.jpg)
ជនជាប់ចោទ សន ពៅ នៅសាលាឧទ្ធរណ៍កាលពីម្សិលមិញ។ រូបថត គឹម សារុំ
ភ្នំពេញៈ បន្ទាប់ពីជំនុំជម្រះកាលពីថ្ងៃទី ១៨ មីនាសាលាឧទ្ធរណ៍កាលពីម្សិលមិញបានប្រកាសសាលដីកាកំបាំងមុខជនជាប់ចោទម្នាក់ក្នុងចំណោម ២ នាក់ឲ្យជាប់ទោស ១ ជីវិតដែលការសម្រេចនេះស្របតាមសាលក្រមរបស់សាលាដំបូងខេត្តបាត់ដំបងក្នុងសំណុំរឿងសម្លាប់ជនរងគ្រោះម្នាក់យកលុយទិញថ្នាំញៀនប្រព្រឹត្តនៅក្នុងភូមិស្វាយ ឃុំបឹងរាំង ស្រុកកំរៀងកាលពីឆ្នាំ ២០១៤។
ក្នុងពេលប្រកាសសាលដីកានេះលោកចៅក្រម ស៊ិន វិសាល បានថ្លែងថា សំណុំរឿងដែលមានជនជាប់ចោទឈ្មោះ សន ពៅ អាយុ ២៩ ឆ្នាំគឺបានជំនុំជម្រះកាលពីថ្ងៃទី ១៨ មីនាកន្លងទៅ។ កាលពីថ្ងៃជំនុំជម្រះ ជនជាប់ចោទបានសារភាពនូវទង្វើរបស់ខ្លួន និងបានរៀបរាប់ពីសកម្មភាពប្រព្រឹត្តទៅលើជនរងគ្រោះឈ្មោះ លី សុវណ្ណារិទ្ធិ ពិតប្រាកដមែន។
លោកបានបន្តថា ការសម្រេចនេះបានធ្វើឡើងដោយក្រុមប្រឹក្សាជំនុំជម្រះ ក្រោយពីបានសួរដេញដោលជនជាប់ចោទ និងបានស្តាប់សេចក្តីសន្និដ្ឋានរបស់មេធាវីការពារសិទ្ធិឲ្យជនជាប់ចោទព្រមទាំងបានស្តាប់សេចក្តីសន្និដ្ឋានរបស់តំណាងមហាអយ្យការសាលាឧទ្ធរណ៍។
លោកថា៖ «តុលាការសម្រេចតម្កល់សាលក្រមរបស់សាលាដំបូងខេត្តបាត់ដំបងនៅដដែល។ ប៉ុន្តែជនជាប់ចោទមានសិទ្ធិប្តឹងសារទុក្ខបន្តទៀតទៅតុលាការកំពូលរយៈពេល ១ ខែគិតចាប់ពីថ្ងៃប្រកាសសាលដីកានេះ»។
ពាក់ព័ន្ធនឹងការប្រកាសសាលដីកានេះលោក នូ ចន្ថា ជាមេធាវី ការពារសិទ្ធិឲ្យជនជាប់ចោទ សន ពៅ បានប្រាប់ក្រោយពេលលោកចូលស្តាប់ការប្រកាសសាលដីកានេះថា អ្វីដែលសាលាឧទ្ធរណ៍សម្រេចនេះគឺជាឆន្ទានុសិទ្ធិរបស់តុលាការដែលលោកយល់ឃើញពាក់ព័ន្ធផ្លូវច្បាប់។
កាលពីថ្ងៃជំនុំជម្រះជនជាប់ចោទឈ្មោះ សន ពៅ ធ្លាប់បានរៀបរាប់ប្រាប់ចៅក្រមថា រូបគេជាអ្នកប្រើប្រាស់គ្រឿងញៀន ហើយកាលពីថ្ងៃទី ១១ ខែមេសា ឆ្នាំ ២០១៤ មុនពេលកើតហេតុ គាត់ និងគូកនម្នាក់ទៀតឈ្មោះ សុខ ចាន់ អាយុ ២៨ ឆ្នាំបានជួបជុំគ្នាផឹកស្រានៅភូមិស្វាយ ឃុំបឹងរាំង ស្រុកកំរៀង។ ខណៈកំពុងផឹកនោះឈ្មោះ សុខ ចាន់ បានប្រាប់គាត់ឲ្យទូរស័ព្ទហៅជនរងគ្រោះឈ្មោះ លីសុវណ្ណារិទ្ធិ ដែលជាកូនថៅកែចងការប្រាក់នៅស្រុកកំរៀងឲ្យមកជួបពួកគេដើម្បីទិញថ្នាំញៀនយកមកជក់ជាមួយគ្នា។
សន ពៅ បានបន្ដថា បន្ទាប់ពីពិភាក្សាគ្នារួចខ្លួនក៏បានទូរស័ព្ទហៅជនរងគ្រោះឲ្យមកជួប។ លុះជនរងគ្រោះមកតាមការណាត់ហើយនោះ ខ្លួន និងឈ្មោះ សុខ ចាន់ បានបញ្ឆោតជនរងគ្រោះឲ្យឌុបម៉ូតូដោយយកលេសថា ទៅរកទិញថ្នាំញៀន ហើយនៅពេលធ្វើដំណើរដល់កន្លែងស្ងាត់តាមផ្លូវលំមួយក្នុងភូមិ-ឃុំកើតហេតុខាងលើ និងជាទីតាំងជិតស្រះទឹក ១ ផង ស្រាប់តែឈ្មោះ សុខ ចាន់ បានយកដុំថ្មដែលត្រៀមទុករួចជាស្រេចមកវាយចំកញ្ចឹងករបស់ជនរងគ្រោះតែម្ដង។ ប៉ុន្តែដោយជនរងគ្រោះនៅមានស្មារតីក៏បានឈប់ម៉ូតូហើយបម្រុងតដៃវិញ តែពេលនោះខ្លួនក៏ស្ទុះទៅចាប់ដៃទាំង ២ របស់ជនរងគ្រោះក្រៀកទៅក្រោយ ដោយបើកដៃឲ្យឈ្មោះ សុខ ចាន់ វ៉ៃរហូតស្លាប់រួចបានយកលុយមួយចំនួនរួមទាំងខ្សែក ១ ខ្សែ និងចិញ្ចៀនមាស ១ វង់ ហើយអូសជនរងគ្រោះនោះទម្លាក់ចូលទៅក្នុងស្រះទឹកបំបិទភ័ស្ដុតាង ដើម្បីបង្វែងដានសមត្ថកិច្ចកុំឲ្យសង្ស័យ។ ព្រោះពួកគេគិតថា បើទុកឲ្យជនរងគ្រោះឲ្យនៅមានជីវិត គឺខ្លាចគេប្តឹងសមត្ថកិច្ចឲ្យចាប់ពួកគេ។ ប៉ុន្តែ ១ ថ្ងៃក្រោយមករូបគេ (សន ពៅ) ក៏ត្រូវបានសមត្ថកិច្ចចាប់ខ្លួននៅភូមិកើតហេតុ នោះតែម្ដង រីឯឈ្មោះ សុខ ចាន់ បានគេចខ្លួនបាត់រហូតបច្ចុប្បន្ន។
សំណុំរឿងនេះត្រូវបានសាលាដំបូងខេត្តបាត់ដំបងជំនុំជម្រះ ហើយបានប្រកាសសាលក្រមកាលពីថ្ងៃទី ២៩ ខែមិថុនា ឆ្នាំ ២០១៦ ដោយបានសម្រេចផ្តន្ទាទោសជនជាប់ចោទទាំង ២ ក្នុងម្នាក់ៗឲ្យជាប់ពន្ធនាគារ ១ ជីវិត ក្រោមការចោទប្រកាន់ពីបទឃាតកម្មគិតទុកជាមុនតាមមាត្រា ២០០ នៃក្រមព្រហ្មទណ្ឌ និងបង្គាប់ឲ្យសមត្ថកិច្ចស្វែងរកចាប់ខ្លួនឈ្មោះ សុខចាន់ យកមកដាក់ពន្ធនាគារគិតចាប់ពីថ្ងៃប្រកាសសាលក្រមនោះមក៕
