ភ្នំពេញៈ សាលាឧទ្ធរណ៍កាលពីថ្ងៃម្សិលមិញបានជំនុំជម្រះរឿងក្ដីស្រ្តីជាប់ចោទម្នាក់ដោយហេតុយកស្បែកជើងគប់ស្លាកគណបក្សប្រជាជនកម្ពុជាដែលមានរូបលោកនាយករដ្ឋមន្រ្តី ហ៊ុន សែន និងលោក ហេង សំរិន ប្រធានរដ្ឋសភា ដែលបានប្រព្រឹត្តនៅស្រុកព្រៃនប់ ខេត្តព្រះសីហនុ ក្នុងឆ្នាំ ២០១៧ ហើយស្រ្តីរូបនេះត្រូវបានតុលាការខេត្តកំពង់ស្ពឺផ្តន្ទាទោសដាក់ពន្ធនាគារ ២ ឆ្នាំ។
នៅក្នុងបន្ទប់សវនាការស្រ្តីជាប់ចោទឈ្មោះ សំ សុខា ប្រាប់ចៅក្រមថា សកម្មភាពរបស់គាត់ដែលមានបង្ហោះក្នុងឃ្លីបវីដេអូនោះជាកំហុសឆ្គងរបស់គាត់ដែលពេលនោះគាត់មិនបានយល់ដឹងថា ទង្វើនោះខុសទេ។
ស្រ្តី សំ សុខា ថ្លែងថា៖ «ខ្ញុំសូមតុលាការសម្រាលទោសដល់ខ្ញុំផងព្រោះពេលខ្ញុំជាប់ក្នុងពន្ធនាគារទើបខ្ញុំដឹងថាខ្ញុំធ្វើខុស។ ខ្ញុំក៏បានសូមទោសសម្តេច ហ៊ុន សែន ដែរ»។
យោងកំណត់ហេតុរបស់តុលាការបង្ហាញថា កាលពីអំឡុងឆ្នាំ ២០១៧ មានការបង្ហោះវីដេអូមួយដែលមានរូបស្រ្តីជាប់ចោទកំពុងយកស្បែកជើងគប់ទៅលើស្លាកគណបក្សប្រជាជនកម្ពុជាស្ថិតនៅភូមិអុង ឃុំរាមស្រុកព្រៃនប់។
បន្ទាប់មកស្រ្តីជាប់ចោទបានគេចខ្លួនទៅប្រទេសថៃ ហើយត្រូវសមត្ថកិច្ចនៃប្រទេសថៃចាប់ខ្លួនស្រ្តីជាប់ចោទ និងបញ្ជូនឲ្យអាជ្ញាធរវិញ នៅថ្ងៃទី ៨ ខែ កុម្ភៈ ឆ្នាំ ២០១៨ ហើយស្រ្តីជាប់ចោទត្រូវបានសាលាដំបូងខេត្តកំពង់ស្ពឺប្រកាសសាលក្រមកាលពីថ្ងៃទី ២២ ខែ មីនា ឆ្នាំ ២០១៨ ផ្តន្ទាទោសដាក់ពន្ធនាគារ ២ ឆ្នាំនិងពិន័យជាប្រាក់ ៥ លានរៀលចូលថវិការដ្ឋ ដោយចោទពីបទប្រមាថ និងញុះញង់ឲ្យមានការរើសអើងតាមបញ្ញត្ដិមាត្រាមួយចំនួននៃក្រមព្រហ្មទណ្ឌ។
លោកព្រះរាជអាជ្ញា ប៉ែន សារ៉ាត ជាតំណាងមហាអយ្យការបានសន្និដ្ឋានថា រឿងនេះបើយោងអង្គហេតុ និងការសារភាពរបស់ជនជាប់ចោទបានប្រព្រឹត្តពិតប្រាកដមែន ហើយសាលក្រមរបស់សាលាដំបូងខេត្តកំពង់ស្ពឺប្រកាសកាលពីថ្ងៃទី ២២ ខែ មីនា ឆ្នាំ ២០១៨ ជាការត្រឹមត្រូវ។
លោក ឡោ ជុនធី មេធាវីការពារសិទ្ធិឲ្យស្រ្តីជាប់ចោទសន្និដ្ឋានដែរថា កូនក្តីលោកប្តឹងមកសាលាឧទ្ធរណ៍ព្រោះយល់ថា ការផ្តន្ទាទោសរបស់តុលាការខេត្តកំពង់ស្ពឺមានលក្ខណៈធ្ងន់ធ្ងរពេក ព្រោះសកម្មភាពរបស់គាត់មិនបានធ្វើផ្ទាល់ទៅលើបុគ្គលណាម្នាក់ឡើយគឺគ្រាន់តែធ្វើទៅលើរូបភាពប៉ុណ្ណោះ។ចំពោះការប្រើបណ្តាញសង្គមហ្វេសប៊ុកគឺគាត់មិនមែនជាអ្នកជំនាញខាងបច្ចេកវិទ្យាទេ។
លោកថា៖ «តាមពិតទៅគាត់ជាជនរងគ្រោះនឹងបច្ចេកវិទ្យាទៅវិញ ហើយម៉្យាងគាត់ភ្ញាក់ រឭកពីទង្វើដែលគាត់ធ្វើនោះហើយ។ មួយវិញទៀតគាត់មានកូនតូចៗ ២ នាក់ក្នុងបន្ទុកនិងមានម្តាយចាស់ជរាផង។សូមតុលាការពិចារណាសម្រាលទោសដល់គាត់ផង»។
លោកចៅក្រម សំរិទ្ធិ សុផល ប្រធានក្រុមប្រឹក្សាជំនុំជម្រះថ្លែងថា សាលដីកានេះនឹងប្រកាសនៅថ្ងៃទី ៣១ ឧសភា៕