ភ្នំពេញៈ ក្រោយពីបានបើកការជំនុំជម្រះកាលពីដើមខែមីនា សាលាឧទ្ធរណ៍ប្រកាសសាលដីកាកាលពីម្សិលមិញដោយបានច្រានចោលមិនចាត់ការតាមសាលក្រមរបស់សាលារាជធានីភ្នំពេញលើសំណុំរឿងគ្រូ ១១ នាក់ បានប្ដឹងក្រសួងអប់រំ ដែលបានលុបឈ្មោះគ្រូទាំងនោះចេញពីក្របខ័ណ្ឌ។
លោកចៅក្រម យូ ប៊ុនណា បានអានសាលដីកានៅចំពោះមុខលោកមេធាវីជួង ជូងី និងលោក រ៉ុង ឈុន ក្នុងបន្ទប់សវនាការពីម្សិលមិញថា៖ «សំណុំរឿងដែល មានឈ្មោះលោកគ្រូចំនួន ១១ នាក់ហើយដែលសាលាឧទ្ធរណ៍បើកសវនាការជំនុំជម្រះសួរដេញដោលកាលពីថ្ងៃទី ៣ ខែមីនា កន្លងមកនោះគឺ ក្រោយពីក្រុមប្រឹក្សាជំនុំជម្រះបានពិភាក្សាគ្នាមកយល់ឃើញថា សាលាឧទ្ធរណ៍សម្រេចច្រានចោលបណ្តឹងទាស់នេះហើយតម្កល់តាមសាលដីការបស់សាលាដំបូងរាជធានីភ្នំពេញដដែល»។
លោកចៅក្រមបានថ្លែងថា៖ «ចំពោះដើមបណ្តឹងប្រសិនបើមិនសុខចិត្តនឹងសាលដីកានេះគឺដើមបណ្តឹងមានសិទ្ធិប្តឹងសារទុក្ខទៅតុលាការកំពូលបានគិតរយៈពេល ១ ខែពីថ្ងៃប្រកាសសាលដីកានេះ»។
លោក រ៉ុង ឈុន ប្រធានសហជីពសហភាពកម្ពុជាដែលជាមនុស្សម្នាក់ក្នុងចំណោមអតីតគ្រូ ១១ នាក់ (ស្រីម្នាក់) បានប្រាប់តាមទូរស័ព្ទក្រោយពីចេញពីបន្ទប់សវនាការថា តុលាការនៅប្រទេសកម្ពុជា ជាពិសេសនៅសាលាឧទ្ធរណ៍គ្មានសមត្ថភាពផ្តល់យុត្តិធម៌ដល់ក្រុមគ្រូបង្រៀនទាំង ១១ នាក់នោះទេ។
លោក ឈុន ថ្លែងថា៖ «យើងដឹងច្បាស់ថា លទ្ធផលវានឹងចេញមកបែបហ្នឹងហើយយើងឃើញនីតិវិធីពេលសវនាការដូចជាសវនាការលេងៗគ្មានយកចិត្តទុកដាក់លើសំណុំរឿងទេ»។
លោកបានឲ្យដឹងទៀតថា៖ «បើដូច្នេះតើរកយុត្តិធម៌ឯណាបានពួកគាត់គ្រាន់តែចាំអង្គុយថា តាមអ្នកនយោបាយអត់មានប្រើប្រាស់វិជ្ជាជីវៈក្នុងនាមជាអ្នកច្បាប់ផងហ្នឹង»។
លោកបន្តទៀតថា សាលក្រមរបស់សាលាដំបូងរាជធានីភ្នំពេញគឺតុលាការមិនបានបើកសវនាការទេដោយគ្រាន់តែហៅលោកគ្រូអ្នកគ្រូទៅសាកសួរ និងបន្ទាប់មកបានចេញសាលក្រមច្រានចោលរាល់បណ្តឹងរបស់គ្រូទាំង ១១ នាក់តែម្តង។
លោកបញ្ចាក់ប្រាប់ថា៖ «បញ្ហានេះខ្ញុំនឹងពិភាក្សាជាមួយមេធាវីរបស់ខ្ញុំនឹងរៀបចំសំណុំឯកសារប្តឹងទៅតុលាការកំពូលទៀត។ បើទោះជាដឹងមុនថាមិនទទួលបានលទ្ធផលក៏ដោយ»។
លោក រស់ សុវាចា អ្នកនាំពាក្យក្រសួងអប់រំយុវជន និងកីឡាបញ្ចាក់ប្រាប់ពីម្សិលមិញថា ក្រសួងអប់រំ យុវជន និងកីឡាបានអនុវត្តនីតិវិធីត្រឹមត្រូវស្របតាមគោលការណ៍ច្បាប់ និងលិខិតបទដ្ឋានគតិយុត្តជាធរមាន។ ក្រសួងសូមរក្សាខ្លឹមសារតាមលិខិតលេខ ១៥២១ ចុះថ្ងៃទី ១៦ ខែមីនា ឆ្នាំ ២០១៨ របស់ក្រសួងអប់រំ យុវជន និងកីឡាដែលបានលុបឈ្មោះគ្រូទាំង ១១ នាក់នោះ។
លោកថ្លែងថា៖ «ក្រសួងអប់រំ យុវជន និងកីឡាពុំមានសមត្ថកិច្ចទៀតឡើយ ព្រោះស្ថិតក្រោមសមត្ថកិច្ចរបស់ស្ថាប័នតុលាការ»។
លោក រ៉ុង ឈុន បានបញ្ជាក់ប្រាប់ពីមូលហេតុដែលលោកគ្រូអ្នកគ្រូមិនសុខចិត្តហើយប្តឹងក្រសួងអប់រំពីការលុបឈ្មោះពួកគាត់ថា មូលហេតុដែល ទី១- គឺក្រុមគ្រូបង្រៀនប្តឹងនេះដោយសារលោកគ្រូទាំង ១១ រូបមិនសុខចិត្តនឹងការលុបឈ្មោះរបស់ក្រសួងអប់រំព្រោះលោកគ្រូទាំង ១១ រូបយល់ថា ការលុបឈ្មោះនោះវាជារឿងអយុត្តិធម៌ហើយលោកប្តឹងទាមទារឲ្យតុលាការទាត់ចោលនូវប្រកាសរបស់ក្រសួងអប់រំចេញហើយ ទី២- គឺសូមឲ្យតុលាការត្រូវតែផ្តល់ក្របខ័ណ្ឌអប់រំឲ្យដល់គ្រូបង្រៀនទាំង ១១ រូបវិញ។
លោក រ៉ុង ឈុន បានអះអាងថាអ្វីដែលក្រុមលោកគ្រូទាំង ១១ រូបយល់ថាវាមានភាពអយុត្តិធម៌នោះត្រង់ថា ក្រសួងអប់រំប្រកាសលុបឈ្មោះពួកលោកនោះគឺគ្មានមូលដ្ឋានត្រឹមត្រូវហើយចំពោះការចោទប្រកាន់មកលើក្រុមគ្រូបង្រៀនទៀតសោតគឺថាក្រុមលោកគ្រូទាំង ១១ រូបអវត្តមានគ្មានច្បាប់។
លោកថា៖ «ខ្ញុំមិនទាន់ដល់ថ្ងៃចូលធ្វើការផងមកចោទខ្ញុំថាអវត្តមានគ្មានច្បាប់ហើយចោទលោកគ្រូផ្សេងទៀតថាបោះបង់ការងារតែពួកគាត់ទាំងអស់បានដាក់ពាក្យសុំបម្រើការងារវិញហើយហ្នឹង»។
លោកបន្តថា ក្រសួងអប់រំមិនបានអនុវត្តទៅតាមសហលក្ខន្តិកៈមន្ត្រីរាជការស៊ីវិលត្រង់មាត្រា ៤០ ដែលនិយាយអំពីទណ្ឌកម្មថ្នាក់ទី ១ និងទី ២ ទេ។ មុននឹងលុបឈ្មោះមន្ត្រីរាជការណាម្នាក់ត្រូវអនុវត្តនូវមាត្រា ៤០ ដែលអាចហៅទៅស្តីបន្ទោស ឬហៅណែនាំម្តង ឬ ២ ដង បើសិនជាមន្ត្រីនោះមិនធ្វើការកែលម្អខ្លួនទេ ទើបបានសម្រេចលុបឈ្មោះចោល៕