The Phnom Penh Post Search

Search form

Logo of Phnom Penh Post newspaper Phnom Penh Post - ឧទ្ធរណ៍​តម្កល់​សាលក្រម​ឲ្យ​លោក​ នី ចរិយា ​​ជាប់​ទោស​ ៦ ​ខែ

ឧទ្ធរណ៍​តម្កល់​សាលក្រម​ឲ្យ​លោក​ នី ចរិយា ​​ជាប់​ទោស​ ៦ ​ខែ

Content image - Phnom Penh Post
លោក នី ចរិយា ពេល​នាំ​ចូល​សាលា​ឧទ្ធរណ៍​ពី​ម្សិលមិញ។ ផា លីណា

ឧទ្ធរណ៍​តម្កល់​សាលក្រម​ឲ្យ​លោក​ នី ចរិយា ​​ជាប់​ទោស​ ៦ ​ខែ

ភ្នំពេញៈ សាលា​ឧទ្ធរណ៍​កាលពី​ម្សិលមិញ ​បាន​សម្រេច​តម្កល់​សាលក្រម​របស់​សាលា​ដំបូង​រាជធានី​ដែល​បាន​ផ្តន្ទាទោស​លោក​ នី ចរិយា ​អគ្គលេខាធិការរង គជប ឱ្យ​ជាប់​ពន្ធនាគារ ៦ ខែ​ពាក់ព័ន្ធ​នឹង​បទ​បរិហារ​កេរ្តិ៍​ជា​សាធារណៈ​ទៅ​លើ​មន្ត្រី​តុលាការ​ខេត្ត​សៀមរាប​​ ២ ​រូប​កាលពី​ឆ្នាំ​ ២០១៥ ខណៈ​ដែល​មេធាវី​នៅ​តែ​ចាត់ទុក​ថា​ជា​រឿង​អយុត្តិធម៌​ហើយ​អ្នក​វិភាគ​ និង​អង្គការ​សិទ្ធិ​មនុស្ស​ចាត់​​ទុក​​ថា​គឺជា​រឿង​នយោបាយ​ដែល​ត្រូវ​​តែ​ធ្វើការ​ដោះស្រាយ​តាមរយៈ​ការ​សម្រប​សម្រួល​នយោបាយ​។

ចៅក្រម ជំនុំជម្រះ​នៃ​សាលា​ឧទ្ធរណ៍​លោក ប្លង់ សំណាង បាន​ប្រកាស​សាលដីកា​ត្រឹម​តែ ៥ នាទី​ដោយ​សម្រេច​តម្កល់​សាលក្រម​របស់​សាលា​ដំបូង​រាជធានី​ទុក​ជា​បាន​ការ​ដោយ​ពុំ​បាន​បញ្ជាក់​ពី​មូលហេតុ​ច្បាស់លាស់ និង​ទុក​សិទ្ធិ​ឱ្យ​មេធាវី​ប្តឹង​ទាស់​រយៈពេល​មួយ​សប្តាហ៍​។

លោក សំ សុគង់ មេធាវី​ការពារ​លោក ចរិយា បាន​ថ្លែង​ជា​ដដែលៗ​ថា​នេះ​​ជា​រឿង​អយុត្តិធម៌​សម្រាប់​កូនក្តី​របស់​លោក​។​

លោក​ថា៖ «​សេចក្តី​សម្រេច​នេះ​មិន​បាន​ផ្តល់​ភាពយុត្តិធម៌​ដល់​កូន​ក្តី និង​មិន​អាច​ទទួល​យក​​បាន​ទេ​ហើយ​មេធាវី​ការពារ​ក្តី​នឹង​ជួប​ពិភាក្សា​ជាមួយ​លោក នី ចរិយា ក្នុង​អាទិត្យ​នេះ​ដើម្បី​ពិភាក្សា​អំពី​សិទ្ធិ​ និង​ផ្លូវ​ច្បាប់​ទាក់ទង​ និង​ប្តឹង​សារទុក្ខ​ចំពោះ​សាលដីកា​នេះ»។

លោក​​បាន​គូស​បញ្ជាក់​ថា ​តុលាការ​ទាំង​ពីរ​ថ្នាក់​ពុំ​មាន​ភ័ស្តុតាង​រឹងមាំ​ដើម្បី​ដាក់​បន្ទុក​កូនក្តី​​របស់​លោក​នោះ​ទេ។ លោក​ថា៖ «​ភ័ស្តុតាង​ដែល​មាន​ក្នុង​សំណុំ​រឿង​លោក នី ចរិយា ខ្ញុំ​យល់​ឃើញ​ថា​មិន​ទាន់​មាន​លក្ខណៈ​គ្រប់គ្រាន់​ហើយ​មិន​ច្បាស់លាស់​ហើយ​ជា​ភ័ស្តុតាង​មួយ​ដែល​មិន​អាច​ដាក់​បន្ទុក​បាន​ទេ»។

លោក ចរិយា ដែល​​ត្រូវ​បាន​ឆ្មាំ​ពន្ធនាគារ​នាំ​ទៅ​សាលា​ឧទ្ធរណ៍​កាលពី​ម្សិលមិញ​បាន​បដិសេធ​ធ្វើ​អត្ថាធិប្បាយ​ចំពោះ​ការ​សម្រេច​នេះ​ខណៈ​​ដែល​មជ្ឈដ្ឋាន​ជាច្រើន​​រំពឹង​ថា​លោក​​​ ចរិយា អាច​នឹង​ត្រូវ​ដោះលែង​នៅ​ក្នុង​ខែ​​នេះ​តាមរយៈ​ការ​ចរចា​សម្រប​សម្រួល​​នយោបាយ​រវាង​គណបក្ស​ជាប់​ឆ្នោត​ទាំង​ពីរ​​។

ចំណែក​រឿង​ក្តី​មួយ​ទៀត​របស់​លោក ចិរយា ទាក់ទង​នឹង​បទ​សមគំនិត​ក្នុង​អំពើ​សូកប៉ាន់​សាក្សី​រឿង​ស្នេហា​អ្នកនាង ខុម ចាន់តារាទី ហៅ ស្រីមុំ ជាមួយ​លោក កឹម សុខា ដែល​មជ្ឈដ្ឋាន​ជាច្រើន​ចាត់ទុក​ថា​ជា​រឿង​នយោបាយ​ត្រូវ​បាន​លោក សំ សុគង់ ឱ្យ​ដឹង​ថា​សាលា​ដំបូង​បាន​បញ្ចប់​ការ​សាកសួរ​ហើយ​។

លោក​ថា៖ ​«គឺ​ក្រុម​មេធាវី​បាន​ទទួល​លិខិត​ជូន​ដំណឹង​មួយ​ពី​សាលា​ដំបូង​កាលពី​ថ្ងៃ​ទី ៧ ខែ​ធ្នូ​នេះ​ទាក់ទង​នឹង​ការ​​បិទ​ការ​ស៊ើបសួរ​ហើយ​ចៅក្រម​ស៊ើបសួរ​នឹង​បញ្ជូន​រឿង​នេះ​ទៅ​ជំនុំជម្រះ​​ក្នុង​ពេល​ឆាប់»។

អគ្គលេខាធិការរង​ផ្នែក​រដ្ឋបាល និង​ជា​អ្នក​នាំពាក្យ​សាលា​ឧទ្ធរណ៍​លោក ទូច ថារិទ្ធិ បាន​ឲ្យ​ដឹង​ថា​ការ​សម្រេច​នេះ​គឺ​ផ្អែក​ទាំង​ស្រុង​ទៅ​លើ​ភ័ស្តុតាង​ដែល​ដើម​បណ្តឹង​បាន​ដាក់​ទៅ​កាន់​តុលាការ​នាពេល​កន្លង​មក។ លោក​ថា៖ «ភ័ស្តុតាង​គឺ​មាន​ភាព​រឹងមាំ​ហើយ​បាន​បង្ហាញ​ពី​ចេតនា​របស់​ជន​ជាប់ចោទ​បរិហាកេរ្តិ៍​ពិត​មែន»។

មេធាវី​ការពារ​ដើម​បណ្តឹង​លោក ឥន្ទ យឿន ថ្លែង​ថា៖ ​«ការ​សម្រេច​នេះ​ជា​ឆន្ទានុសិទ្ធិ​​របស់​​តុលាការ​ផុត​សមត្ថកិច្ច​របស់​មេធាវី​តែ​យើង​គាំទ្រ​សេចក្តី​សម្រេច​នោះ»។

អ្នក​វិភាគ​នយោបាយ​លោក អ៊ូ វីរៈ ដែល​​តាមដាន​ព្រឹត្តិការណ៍​នេះ​យល់​ឃើញ​ថា​ទាល់​តែ​មាន​ការ​សម្រុះសម្រួល​នយោបាយ​ទើប​អ្នក​ជាប់​ឃុំ​ទាំង​នោះ​មាន​សេរីភាព​វិញ។

លោក​ថា៖ ​«ខ្ញុំ​មើល​ទៅ​ស្ថានភាព​នយោបាយ​ធូរស្រាល​គ្រាន់​បើ​ហើយ​អ៊ីចឹង​ខ្ញុំ​នៅ​តែ​សង្ឃឹម​ថា​ពួកគាត់​​នឹង​ត្រូវ​បាន​ដោះលែង​មុន​ឆ្នាំ ២០១៧...ចំណែក​រឿង​​ពាក់ព័ន្ធ​នឹង​លោក កឹម សុខា គឺជា​រឿង​នយោបាយ​​ទាំង​ស្រុង»។

កាលពី​ថ្ងៃ​ទី ២៣ ខែ​កញ្ញា​សាលា​ដំបូង​រាជធានី​បាន​សម្រេច​ផ្តន្ទាទោស​លោក នី ចរិយា ដាក់​ពន្ធនាគារ​ពេល ៦ ខែ និង​ពិន័យ​ជា​ប្រាក់ ៦ លាន​រៀល​ចូល​ថវិកា​​រដ្ឋ​ពី​បទ​បរិហារ​កេរ្តិ៍​ជា​សាធារណៈ​ មួល​បង្កាច់​កេរ្តិ៍ និង​ផ្សព្វផ្សាយ​នូវ​ការ​អត្ថាធិប្បាយ​ដើម្បី​ដាក់​សម្ពាធ​លើ​យុត្តាធិការ​​របស់​តុលាការ​តាម​បណ្តឹង​របស់​មន្ត្រី​តុលាការ​ខេត្ត​សៀមរាប​ពីរ​រូប​បន្ទាប់ពី​លោក នី ចរិយា ចោទ​ថា​មន្ត្រី​តុលាការ​ទាំង​នោះ​បាន​​ឃុំ​ខ្លួន​ពលរដ្ឋ​ពីរ​រូប​ក្នុង​រឿង​ជម្លោះ​ដីធ្លី​ខុស​នីតិវិធី​ច្បាប់។

លោក នី ចរិយា ជា​អតីត​​ប្រធាន​ផ្នែក​ស៊ើបអង្កេត​សមាគម​ការពារ​សិទ្ធិ​មនុស្ស​អាដហុក។

លោក Phil Robertson នាយករង​របស់​អង្គការ​ឃ្លាំ​មើល​សិទ្ធិ​មនុស្ស (Human Rights Watch) ប្រចាំ​តំបន់​អាស៊ី​បាន​​ចាត់​ទុក​ការ​តម្កល់​​សាលក្រម​របស់​លោក​ ចរិយា​ នេះ​ថា​ ជា​សញ្ញា​មួយ​ដែល​បង្ហាញ​ថា​នេះ​ជា​ការ​សម្រេច​ដោយ​ស្វ័យប្រវត្តិ​ដោយ​គ្មាន​ការ​ពិចារណា​ឲ្យ​បាន​ត្រឹមត្រូវ​នោះ​ទេ​ហើយ​ធ្វើ​ដោយ​គ្មាន​ហេតុផល​អ្វី​ទាំងអស់​រួម​បញ្ចូល​ទាំង​ការ​បដិសេធ​នេះ​ផង​ដែរ ​ដែល​វា​គ្រាន់​តែ​ចំណាយ​ពេល​ប៉ុន្មាន​នាទី​ប៉ុណ្ណោះ​ដើម្បី​សម្រេច​ដែល​​ការ​សម្រេច​នេះ​ប្រហែល​​ជា​ត្រូវ​បាន​ធ្វើ​ឡើង​ចាប់​តាំង​ពី​មុន​ករណី​ចោទប្រកាន់​នេះ​ទៅ​ដល់​ដៃ​តុលាការ​ម្ល៉េះ។

លោក​ Phil Robertson បាន​​ចេញ​សេចក្តី​ថ្លែងការណ៍​មួយ​​កាលពី​ម្សិលមិញ​ភ្លាមៗ​បន្ទាប់ពី​សាលា​ឧទ្ធរណ៍​បាន​ប្រកាស​សាលដីកា​ថា​៖ «ស្ថានភាព​ប្រព័ន្ធ​យុត្តិធម៌​កម្ពុជា​គឺ​អាក្រក់​ខ្លាំង​ណាស់​ជាពិសេស​នៅ​ក្នុង​ករណី​នយោបាយ​ដូច​រឿង​មួយ​នេះ​ហើយ​តុលាការ​ហាក់​មិន​បាន​បង្ហាញ​ពី​ឯករាជភាព​របស់​ខ្លួន​ពី​រដ្ឋាភិបាល​នោះ​ទេ។ កាន់​តែ​ច្បាស់​ទៀត​នោះ​សម្រាប់​សកម្មជន​ដូចជា​លោក​ នី ចរិយា គឺ​ប្រព័ន្ធ​យុត្តិធម៌​គ្មាន​អ្វី​ច្រើន​ជាង​​ការ​អូសបន្លាយ​បន្ត​ឃុំ​ខ្លួន​នៅ​ពន្ធនាគារ​នោះ​ទេ​ហើយ​មេដឹកនាំ​នយោបាយ​របស់​កម្ពុជា​បាន​សម្រេច​រួច​ហើយ​ដើម្បី​រៀបចំ​សម្រាប់​គាត់»។

អង្គការ​ឃ្លាំមើល​​សិទ្ធិ​មនុស្ស​បាន​ប្រកាស​ថា​ខ្លួន​ប្រឆាំង​គ្រប់​ទម្រង់​ទាំងអស់​នៃ​បទ​បរិហាកេរ្តិ៍​ហើយ​បាន​ទាមទារ​ឲ្យ​​រដ្ឋាភិបាល​កម្ពុជា​គួរ​លុប​ចោល​បទ​បរិហារកេរ្តិ៍​នេះ​ដោយសារ​តែ​ជា​គោលការណ៍​គឺ​គ្មាន​នរណា​ម្នាក់​គួរ​ត្រូវ​បាន​កាត់ទោស​ឲ្យ​ជាប់​ពន្ធនាគារ​ដោយសារ​តែ​ការ​សម្តែង​មតិ​របស់​ខ្លួន​នោះ​ទេ៕ NS

អត្ថបទគួរចាប់អារម្មណ៍