The Phnom Penh Post Search

Search form

Logo of Phnom Penh Post newspaper Phnom Penh Post - ឧទ្ធរណ៍​បន្ថយ​ទោស​ស្ត្រី​នាំ​នារី​ខ្មែរ​ទៅ​ការ​ប្តី​ចិន​ពី​ ១៥ ​មក​ ៥ ​ឆ្នាំ




ឧទ្ធរណ៍​បន្ថយ​ទោស​ស្ត្រី​នាំ​នារី​ខ្មែរ​ទៅ​ការ​ប្តី​ចិន​ពី​ ១៥ ​មក​ ៥ ​ឆ្នាំ

Content image - Phnom Penh Post
ស្ត្រី​ខ្មែរ​ត្រូវ​គេ​នាំ​ទៅ​រៀបការ​ប្តី​ចិន​តាម​ព្រលាន​យន្តហោះ​អន្តរជាតិ​ភ្នំពេញ​កាលពី​ឆ្នាំ​កន្លងទៅ។ ម៉ៃ វីរៈ

ឧទ្ធរណ៍​បន្ថយ​ទោស​ស្ត្រី​នាំ​នារី​ខ្មែរ​ទៅ​ការ​ប្តី​ចិន​ពី​ ១៥ ​មក​ ៥ ​ឆ្នាំ

ភ្នំពេញៈ ស្ត្រី​ជាប់ចោទ​ម្នាក់​កាលពី​ម្សិលមិញ​ត្រូវ​បាន​សភា​ព្រហ្មទណ្ឌ​នៃ​សាលា​ឧទ្ធរណ៍​ប្រកាស​សាលដីកា​ភ្លាមៗ បន្ទាប់ពី​ជំនុំជម្រះ​ដោយ​សម្រេច​បន្ថយទោស​ពី​ជាប់គុក ១៥ ឆ្នាំ​មក​ត្រឹម ៥ ឆ្នាំ​វិញ​ពាក់ព័ន្ធ​នាំ​នារី​ម្នាក់​ទៅ​រៀបការ​ប្តី​នៅ​ប្រទេស​ចិន​កាលពី​ឆ្នាំ​ ២០១៣ នៅ​ខេត្ត​ព្រៃវែង​។

បន្ទាប់ពី​ថយ​ទៅ​ពិភាក្សា​គ្នា​រយៈពេល​ជិត​មួយ​ម៉ោង​មក​លោក​ចៅក្រម សេង ស៊ីវុត្ថា ប្រធាន​ក្រុម​ប្រឹក្សា​ជំនុំជម្រះ​បាន​អាន​សាលដីកា​នៅ​ចំពោះ​មុខ​ស្ត្រី​ជាប់​ចោទ​ថា​ក្រោយ​ពី​បាន​ស្តាប់​ការ​សួរ​ដេញដោល​ពី​ខាង​តំណាង​មហាអយ្យការ និង​ស្តាប់​ការ​សន្និដ្ឋាន​របស់​មេធាវី ស្ត្រី​ជាប់​ចោទ​មក​ក្រុម​ប្រឹក្សា​ជំនុំជម្រះ​យល់​ឃើញ​ថា​ស្ត្រី​ជាប់​ចោទ​បាន​ឆ្លើយ​សារភាព​ថា​ពិតជា​បាន​រត់​ការ​ និង​ជូន​នារី​រងគ្រោះ​ទៅ​ដល់​ប្រទេស​ចិន​មែន​។

ប៉ុន្តែ​លោក​ចៅក្រម​ថា​នារី​រងគ្រោះ​បាន​រៀបការ​ជាមួយ​បុរស​ជនជាតិ​ចិន​គឺជា​ការ​ស្ម័គ្រ​ចិត្ត​របស់​នាង​ផ្ទាល់​ទេ ហើយ​រហូត​បង្កើត​បាន​កូន​ម្នាក់ និង​ក្រោយ​មក​មាន​ទម្ងន់​មាន​កូន​ម្នាក់​ទៀត​តែ​ត្រូវ​ប្តី​វាយ​ឲ្យ​រលូត​កូន​។ ដោយ​រស់នៅ​មិន​ចុះ​សម្រុង​គ្នា​នារី​រងគ្រោះ​នោះ​បាន​សុំ​ប្តី​មក​មើល​ជំងឺ​ម្តាយ ហើយ​ប្តី​ក៏​ឲ្យ​មក​កម្ពុជា​វិញ​។

លោក​ថ្លែង​ថា​ ​ដោយ​ឃើញ​ថា ស្ត្រី​ជាប់​ចោទ​មាន​វ័យចាស់ និង​មិន​បង្ខំ​ឲ្យ​នារី​រងគ្រោះ​រៀបការ​នោះ ដូច្នេះ​ក្រុមប្រឹក្សា​សម្រេច​៖ «​កែប្រែ​បទ​ចោទ​ពី​បទ​នាំ​ចេញ​ដោយ​មិន​ស្រប​ច្បាប់ ដោយ​មាន​គោលដៅ​មក​ជា​បទ​ការ​នាំ​ចេញ​ដោយ​មិន​ស្រប​ច្បាប់​សម្រាប់​ឆ្លងដែន​វិញ​ និង​កែប្រែ​ទណ្ឌកម្ម​ទោស​ពី ១៥ ឆ្នាំ​មក​ជាប់គុក ៥ ឆ្នាំ និង​សំណង ៤០ លាន​រៀល​មក​ត្រឹម ៥ លាន​រៀល​វិញ​»​។

ស្ត្រី​ជាប់ចោទ​ឈ្មោះ ផាត់ ឡៃ អាយុ ៥៧ ​ឆ្នាំ​ដែល​ត្រូវ​ចៅក្រម​ផ្តល់​សិទ្ធិ​ឡើង​ឆ្លើយ​បំភ្លឺ​ក្នុង​សវនាការ​នោះ​បាន​និយាយ​ថា​គាត់​មាន​កូន​ស្រី​ម្នាក់​រៀបការ​ប្តី​នៅ​ប្រទេស​ចិន ហើយ​ពេល​គាត់​ទៅ​លេង​កូនស្រី​របស់​គាត់​ត្រូវ​ម្តាយ​នារី​រងគ្រោះ ផ្ញើ​កូនស្រី​ម្នាក់​ឈ្មោះ សេង ស៊ីណាក់ អាយុ ២៦ ​ឆ្នាំ​ទៅ​ជាមួយ​ដើម្បី​រក​ការងារ​ធ្វើ​។ ​លុះ​ទៅ​ដល់​ប្រទេស​ចិន​នារី​រងគ្រោះ​បាន​រៀបការ​ជាមួយ​បុរស​ចិន​ដោយ​ស្ម័គ្រចិត្ត និង​បង្កើត​បាន​កូន​ម្នាក់​ទៀត​ផង​។ ប៉ុន្តែ​ពេល​នារី​នោះ​ឈ្លោះ​គ្នា​ជាមួយ​ប្តី​ក៏​មក​កម្ពុជា​វិញ​បាន​ ៣ ​ឆ្នាំ​ទើប​ប្តឹង​សមត្ថកិច្ច​ឲ្យ​ចាប់​ស្ត្រី​ជាប់ចោទ​។

ទោះ​យ៉ាង​ណា​របាយការណ៍​នគរបាល​ខេត្ត​ព្រៃវែង​បង្ហាញ​ថា​ស្ត្រី​ជាប់​ចោទ​ ផាត់ ឡៃ រស់នៅ​ភូមិ​ព្រែកតារ័ត្ន​ ឃុំ​កំពង់ប្រាំង ស្រុក​ពារាំង ខេត្ត​ព្រៃវែង កាលពី​អំឡុង​ខែ​កក្កដា​ឆ្នាំ​ ២០១៣ បាន​លួងលោម​នារី​ឈ្មោះ​ សេង ស៊ីណាក់ អាយុ ២៦ ឆ្នាំ​ឲ្យ​ទៅ​រៀបការ​ប្តី​នៅ​ប្រទេស​ចិន​ដោយ​ស្ត្រី​ជាប់​ចោទ​ជា​អ្នក​រត់ការ​រហូត​នាំ​នារី​រងគ្រោះ​ទៅ​ដល់​ប្រទេស​ចិន​ទៀត​។ ប៉ុន្តែ​ដោយ​ប្តី​វាយ​ធ្វើ​បាប​នារី​រងគ្រោះ​បាន​មក​កម្ពុជា​វិញ​ហើយ​ ៣ ​ឆ្នាំ​ក្រោយ​ទើប​ប្តឹង​ស្ត្រី​ជាប់​ចោទ​។

សំណុំ​រឿង​នេះ​ត្រូវ​សាលា​ដំបូង​ខេត្ត​ព្រៃវែង​ប្រកាស​សាលក្រម​កាលពី​ខែ​មេសា​ឆ្នាំ​ ២០១៧ សម្រេច​ផ្តន្ទាទោស​ស្ត្រី​ជាប់ចោទ ១៦ ឆ្នាំ និង​បង្គាប់​ឲ្យ​សង​ជំងឺ​ចិត្ត​ទៅ​នារី​រងគ្រោះ ៤០ លាន​រៀល​ ខណៈ​នារី​រងគ្រោះ​ទារ​សំណង​ចំនួន ២ ម៉ឺន​ដុល្លារ​៕

អត្ថបទគួរចាប់អារម្មណ៍