.jpg)
លោក គង់ ម៉ាស់ (កណ្តាល) នៅឧទ្ធរណ៍ពីម្សិលមិញ។ រូបថត គឹម សារុំ
ភ្នំពេញៈ សាលាឧទ្ធរណ៍កាលពីម្សិលមិញបានសម្រេចតម្កល់ទោសឲ្យលោក គង់ ម៉ាស់ សមាជិកក្រុមការងារអតីតគណបក្សសង្គ្រោះជាតិខេត្តស្វាយរៀងជាប់ពន្ធនាគារ ១ ឆ្នាំកន្លះដដែល បន្ទាប់ពីជំនុំជម្រះកាលពីថ្ងៃទី ១៧ ខែមីនាពាក់ព័ន្ធបទប្រមាថ និងញុះញង់ឲ្យមានភាពវឹកវរប្រព្រឹត្តកាលពីអំឡុងខែមេសាដល់ខែតុលាឆ្នាំ ២០១៨ នៅរាជធានីភ្នំពេញ។
លោកចៅក្រម ញូង ធុល ប្រធានក្រុមប្រឹក្សាជំនុំជម្រះបានអានសាលដីកានៅចំពោះមុខលោក គង់ ម៉ាស់ ថាក្រោយពីបានសួរដេញដោលជនជាប់ចោទ និងក្រោយពីបានស្តាប់ការសន្និដ្ឋានរបស់មេធាវី និងពីតំណាងមហាអយ្យការអមសាលាឧទ្ធរណ៍មក ក្រុមប្រឹក្សាជំនុំជម្រះយល់ឃើញថា ក្នុងពេលជំនុំជម្រះជនជាប់ចោទបានសារភាពថា ខ្លួនពិតជាបានសរសេរ និងបង្ហោះសារក្នុងន័យប្រមាថរិះគន់ដល់ថ្នាក់ដឹកនាំរាជរដ្ឋាភិបាលកម្ពុជាប្រាកដមែន។
លោកបន្តថា បើទោះជាជនជាប់ចោទសារភាពទទួលស្គាល់កំហុសក្តី តែការសម្រេចផ្តន្តាទោសរបស់សាលាដំបូងរាជធានីភ្នំពេញគឺមានកម្រិតអតិបរមានៃទោស (បទញុះញង់ឲ្យមានការរើសអើងដោយច្បាប់កម្រិតទោសពី ១ ឆ្នាំទៅ ៣ ឆ្នាំ)។ ចំណែកបទប្រមាថក៏ក្រុមប្រឹក្សាជំនុំជម្រះយល់ថា ការផ្តន្ទាទោសរបស់សាលាដំបូងរាជធានីភ្នំពេញតាមមាត្រា ៤៩៦ និង ៥០២ (ច្បាប់កម្រិតទោសជាប់ពន្ធនាគារពី ១ ថ្ងៃទៅ ៦ ថ្ងៃ) នៃក្រមព្រហ្មទណ្ឌនេះក៏មានលក្ខណៈត្រឹមត្រូវតាមច្បាប់ដែរ។
លោកថ្លែងថា៖ «ដូច្នេះតុលាការសម្រេចតម្កល់ទោសដល់ជនជាប់ចោទ ១ ឆ្នាំ ៦ ខែដដែល។ បើជនជាប់ចោទមិនសុខចិត្តមានសិទ្ធិប្តឹងទៅតុលាការកំពូលគិតពីថ្ងៃប្រកាសសាលដីកានេះ ១ ខែ»។
លោក គង់ ម៉ាស់ បានថ្លែងបន្ទាប់ពីដើរចេញពីបន្ទប់សវនាការពីម្សិលមិញថា លោកមិនអាចទទួលយកការសម្រេចដែលសាលាឧទ្ធរណ៍មិនបន្ថយទោសតាមការស្នើសុំរបស់លោកនេះបានទេ។ លោកថា៖ «ទោះទោសខ្ញុំនៅសល់តែ ៤ ខែទៀតក្តី ខ្ញុំនឹងពិភាក្សាជាមួយមេធាវីរបស់ខ្ញុំ ហើយខ្ញុំនឹងប្តឹងសារទុក្ខទៅតុលាការកំពូលបន្តទៀត»។
ស្ត្រីម្នាក់អាយុ ២៨ ឆ្នាំដែលជាភរិយារបស់លោក គង់ ម៉ាស់ បានថ្លែងបន្ទាប់ពីដើរចេញពីបន្ទប់សវនាការពីម្សិលមិញថា តុលាការមិនបានផ្តល់យុត្តិធម៌ដល់ប្តីរបស់អ្នកស្រីនោះទេ ពីព្រោះប្តីរបស់អ្នកស្រីមិនបានធ្វើអ្វីបង្កផលប៉ះពាល់ដល់សង្គមនោះទេ។
បើតាមកំណត់ហេតុរបស់តុលាការលោក គង់ ម៉ាស់ អាយុ ៣២ ឆ្នាំ បានប្រើ និងបង្កើតគណនីហ្វេសប៊ុកចំនួន ៥ ហើយបានសរសេររិះគន់ដល់ប្រមុខរាជរដ្ឋាភិបាលប្រព្រឹត្តនៅរាជធានីភ្នំពេញក្នុងអំឡុងខែមេសា និងខែតុលាឆ្នាំ ២០១៨។ ក្រោយឃាត់ខ្លួនសមត្ថកិច្ចក៏បានរកឃើញខិត្តប័ណ្ណចំនួន ១០ ម៉ឺនសន្លឹកនៅខេត្តស្វាយរៀងដែលនៅក្នុងខិត្តប័ណ្ណនោះមានសរសេរក្នុងន័យជាការញុះញង់។
សំណុំរឿងនេះត្រូវបានសាលាដំបូងរាជធានីភ្នំពេញប្រកាសសាលក្រមនៅថ្ងៃទី ១៨ ខែតុលាឆ្នាំ ២០១៩ សម្រេចផ្តន្ទាទោសឈ្មោះ គង់ ម៉ាស់ ដាក់ពន្ធនាគារ ១ ឆ្នាំ ៦ ខែក្រោមការចោទប្រកាន់ពីបទប្រមាថ និងញុះញង់ឲ្យមានការរើសអើងតាមបញ្ញត្តិមាត្រា ៤៩៦ និងមាត្រា ៥០២ នៃក្រមព្រហ្មទណ្ឌ។
ដោយសារតែអ្វីដែលលោក គង់ ម៉ាស់ បានបង្ហោះនៅលើហ្វេសប៊ុករបស់លោកបានចម្លង ឬក៏ចែករំលែកពីហ្វេសប៊ុករបស់ថ្នាក់ដឹកនាំអតីតគណបក្សសង្គ្រោះជាតិមានដូចជាលោក សម រង្ស៊ី, លោក ហូរវ៉ាន់ និង លោក កាក់ គុម្ភា ក៏ត្រូវបានតុលាការសម្រេចផ្តន្ទាទោសដាក់ពន្ធនាគារក្នុងម្នាក់ៗ ១ ឆ្នាំ ៨ ខែផងដែរ ដោយចោទពីបទផ្តើមគំនិតញុះញង់ឲ្យមានការរើសអើងតាមបញ្ញត្តិមាត្រា ៤៩៦, ៥០២ នៃក្រមព្រហ្មទណ្ឌ និងបង្គាប់ឲ្យសមត្ថកិច្ចតាមចាប់ខ្លួន លោក សម រង្ស៊ី, លោក ហូរ វ៉ាន់ និងលោក កាក់ គុម្ភា ដើម្បីយកមកផ្តន្ទាទោសដាក់ពន្ធនាគារ៕
