។
នៅក្នុងសវនាការនោះដែរលោកព្រះរាជអាជ្ញា តាន់ សេណារ៉ុង តំណាងមហាអយ្យការសន្និដ្ឋានថា៖ «រឿងនេះខ្ញុំយល់ថា អង្គហេតុមិនមានអ្វីប្រែប្រួលទេ បើទោះជាជនជាប់ចោទបដិសេធក្តី ហើយការចោទប្រកាន់របស់តុលាការថ្នាក់ក្រោមត្រឹមត្រូវហើយ។ តែសូមក្រុមប្រឹក្សាជំនុំជម្រះពិនិត្យលើលិខិតធ្វើកោសល្យវិច័យរបស់មន្ត្រីជំនាញថា តើសារធាតុសុទ្ធនៃគ្រឿងញៀននោះស័ក្ដិសមនឹងការផ្តន្ទាទោសលើជនជាប់ចោទឬទេ?»។
មេធាវីចាត់តាំងលោក សុខ សំណាង ដែលការពារសិទ្ធិឲ្យបុរសជាប់ចោទ បានសន្និដ្ឋានថាក្នុងការសួរដេញដោលកូនក្តីលោកនៅតែបដិសេធដូចនៅគ្រប់ដំណាក់កាលពីដំបូងដែរហើយក្នុងរឿងនេះសមត្ថកិច្ចក៏មិនបានដកហូតគ្រឿងញៀនជាក់ស្តែងពីកូនក្តីលោកដែរ។
រីឯស្ត្រីឈ្មោះ ស្រី ភ័ក្រ ថា គ្រឿងញៀននោះយកពីកូនក្តីលោក តែកូនក្តីលោកថា គាត់មិនបានឲ្យទៅស្ត្រីជាប់ចោទទេ។
លោកប្រាប់ចៅក្រមថា៖ «បើសមត្ថកិច្ចឃាត់ខ្លួនកូនក្តីខ្ញុំមិនឃើញមានគ្រឿងញៀនផង សួរថា ការបដិសេធរបស់គាត់តើត្រឹមត្រូវទេ? ខ្ញុំសូមក្រុមប្រឹក្សាជំនុំជម្រះលើកលែងការចោទប្រកាន់មកលើកូនក្តីខ្ញុំ»។
ក្រោយជំនុំជម្រះលោកចៅក្រម ប៉ុល សំអឿន ប្រធានក្រុមប្រឹក្សាជំនុំជម្រះថ្លែងថា សាលដីកានៃសំណុំរឿងនេះនឹងប្រកាសនៅថ្ងៃទី ៣១ ខែឧសភា ខាងមុខ៕
