ភ្នំពេញៈ ជនជាប់ចោទចំនួន ៦ នាក់ ដែលជាប់ចោទព្រួតគ្នារំលោភនារីរកស៊ីផ្លូវភេទម្នាក់ ហើយសម្លាប់និងយកសពទៅចោលនៅក្នុងភូមិត្រពាំងល្វាសង្កាត់កាកាប ខណ្ឌពោធិ៍សែនជ័យកាលពីឆ្នាំ ២០១៥ ត្រូវសាលាឧទ្ធរណ៍ប្រកាសសាលដីកា ពីម្សិលមិញដោយតម្កល់ទោសជន ២ នាក់ម្នាក់ៗឲ្យជាប់ពន្ធនាគារ ២០ ឆ្នាំនិង ៤ នាក់ទៀតម្នាក់ៗ ៣០ ឆ្នាំដដែលបន្ទាប់ពីជំនុំជម្រះកាលពីថ្ងៃទី ១៣ កុម្ភៈ កន្លងមក។
នៅក្នុងបន្ទប់សវនាការពីម្សិលមិញខណៈមានវត្តមាននិងអវត្តមានខ្លះនៃជនជាប់ចោទនោះលោកចៅក្រម សំរិទ្ធិ សុផល បានអានសាលដីកាថា សំណុំរឿងនេះមានជនជាប់ចោទទី១- ឈ្មោះ ម៉ម វណ្ណាន ហៅ ចយ ទី២- ឈ្មោះ មឿន ខី ទី៣- ឈ្មោះ អៀម ឡុច ទី៤- ឈ្មោះ ណាង ណាវី ទី៥- ឈ្មោះ ខាត់ សួរ ហៅ សង្ហា និងទី៦- ឈ្មោះ ជិន ណាវី។ កាលពីពេលជំនុំជម្រះនៅថ្ងៃទី ១៣ ខែ កុម្ភៈ ឆ្នាំ ២០១៩ នោះក្រុម ជនជាប់ចោទសុទ្ធតែឆ្លើយបដិសេធពាក់ព័ន្ធការស្លាប់ជនរងគ្រោះ។
លោកចៅក្រមថ្លែងថា៖ «ទោះយ៉ាងណាឆ្លងតាមអង្គហេតុនៃសំណុំរឿងតុលាការសម្រេចតម្កល់សាលក្រមរបស់សាលាដំបូងរាជធានីភ្នំពេញនៅដដែល និងបន្តឃុំខ្លួនជនជាប់ចោទទាំង ៦ នាក់បន្តទៀត»។
ទោះយ៉ាងណា កំណត់ហេតុរបស់តុលាការបង្ហាញថានៅមុនពេលកើតហេតុថ្ងៃទី ២៥ ខែ កក្កដា ឆ្នាំ ២០១៥ ជនសង្ស័យទាំង ៦ នាក់បានជុំគ្នាផឹកស្រាបៀរ ហើយបន្ទាប់មកជនឈ្មោះ ជិន ណាវី និងឈ្មោះ ម៉ម វណ្ណាន បានបបួលគ្នាជិះម៉ូតូ ១ គ្រឿងម៉ាកស៊ីរូសទៅរកនារីរកស៊ីផ្លូវភេទ នៅម្តុំសួនបុប្ផាក្នុងភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញដើម្បីយកមករួមភេទ។ ដោយតថ្លៃត្រូវរ៉ូវគ្នាហើយជនជាប់ចោទទាំង ២ នាក់ខាងលើបានសន្យាឲ្យនារីរងគ្រោះក្នុងម្នាក់ៗ ១០ ដុល្លារ ហើយក៏ឌុបជនរងគ្រោះមកកន្លែងស្នាក់នៅទាំងយប់។
កំណត់ហេតុបង្ហាញបន្តថា បន្ទាប់ពីក្រុមជនជាប់ចោទនាំគ្នារំលោភសេពសន្ថវៈរហូតបានសម្រេចទាំងអស់គ្នាហើយនារីរងគ្រោះបានទារលុយ ប៉ុន្តែក្រុមជនជាប់ចោទប្រកែកមិនព្រមឲ្យលុយទៅជនរងគ្រោះទេទើបបង្កជាជម្លោះរហូតឈានដល់ការសម្លាប់ស្ត្រីរងគ្រោះតែម្ដង (ច្របាច់ក)។
ក្រោយពីសម្លាប់រួច ក្រុមជនជាប់ចោទបានយកអង្រឹងពណ៌ខ្មៅ មករុំចងនារីរងគ្រោះដឹកតាមម៉ូតូយកទៅបោះចោលក្នុងដីឡូត៍មួយកន្លែងក្នុងភូមិ-សង្កាត់ខាងលើ។ ក្រោយមកនៅថ្ងៃទី ២៦ ខែ ឆ្នាំ ដដែលត្រូវសមត្ថកិច្ចខណ្ឌពោធិ៍សែនជ័យ ចាប់ខ្លួនតែម្តង។
សំណុំរឿងនេះត្រូវសាលាដំបូងរាជធានីភ្នំពេញបើកសវនាការជំនុំជម្រះនិងប្រកាសសាលក្រម នៅថ្ងៃទី ១៤ ខែ កក្កដា ឆ្នាំ ២០១៦ ផ្តន្ទាទោសជនជាប់ចោទទី១- ឈ្មោះ ម៉ម វណ្ណាន ហៅ ចយ ទី២ ឈ្មោះ មឿន ខី ដាក់ពន្ធនាគារម្នាក់ៗ ២០ ឆ្នាំ។
ឈ្មោះ អៀម ឡុច ណាង ណាវី ខាត់ សួរ ហៅ សង្ហា និងឈ្មោះ ជិន ណាវី ផ្តន្ទាទោសម្នាក់ៗ ៣០ ឆ្នាំចោទពីបទឃាតកម្មដោយមានទារុណកម្មអំពើឃោរឃៅឬអំពើរំលោភសេពសន្ថវៈ តាមមាត្រា ២០៥ នៃក្រមព្រហ្មទណ្ឌ៕