ភ្នំពេញៈ ចៅក្រមសាលាឧទ្ធរណ៍បានប្រកាសសាលដីកាតម្កល់ទោសអតីតអភិបាលខេត្តតាកែវលោក ឡាយ វណ្ណៈ និងឈ្មោះ ឡាយ ណារិទ្ធ រួមទាំងអ្នកបើករថយន្តគាត់ ២ នាក់ទៀតឲ្យជាប់ពន្ធនាគារម្នាក់ៗពី ២ ឆ្នាំដល់ ១៣ ឆ្នាំ ដូចសាលក្រមសាលាដំបូងរាជធានីភ្នំពេញដដែល បន្ទាប់ពីជំនុំជម្រះពីថ្ងៃទី ១១ មីនា ឆ្នាំនេះ ពាក់ព័ន្ធការស្លាប់ស្ត្រីឈ្មោះ ចេវ សុវឌ្ឍនា ដែលជាកំណាន់លោក ឡាយ វណ្ណៈ។
ក្នុងបន្ទប់សវនាការពីម្សិលមិញលោកចៅក្រម យន់ ណារ៉ុង បានប្រកាសសាលដីកាចំពោះមុខលោក ឡាយ ណារិទ្ធ និងអ្នកបើករថយន្ត ២ នាក់ ខណៈអវត្តមានលោក ឡាយ វណ្ណៈ ថា ក្រោយពីបានបើកសវនាការសួរដេញដោលជនជាប់ចោទទាំង ៤ នាក់មកក្រុមប្រឹក្សាជំនុំជម្រះយល់ឃើញថា បើទោះជាក្រុមជនជាប់ចោទឆ្លើយបដិសេធពីការសម្លាប់ និងពីការបញ្ជាឲ្យរៀបចំសាកសពដើម្បីលាក់តម្រុយនៃការសម្លាប់ស្ត្រីឈ្មោះ ចេវ សុវឌ្ឍនា ក្តីក៏មិនមែនជាចម្លើយដោះបន្ទុកពិតដែលអាចឲ្យតុលាការជឿបានឡើយ។
លោកចៅក្រមបានថ្លែងថា បើផ្អែកលើរបាយការណ៍ស៊ើបអង្កេតរបស់នាយកដ្ឋានព្រហ្មទណ្ឌក្រសួងមហាផ្ទៃបង្ហាញថាឈ្មោះ ឡាយ វណ្ណៈ និង ឈ្មោះ ឡាយ ណារិទ្ធ ពិតជាបានសម្លាប់ជនរងគ្រោះឈ្មោះ ចេវ សុវឌ្ឍនា ពិតមែន។ ចំណែកឈ្មោះ ជឹម វុធ និងឈ្មោះ ម៉េន សាម៉ៃ ក្រោយពីក្រុមប្រឹក្សាជំនុំជម្រះសិក្សាលើអង្គហេតុមកយល់ឃើញថា ការចោទប្រកាន់របស់សាលាដំបូងរាជធានីភ្នំពេញ ពីបទលាក់កំបាំងតម្រុយគឺជាការត្រឹមត្រូវ។
ម្យ៉ាងផ្អែកលើចម្លើយសាក្សីឈ្មោះ ចាន់រី (ប្រពន្ធ ជឹម វុធ) គឺស៊ីចង្វាក់គ្នានឹងរបាយការណ៍សមត្ថកិច្ចក្រសួងមហាផ្ទៃ។
លោកបញ្ជាក់ថា៖ «ហេតុដូច្នេះតុលាការសម្រេចតម្កល់ទោសជនជាប់ចោទ ឡាយ វណ្ណៈ ចំនួន ១៣ ឆ្នាំ និង ឡាយ ណារិទ្ធ ១០ ឆ្នាំដដែល។ ចំណែកឈ្មោះ ម៉េន សាម៉ៃ និងឈ្មោះ ជឹម វុធ ជាប់ពន្ធនាគារម្នាក់ៗ ២ ឆ្នាំដដែល។
រឿងនេះបើជនជាប់ចោទមិនសុខចិត្តអាចប្តឹងសារទុក្ខទៅតុលាការកំពូលបានគិតពីថ្ងៃប្រកាសសាលដីកា ១ ខែ»។
ថ្លែងបញ្ជាក់នៅក្រៅបន្ទប់សវនាការ បន្ទាប់ពីចូលស្តាប់ការប្រកាសសាលដីកានេះទាំងលោកស្រីមេធាវី សារីបុត្ត ចរិយា ដែលការពារក្ដី លោក ឡាយ វណ្ណៈ និង លោក ធុយ សុគន្ធ ជាមេធាវី លោក ឡាយ ណារិទ្ធ និងអ្នកពាក់ព័ន្ធពុំបានបង្ហាញយោបល់អ្វីជុំវិញសាលដីការបស់សាលាឧទ្ធរណ៍នេះទេ។
ក៏ប៉ុន្តែលោក ធុយ សុគន្ធ បានបញ្ជាក់ថា៖ «ប៉ុន្តែខ្ញុំបានសួរកូនក្តីខ្ញុំហើយគឺពួកគាត់ទាំង ៤ នាក់នឹងផ្តិតមេដៃប្តឹងនៅថ្ងៃនេះដើម្បីប្តឹងសារទុក្ខទៅតុលាការកំពូលទៀត»។
គួររំឭកថាលោកចៅក្រម យន់ ណារ៉ុង បានសំអាងលើចម្លើយរបស់ស្ត្រីឈ្មោះ ចាន់រី និងប្តីគាត់ ឈ្មោះ ជឹម វុធ ដែលបានឆ្លើយនៅក្រសួងមហាផ្ទៃថា នៅថ្ងៃកើតហេតុលោក ឡាយ វណ្ណៈ និងលោក ឡាយ ណារិទ្ធ ជាបងប្រុសលោកឡាយ វណ្ណៈ បានចូលក្នុងបន្ទប់ស្ត្រីរងគ្រោះ ចេវ សុវឌ្ឍនា ប្រមាណជាកន្លះម៉ោង។ លុះដើរចេញពីបន្ទប់វិញក៏ប្រាប់ពួកគាត់ (ជឹម វុធ) ថា៖ «អាវឌ្ឍនាងាប់ហើយ ពួកឯងចាត់ចែងយកវាទៅចងកទៅ»។
ទោះយ៉ាងណាចម្លើយនេះត្រូវបានជនជាប់ចោទឈ្មោះ ជឹម វុធ បានបដិសេធវិញកាលពីបើកសវនាការជំនុំជម្រះនៅសាលាដំបូងរាជធានីភ្នំពេញដោយគាត់ថា ជាចម្លើយមិនពិត ព្រោះមានការបង្ខំពីសមត្ថកិច្ច។
កាលពីថ្ងៃទី ១១ មីនា ដែលជាថ្ងៃបើកសវនាការនៅសាលាឧទ្ធរណ៍លោក ឡាយ វណ្ណៈ បានរៀបរាប់ថាមុនមានហេតុការណ៍នេះកើតឡើងនៅថ្ងៃទី ២២ ខែ មករា ឆ្នាំ ២០១៨ នោះគឺរូបគាត់ក្នុងនាមជាអភិបាលខេត្តតាកែវបានទៅបិទវគ្គសន្និបាតបូកសរុបការងាររបស់មន្ទីរអប់រំយុវជន និងកីឡាខេត្តតាកែវ។
បន្ទាប់ពីចប់កម្មវិធីលោកបានឡើងរថយន្តដោយមានឈ្មោះ ម៉េន សាម៉ៃ ជាអ្នកបើកបរជូនគាត់ទៅមើលសំណង់សួនច្បារនៅក្បែរវិមានឯករាជ្យទីរួមខេត្តតាកែវ។ លុះដល់ពេលរសៀលថ្ងៃដដែលគាត់បានឆៀងចូលផ្ទះរបស់នាង ចេវ សុវឌ្ឍនា ដូច្នេះមានតែគាត់ និងឈ្មោះ ម៉េន សាម៉ៃ ជាអ្នកបើករថយន្តឲ្យគាត់ប៉ុណ្ណោះដែលបានចូលទៅផ្ទះកើតហេតុគឺគ្មានវត្តមានបងប្រុសគាត់ឈ្មោះ ឡាយ ណារិទ្ធ ទេ។
លោក ឡាយ វណ្ណៈ បន្តថារឿងនេះបានកើតឡើងដូចការរៀបរាប់របស់គាត់ ប៉ុន្តែក្រោយពីនគរបាលនៅក្រសួងមហាផ្ទៃសួរចម្លើយសាក្សីដែលមាន ម៉េន សាម៉ៃ,ឈ្មោះ ជីម វុធ និង ស្ត្រីឈ្មោះ ចាន់ រី ស្រាប់តែមានចម្លើយដូចៗគ្នាថា ពួកគេបានឃើញបងប្រុសរបស់គាត់ (ឡាយ ណារិទ្ធ) ជិះរថយន្តជាមួយគាត់ចូលទៅផ្ទះនាង ចេវ សុវឌ្ឍនាទៅវិញ។ កុំថាឡើយគាត់សម្លាប់នាងសូម្បីតែប្រើហិង្សាវាយទៅលើប្អូនស្រី ចេវ សុវឌ្ឍនា ក៏គាត់មិនដែលប្រព្រឹត្តដែរ។
ដោយឡែកលោក ឡាយ ណារិទ្ធិ បានឆ្លើយប្រាប់ចៅក្រមសាលាឧទ្ធរណ៍កាលពីថ្ងៃជំនុំជម្រះដែរថា ការដែលចោទថានៅមុនថ្ងៃកើតហេតុមានវត្តមានរបស់លោកជិះរថយន្តជាមួយប្អូនប្រុសរបស់គាត់ (ឡាយ វណ្ណៈ) នោះគឺមិនពិតទេ ព្រោះលោកមិនដែលស្គាល់ផ្ទះ ចេវ សុវឌ្ឍនា ទេ។ ព្រោះក្រោយកើតហេតុទម្រាំតែរកផ្ទះឃើញ គាត់បានសួរគេសួរឯងទើបទៅដល់ផ្ទះនោះ។
គួររំឭកផងដែរថា លោក ឡាយ វណ្ណៈ ត្រូវបានសាលាដំបូងរាជធានីភ្នំពេញប្រកាសសាលក្រមនៅថ្ងៃទី ២ កញ្ញា ឆ្នាំ ២០១៩ ផ្តន្ទាទោសដាក់ពន្ធនាគារ ១៣ ឆ្នាំ និងលោក ឡាយ ណារិទ្ធ ដាក់ជាប់ពន្ធនាគារ ១០ ឆ្នាំ ពីបទឃាតកម្មតាមមាត្រា ១៩៩។ ចំណែកអ្នកបើកឡានឲ្យ លោក ឡាយ វណ្ណៈ ឈ្មោះ ម៉េន សាម៉ៃ និងអ្នកបម្រើម្នាក់ឈ្មោះ ជឹម វុធ វិញត្រូវចៅក្រមសម្រេចផ្ដន្ទាទោសដាក់ពន្ធនាគារម្នាក់ៗ ២ ឆ្នាំ ពីបទលាក់បាំងតម្រុយតាមមាត្រា ៥៣២ នៃក្រមព្រហ្មទណ្ឌ៕