.jpg)
ស្ត្រីជាប់ចោទពេលនាំមកជំនុំជម្រះនៅសាលាឧទ្ធរណ៍កន្លងមក។ រូប សារុំ
ភ្នំពេញៈ សាលាឧទ្ធរណ៍កាលពីថ្ងៃទី ៣១ ឧសភា បានប្រកាសសាលដីកាតម្កល់ទោស ២ ឆ្នាំដដែលដល់ស្រ្តីជាប់ចោទម្នាក់ បន្ទាប់ពីជំនុំជម្រះកាលពីដើមខែឧសភា ពាក់ព័ន្ធនឹងករណីគប់ស្បែកជើងលើស្លាកគណបក្សប្រជាជនកម្ពុជាដែលមានរូបលោកនាយករដ្ឋមន្រ្តី ហ៊ុន សែន និងលោក ហេង សំរិន ប្រព្រឹត្តកាលពីឆ្នាំ ២០១៧ នៅស្រុកព្រៃនប់ ខេត្តព្រះសីហនុ។
លោកចៅក្រម សំរិទ្ធ សុផល បានអានសាលដីកានៅចំពោះមុខជនជាប់ចោទឈ្មោះ សំ សុខា ថា សំណុំរឿងនេះ ក្រោយពីបានសួរដេញដោល ជនជាប់ចោទនិងក្រោយពីបានស្តាប់ការសន្និដ្ឋានរបស់មេធាវីការពារសិទ្ធិឲ្យជនជាប់ចោទមកក្រុមប្រឹក្សាយល់ឃើញថា ការសម្រេចរបស់សាលាដំបូងខេត្តកំពង់ស្ពឺមានលក្ខណៈ ត្រឹមត្រូវតាមច្បាប់ហើយ។
លោកថា៖ «ដូច្នេះសាលាឧទ្ធរណ៍សម្រេចតម្កល់សាលក្រមរបស់សាលាដំបូងខេត្តកំពង់ស្ពឺទុកជាបានការ»។
យោងតាមកំណត់ហេតុរបស់តុលាការបង្ហាញថា កាលពីឆ្នាំ ២០១៧ មានការបង្ហោះវីដេអូមួយដែលមានរូបស្រ្តីជាប់ចោទកំពុងធ្វើសកម្មភាពយកស្បែកជើងគប់ទៅលើស្លាកគណបក្សប្រជាជនកម្ពុជានៅភូមិអុង ឃុំរាមស្រុកព្រៃនប់។
បន្ទាប់មក ស្រ្តីជាប់ចោទបានគេចខ្លួនទៅប្រទេស ថៃ ហើយត្រូវសមត្ថកិច្ចនៃប្រទេសថៃចាប់បញ្ជូនឲ្យអាជ្ញាធរកម្ពុជាវិញនៅថ្ងៃទី ៨ ខែ កុម្ភៈ ឆ្នាំ ២០១៨ ហើយត្រូវបានបញ្ជូនទៅសាលាដំបូងខេត្តកំពង់ស្ពឺជាខេត្តដែលស្រី្តជាប់ចោទរស់នៅ។
សំណុំរឿងនេះត្រូវបានសាលាដំបូងខេត្តកំពង់ស្ពឺ សម្រេចផ្តន្ទាទោសដាក់ពន្ធនាគារ ២ ឆ្នាំ និងពិន័យជាប្រាក់ ៥ លានរៀលចូលថវិការដ្ឋ កាលពីថ្ងៃទី ២២ ខែ មីនា ឆ្នាំ ២០១៨ ដោយចោទប្រកាន់ពីបទប្រមាថនិងញុះញង់ឲ្យមានការរើសអើងតាមបញ្ញត្ដិមាត្រាមួយចំនួននៃក្រមព្រហ្មទណ្ឌ។
កាលពីថ្ងៃជំនុំជម្រះនៅសាលាឧទ្ធរណ៍ស្រ្តីជាប់ចោទ សំ សុខា ធ្លាប់បានថ្លែងថា៖ «ខ្ញុំសូមតុលាការសម្រាលទោសដល់ខ្ញុំផង ព្រោះពេលខ្ញុំជាប់ក្នុងពន្ធនាគារទើបខ្ញុំដឹងថា ខ្ញុំធ្វើខុស។ ខ្ញុំក៏បានសូមទោសសម្តេច ហ៊ុន សែន រួចហើយដែរ»៕
