.jpg)
លោកគ្រូ អ្នកគ្រូ ដែលទៅចូលរួមសវនាការនៅសាលាឧទ្ធរណ៍កាលពីថ្ងៃអង្គារ។ រូបថត ហ្វេសប៊ុក RONG CHHUN
ភ្នំពេញៈ សាលាឧទ្ធរណ៍កាលពីរសៀលថ្ងៃអង្គារបានបើកសវនាការជាសាធារណៈ ករណីបណ្តឹងទាស់របស់គ្រូបង្រៀនចំនួន ១១ នាក់ ដែលប្តឹងក្រសួងអប់រំពាក់ព័ន្ធការលុបឈ្មោះបណ្តេញពួកគេចេញពីក្របខ័ណ្ឌក្រសួងអប់រំហើយសាលដីកានេះនឹងប្រកាសនៅថ្ងៃទី ១១ មីនា។
លោក ជូង ជូងី ដែលជាមេធាវីការពារសិទ្ធិឲ្យគ្រូបង្រៀនទាំង ១១ រូបនោះបានថ្លែងកាលពីថ្ងៃអង្គារថា លោកបានចូលរួមជំនុំជម្រះក្នុងសំណុំរឿងនេះ ប៉ុន្តែលោក «សុំមិននិយាយទេដោយសារថា ខ្ញុំអស់កម្លាំងពីការជំនុំជម្រះ»។
ភ្នំពេញប៉ុស្តិ៍មិនអាចទាក់ទងសុំការអធិប្បាយពីលោក ទូច ថារិទ្ធ អ្នកនាំពាក្យសាលាឧទ្ធរណ៍បានទេ។
ទោះយ៉ាងណាបើតាមសាលដីកា ១ ច្បាប់ដែលមានសំណុំរឿងក្តីលេខ ៤៣៦ ចុះថ្ងៃទី ១ ខែ សីហា ឆ្នាំ ២០១៩ បង្ហាញថា អង្គសវនាការលើសំណុំរឿងគ្រូបង្រៀន ១១ រូបនេះ មានប្រធានក្រុមប្រឹក្សាជំនុំជម្រះលោកចៅក្រម យូ ប៊ុនណា។
ចំពោះខ្លឹមសារនៅក្នុងអង្គសវនាការនេះត្រូវបានលោក រ៉ុង ឈុន គ្រូបង្រៀនម្នាក់ក្នុងចំណោមគ្រូបង្រៀន ១១ នាក់ ដែលបានដាក់ពាក្យប្តឹង ហើយដែលបានចូលរួមសវនាការបានឲ្យដឹងថា នៅក្នុងអង្គសវនាការនោះគឺលោកមេធាវី ជូង ជូងី បានសន្និដ្ឋានថា ការលុបឈ្មោះគ្រូបង្រៀនទាំង ១១ រូប និងការអះអាងរបស់មេធាវីតំណាងឲ្យក្រសួងអប់រំនោះវាជាការរំលោភបំពានច្បាប់សហលក្ខន្តិកៈរបស់មន្ត្រីរាជការដោយមិនបានអនុវត្តទៅតាមសហលក្ខន្តិកៈរបស់មន្ត្រីរាជការទេ។
លោក រ៉ុង ឈុន ដែលបច្ចុប្បន្នជាប្រធានសហជីពសហភាពកម្ពុជា បានបញ្ជាក់ពីសម្តីលើកឡើងរបស់មេធាវី ជូង ជូងី ក្នុងសវនាការថា៖ «ការធ្វើមកលើក្រុមគ្រូបង្រៀនដូច្នេះវាជាការខុសធ្ងន់ធ្ងរណាស់»។
លោក រ៉ុង ឈុន បានថ្លែងថា មូលហេតុដែលក្រុមគ្រូបង្រៀនប្តឹងនេះ ដោយសារលោកគ្រូទាំង ១១ រូប មិនសុខចិត្តនឹងការលុបឈ្មោះរបស់ក្រសួងអប់រំ ព្រោះលោកគ្រូទាំង ១១ រូប យល់ថាការលុបឈ្មោះនោះវាជារឿងអយុត្តិធម៌ហើយលោកប្តឹងទាមទារឲ្យតុលាការទាត់ចោលនូវប្រកាសរបស់ក្រសួងអប់រំចេញហើយទី ២ គឺសូមឲ្យតុលាការ ត្រូវតែផ្តល់ក្របខ័ណ្ឌអប់រំឲ្យដល់គ្រូបង្រៀនទាំង ១១ រូបវិញ។
លោក រ៉ុង ឈុន លើកឡើងថាអ្វីដែលក្រុមលោកគ្រូទាំង ១១ រូប យល់ថាវាមានភាពអយុត្តិធម៌នោះត្រង់ថាក្រសួងអប់រំប្រកាសលុបឈ្មោះពួកលោកនោះ គឺគ្មានមូលដ្ឋានត្រឹមត្រូវ ហើយចំពោះការចោទប្រកាន់មកលើក្រុមគ្រូបង្រៀនទៀតសោតគឺថា ក្រុមលោកគ្រូទាំង ១១ រូបអវត្តមានគ្មានច្បាប់។
លោកបានបញ្ជាក់ថា៖ «ខ្ញុំមិនទាន់ដល់ថ្ងៃចូលធ្វើការផង មកចោទខ្ញុំថា អវត្តមាន គ្មានច្បាប់ ហើយចោទលោកគ្រូផ្សេងទៀតថា បោះបង់ការងារ តែពួកគាត់ទាំងអស់បានដាក់ពាក្យសុំបម្រើការងារវិញហើយហ្នឹង»។
លោកបន្តថា ក្រសួងអប់រំមិនបានអនុវត្តទៅតាមសហលក្ខន្តិកៈមន្ត្រីរាជការស៊ីវិលត្រង់មាត្រា ៤០ ដែលនិយាយអំពីទណ្ឌកម្មថ្នាក់ទី ១ និងទី ២ នោះទេ។ មុននឹងលុបឈ្មោះមន្ត្រីរាជការណាម្នាក់ត្រូវអនុវត្តនូវមាត្រា ៤០ ដែលអាចហៅទៅស្តីបន្ទោស ឬហៅណែនាំម្តង ឬ ២ ដង បើសិនជាមន្ត្រីនោះមិនធ្វើការកែលម្អខ្លួនទៅតាមការណែនាំទេ ទើបបានសម្រេចលុបឈ្មោះចោល។
លោកបញ្ជាក់ថា ប៉ុន្តែក្រសួងអប់រំមិនបានបង្កើតគណៈកម្មការវិន័យដើម្បីអប់រំអ្វីទាំងអស់ ហើយក៏ស្រាប់តែនឹកឃើញលុបឈ្មោះពួកលោកតែម្តង ដែលនេះវាជារឿងមួយអយុត្តិធម៌ណាស់។
លោកបានលើកឡើងថា៖ «ការលុបឈ្មោះមន្ត្រីរាជការមិនមែនចេះតែនឹកឃើញលុបៗទេ ព្រោះលោកគ្រូខ្លះ (ពីសម័យសង្គ្រាម) ធ្លាប់ដៃកាន់កាំភ្លើងបណ្តើរបង្រៀនសិស្សបណ្តើរ ដូចជាលោកគ្រូនៅខេត្តសៀមរាបក្តី»។
លោក រ៉ុង ឈុន រៀបរាប់ទៀតថា ក្រុមលោកគ្រូទាំង ១១ រូបនោះ បានដាក់ពាក្យព្យួរឈ្មោះទៅបម្រើការងារផ្សេងហើយកាលណោះ ក្រសួងអប់រំក៏បានអនុញ្ញាតឲ្យដែរហើយក្រសួងអប់រំបានចែងថា បើបុគ្គលិកបញ្ចប់ការងារពីអង្គភាពថ្មីត្រូវមកដាក់ពាក្យសុំចូលបម្រើការងារនៅអង្គភាពដើមវិញ។ អ៊ីចឹងនៅពេលដែលរំលាយគណបក្សសង្គ្រោះជាតិហើយនោះ ពួកគាត់បាននាំគ្នាទៅដាក់ពាក្យដើម្បីចូលបម្រើការងារនៅអង្គភាពពួកគាត់វិញអស់ហើយដែរ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបញ្ជាក់ប្រាប់ពីម្សិលមិញថា ពាក់ព័ន្ធនឹងការលុបឈ្មោះបុគ្គលិកសិក្សាចំនួន ១១ រូបនោះគឺក្រសួងអប់រំបានអនុវត្តនីតិវិធីត្រឹមត្រូវស្របតាមគោលការណ៍ច្បាប់ និងលិខិតបទដ្ឋានគតិយុត្តជាធរមាន ហើយក្រសួងសូមរក្សាខ្លឹមសារតាមលិខិតលេខ ១៥២១ អ.យ.រ.ប ចុះថ្ងៃទី ១៦ ខែ មីនា ឆ្នាំ ២០១៨ របស់ក្រសួងអប់រំដដែល។
លោកថ្លែងថា៖ «ឆ្លើយតបតាមនីតិវិធីដែលកំពុងអនុវត្តតាមផ្លូវតុលាការគឺក្រសួងពុំមានសមត្ថកិច្ចទៀតឡើយ ហើយកំពុងរង់ចាំលទ្ធផលជាស្ថាពរពីស្ថាប័នតុលាការ»៕
