ភ្នំពេញៈ សាលាឧទ្ធរណ៍ពីម្សិលមិញបានបើកសវនាការជំនុំជម្រះកំបាំងមុខជនជាប់ ចោទម្នាក់ពាក់ព័ន្ធក្នុងការគប់គ្រាប់បែក ១ គ្រាប់ចូលរោងការដែលប្រព្រឹត្តនៅភូមិភ្នំត្រែល ឃុំភ្នំកុង ស្រុកអង្គជ័យ ខេត្តកំពត ក្នុងអំឡុងឆ្នាំ ២០១២ បណ្តាលឲ្យមនុស្សម្នាក់ស្លាប់និងរបួសធ្ងន់ស្រាល ១០ នាក់។
នៅក្នុងបន្ទប់សវនាការដែលអវត្តមានជនជាប់ចោទតែចាត់ទុកជាចំពោះមុខជនជាប់ចោទព្រោះមានមេធាវីជាតំណាងនោះ លោកស្រីចៅក្រម ចាន់ ម៉ាឌីណា ប្រធានក្រុមប្រឹក្សាជំនុំជម្រះបានអានអង្គហេតុថាសំណុំរឿងនេះមានជនជាប់ចោទឈ្មោះ នួន ទូច អាយុ ៤៥ ឆ្នាំ អតីតប្រធានការិយាល័យផែនការទូទៅនៃក្រសួងមហាផ្ទៃបានលែងលះគ្នាជាមួយប្រពន្ធ។
លុះដល់ថ្ងៃកើតហេតុគឺថ្ងៃទី ៨ ខែធ្នូ ឆ្នាំ ២០១២ ជនជាប់ចោទបានទៅចូលរួមមង្គលការដែលត្រូវជាសាច់ ញាតិរបស់ខ្លួន។ ខណៈកំពុងតែមានមនុស្សក្នុងរោងការច្រើនផងនោះជនជាប់ចោទបានយកគ្រាប់បែក ១ គ្រាប់ទៅគប់ចូលក្នុងកណ្តាលហ្វូងមនុស្សបណ្តាលឲ្យស្រ្តីម្នាក់ឈ្មោះ លី ជ្រាង អាយុ ៦៥ ឆ្នាំ ត្រូវជាម្តាយចិញ្ចឹមរបស់ប្រពន្ធជនជាប់ចោទស្លាប់នៅកន្លែងកើតហេតុ និងមនុស្ស ១០ នាក់ទៀតរងរបួសធ្ងន់ស្រាល។
ក្រោយកើតហេតុជនជាប់ចោទត្រូវសមត្ថកិច្ចចាប់ខ្លួនបាន។ សំណុំរឿងនេះត្រូវបានសាលាដំបូងខេត្តកំពតបើកសវនាការជំនុំជម្រះ និងប្រកាសសាលក្រមនៅថ្ងៃទី ២៧ ខែ ឧសភា ឆ្នាំ ២០១៤ ផ្តន្ទាទោសដាក់ពន្ធនាគារ ២៥ ឆ្នាំចោទបទឃាតកម្មគិតទុកជាមុនតាមបញ្ញតិ្តមាត្រា ២០០ នៃក្រមព្រហ្មទណ្ឌ។
តាមកំណត់ហេតុរបស់តុលាការបង្ហាញថាជនជាប់ចោទឈ្មោះ នួន ទូច បានឆ្លើយសារភាពប្រាប់តុលាការថា បានជាគាត់គប់គ្រាប់បែកនេះដោយសារគាត់មានគំនុំជាមួយអតីតប្រពន្ធរបស់ខ្លួនដែលបានលែងលះគ្នាហើយក៏ខឹងនឹងស្រ្តីជាម្ដាយចិញ្ចឹមរបស់អតីតប្រពន្ធដែលជាអ្នកបំបែកបំបាក់ប្រពន្ធរបស់ខ្លួនដើម្បីឲ្យទៅស្រឡាញ់បុរសម្នាក់ទៀត។ម៉្យាងខឹងនឹងអតីតប្រពន្ធរបស់ខ្លួនដែលបានរារាំងមិនឲ្យគាត់ជួបមុខកូនស្រីអាយុ ១២ ឆ្នាំនិងកូនប្រុសអាយុ ១០ ផង។
នៅក្នុងបន្ទប់សវនាការពីម្សិលមិញលោក សរ យសថាវរៈ តំណាងមហាអយ្យការបានសន្និដ្ឋានថា សំណុំរឿងនេះកាលពីនៅសាលាដំបូងខេត្តកំពតក៏ដូចជានៅដំណាក់កាលនគរបាលដែលទើបចាប់ខ្លួនបានគឺជនជាប់ចោទបានសារភាពថាខ្លួនបានប្រព្រឹត្តពិតប្រាកដមែន។
លោកថ្លែងប្រាប់ចៅក្រមថា៖ «យោងទៅតាមចម្លើយសារភាពរបស់ជនជាប់ចោទ និងយោងទៅតាមការប្តឹងជំទាស់របស់ព្រះរាជអាជ្ញាសាលាឧទ្ធរណ៍ផងនោះខ្ញុំសូមតម្កល់សាលក្រមរបស់សាលាដំបូងខេត្តកំពតទុកជាបានការដដែល»។
បន្ទាប់ពីចំណាយពេលជំនុំជម្រះប្រមាណកន្លះម៉ោងមកលោកស្រីចៅក្រម ចាន់ ម៉ាឌីណា ថ្លែងថា សាលដីកាសំណុំរឿងនេះនឹងប្រកាសនៅថ្ងៃទី ២៩ ខែ មេសា ខាងមុខ។ ខណៈមេធាវីជនជាប់ចោទសុំឲ្យតុលាការសម្រាលទោសកូនក្ដីខ្លួន៕