ភ្នំពេញៈ បណ្តឹងទាស់របស់អ្នកបឹងកក់ពាក់ព័ន្ធការវាយដំរបស់មន្ត្រីខណ្ឌដូនពេញកាលពីអំឡុងខែកញ្ញា ឆ្នាំ ២០១៣ នៅរមណីយដ្ឋានវត្តភ្នំត្រូវបានសភាព្រហ្មទណ្ឌសាលាឧទ្ធរណ៍បដិសេធកាលពីម្សិលមិញ និងសម្រេចតម្កល់សាលក្រមសាលាដំបូងរាជធានីភ្នំពេញទុកជាបានការដដែល។
បន្ទាប់ពីស្តាប់ការប្រកាសសាលដីកាជាអសាធារណៈលោកយាយ ង៉ែត ឃុន អាយុ ៧៨ ឆ្នាំ និង អ្នកស្រី ផាន់ ឈុនរ៉េត អាយុ ៦០ ឆ្នាំបានប្រាប់នៅក្រៅបន្ទប់សវនាការថា សំណុំរឿងនេះត្រូវបានប្រកាសដោយលោកចៅក្រម ធូ មុន្នី ជាប្រធានក្រុមប្រឹក្សាជំនុំជម្រះ។
លោកយាយថ្លែងថា ចៅក្រមប្រាប់គាត់ថា៖ «សំណុំរឿងនេះសភាព្រហ្មទណ្ឌសាលាឧទ្ធរណ៍សម្រេចតម្កល់សាលក្រមរបស់សាលាដំបូងរាជធានីភ្នំពេញទុកដដែល ព្រោះតុលាការយល់ថា ក្នុងពាក្យបណ្តឹងរបស់ដើមបណ្តឹងមិនបានបញ្ជាក់ពីអត្តសញ្ញាណរបស់ចុងចម្លើយឲ្យបានច្បាស់លាស់ទេ»។
ទោះយ៉ាងណាលោកយាយ ង៉ែត ឃុន ហៅ ម៉ាមី ដែលគេបាញ់ត្រូវ ១ គ្រាប់ចម្ពាមចំដើមទ្រូងបាននិយាយថា ពួកគាត់មានរូបថតបង្ហាញដល់តុលាការពីសកម្មភាពរបស់កម្លាំងសន្តិសុខខណ្ឌដូនពេញដែលបង្ក្រាបមកលើក្រុមអតីតអ្នកបឹងកក់ ប៉ុន្តែបែរជាចៅក្រមថា ពួកគាត់គ្រាន់តែថតរូបមនុស្សទាំងនោះ ហើយមិនស្គាល់ឈ្មោះទៀត ដូច្នេះមិនអាចយកជាការបានទេ។
ការបើកសវនាការជំនុំជម្រះជាអសាធារណៈពីល្ងាចម្សិលមិញប្រមាណជាកន្លះម៉ោងនោះគឺមានសមាសភាពលោក ធូ មុន្នី ប្រធានក្រុមប្រឹក្សាជំនុំជម្រះលោកចៅក្រម ភូ ពៅស៊ុន និងលោកចៅក្រម ងួន អ៊ីម។ រីឯតំណាងមហាអយ្យការគឺលោកស្រីព្រះរាជអាជ្ញា គឹម កល្យាណ និងមានមេធាវីការពារក្តីគឺលោក លី សុចិត្រា។
បើតាមលោកយាយ ង៉ែត ឃុន បានប្រាប់ថា នៅយប់ថ្ងៃទី ២២ ខែកញ្ញា ឆ្នាំ ២០១៣ ពួកគាត់ជាអ្នកបឹងកក់ប្រហែលជាង ១០ នាក់បាននាំគ្នាទៅរមណីយដ្ឋានវត្តភ្នំដើម្បីធ្វើពិធីសមាធិបំណងបង្ហាញដល់អាជ្ញាធរមានសមត្ថកិច្ចឲ្យដោះលែងអ្នកស្រី យ៉ោម បុប្ផា និងឲ្យដោះស្រាយទំនាស់ដីបឹងកក់។
លោកយាយបន្តថានៅពេលនោះស្រាប់តែមានការដាច់ភ្លើងអគ្គិសនីនៅម្តុំវត្តភ្នំហើយមួយសន្ទុះក្រោយមកក៏មានមនុសុ្សដែលលោកយាយគិតថា ជាកងសន្តិសុខខណ្ឌដូនពេញសម្រុកមកវាយ និងបាញ់ចម្ពាមដាក់ពួកគាត់បណ្តាលឲ្យមានរបួសជាច្រើននាក់ផង។
បន្ទាប់ពីកើតហេតុនេះក្រុមអ្នកបឹងកក់បានដាក់ពាក្យបណ្តឹងទៅសាលាដំបូងរាជធានីភ្នំពេញដោយប្តឹងលោក សុខ ពេញវុធ ជាអភិបាលរងខណ្ឌដូនពេញ, លោក គឹម រដ្ឋា ជាប្រធានសន្តិសុខខណ្ឌដូនពេញ, លោកសៅ ណល់ ជាអធិការរងខណ្ឌ និងអ្នកស្រី សុខ ជាតា ជាមន្ត្រីសាលាខណ្ឌដូនពេញពីបទបង្ករបួសស្នាម និងទាមទារសំណងជាង ១០ លានរៀល។
សំណុំរឿងនេះត្រូវបានចៅក្រមស៊ើបសួរនៃសាលាដំបូងរាជធានីភ្នំពេញបានចេញដីកាលើកលែងការចោទប្រកាន់នៅថ្ងៃទី ៣១ ខែកក្កដា ឆ្នាំ ២០១៧ ដោយសំអាងថាក្នុងពាក្យបណ្តឹងនោះមិនបានកំណត់អត្តសញ្ញាណមនុស្សច្បាស់លាស់៕