ភ្នំពេញៈ សាលាឧទ្ធរណ៍បានប្រកាសសាលដីកាកំបាំងមុខឲ្យបុរស នីហ្សេរីយ៉ា ម្នាក់ជាប់គុក ៥ ឆ្នាំដដែល កាលពីថ្ងៃទី ២៧ មេសា បន្ទាប់ពីជំនុំជម្រះកាលពីថ្ងៃទី ១៩ ទាក់ទងករណីជួញដូរគ្រឿងញៀន មេតំហ្វេតាមីន ជាង ៤៤ ក្រាម បានប្រព្រឹត្ត កាលពីឆ្នាំ ២០១៦ នៅរាជធានីភ្នំពេញ។
លោកចៅក្រម ស៊ិន វិសាល ប្រធានក្រុមប្រឹក្សាជំនុំជម្រះបានអានសាលដីកាកំបាំងមុខជនជាប់ចោទថា ៖ «សំណុំរឿងដែលមានជនជាប់ចោទឈ្មោះ OLISAM WAN DU ECHEZONA SAMUEL តុលាការសម្រេចតម្កល់ទោស ៥ ឆ្នាំទុកជាបានការដដែលហើយបើជនជាប់ចោទមិនសុខចិត្តនឹងការសម្រេចនេះជនជាប់ចោទអាចប្តឹងសារទុក្ខទៅតុលាការកំពូលបន្តទៀតគិតចាប់ពីថ្ងៃប្រកាសសាលដីការយៈពេល ១ ខែ»។
តាមអង្គហេតុបង្ហាញថា កាលពីថ្ងៃទី ៤ ខែមិថុនា ឆ្នាំ ២០១៦ នគរបាលនៃមន្ទីរប្រឆាំងគ្រឿងញៀនក្រសួងមហាផ្ទៃ បានចុះបង្ក្រាបអំពើជួញដូរគ្រឿងញៀន ១ ករណីនៅស្ថានីយប្រេងឥន្ធនៈ តូតាល់ ក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ក្នុងប្រតិបត្តិការនោះសមត្ថកិច្ចបានឃាត់ខ្លួនជនជាប់ចោទឈ្មោះOLISAMWANDU ECHEZONA SAMUEL អាយុ ៣៤ ឆ្នាំ ជាជនជាតិ នីហ្សេរីយ៉ា និងនារីខ្មែរម្នាក់ ឈ្មោះ ថេង សុគន្ធី (កម្លាំងបង្កប់) ជាមួយថ្នាំញៀន មេតំហ្វេតាមីន ៤៤,១៦ ក្រាម។
សំណុំរឿងនេះ ត្រូវសាលាដំបូងរាជធានីភ្នំពេញបើកសវនាការនិងប្រកាសសាលក្រមផ្តន្ទាទោស ឈ្មោះ OLISAMWANDU ECHEZONA SAMUEL ដាក់គុក ៥ ឆ្នាំ កាលពីថ្ងៃទី ២៦ ខែឧសភា ឆ្នាំ ២០១៧ ដោយចោទពីបទ «ជួញដូរដោយខុសច្បាប់នូវសារធាតុញៀន» តាមបញ្ញត្តិមាត្រា ៤០ ច្បាប់ស្តីពីការត្រួត ពិនិត្យគ្រឿងញៀន។
គួររំឮកដែរថា កាលពីសវនាការនៅសាលាឧទ្ធរណ៍ ជនជាប់ចោទបានឆ្លើយថា គាត់ពិតជាបានកាន់កញ្ចប់គ្រឿងញៀននោះមែន ប៉ុន្តែ មុនដំបូងគាត់ ត្រូវបានឈ្មោះអូ យូតូ ជាជនជាតិដូចគាត់ពឹងឲ្យយក កញ្ចប់នោះទៅឲ្យបុរសខ្មែរម្នាក់។ គាត់សូមតុលាការបន្ថយទោសគាត់ត្រឹម ៤ ឆ្នាំបានហើយ។
ទោះយ៉ាងណា កាលពីថ្ងៃជំនុំជម្រះនោះដែរ លោកព្រះរាជអាជ្ញា ជា ម៉េត តំណាងមហាអយ្យការសន្និដ្ឋានថា ជនជាប់ចោទបានសុំបន្ថយទោស ប៉ុន្តែគាត់បដិសេធថា មិនដឹងអីវ៉ាន់នោះជាគ្រឿងញៀនទេ។ ប៉ុន្តែសមត្ថកិច្ចចាប់បានជាក់ស្តែង។
លោកប្រាប់ចៅក្រមថា តុលាការថ្នាក់ក្រោមដាក់ទោសជនជាប់ចោទ ៥ ឆ្នាំនេះ មានលក្ខណៈត្រឹមត្រូវហើយ ដូច្នេះសូមក្រុមប្រឹក្សាជំនុំជម្រះពិចារណាតាមច្បាប់។
នៅក្នុងថ្ងៃជំនុំជម្រះនោះដែរ លោក គីន វិបុល មេធាវីចាត់តាំងការពារសិទ្ធិឲ្យជនជាប់ចោទបានសន្និដ្ឋានថា កូនក្តីលោកត្រូវបានគេទូរស័ព្ទឲ្យទៅយកឯកសារដើម្បីយកទៅឲ្យបុរសខ្មែរម្នាក់។ ប៉ុន្តែពេលគាត់ប្រគល់អីវ៉ាន់នោះឲ្យគេក៏ត្រូវសមត្ថកិច្ចចាប់តែម្តង។
លោកថ្លែងថា៖ «ទណ្ឌកម្មទោសនេះតាមច្បាប់ចាប់ពី ៥ ឆ្នាំទៅ ១០ ឆ្នាំ ហើយតុលាការដាក់ទោសកូនក្តីខ្ញុំ ៥ ឆ្នាំគឺទាបហើយ ប៉ុន្តែគាត់នៅតែមិនសុខចិត្ត ទើបប្តឹងទាស់មកឧទ្ធរណ៍។ សូមតុលាការជួយបន្ថយទោសព្យួរដល់គាត់ ១ ឆ្នាំផង»៕