ភ្នំពេញ៖ ជនជាប់ចោទជាអតីតមន្រ្តីទំនាក់ទំនងរដ្ឋសភា-ព្រឹទ្ធសភាម្នាក់ត្រូវចៅក្រមសាលាឧទ្ធរណ៍ប្រកាសសាលដីកានៅថ្ងៃទី ៨ កញ្ញា នេះ ដោយបានព្យួរទោសកន្លះឆ្នាំពីជាប់ពន្ធនាគារ ២ ឆ្នាំកន្លះ មកត្រឹម ២ ឆ្នាំវិញ បន្ទាប់ពីជំនុំជម្រះកាលពីថ្ងៃទី ២៤ សីហា ពាក់ព័ន្ធជម្លោះក្នុងក្លិបកម្សាន្ត Rock ហើយបានបាញ់ត្រូវអ្នកចាក់ភ្លេងម្នាក់បាក់ភ្លៅកាលពីឆ្នាំ ២០១៧។
នៅក្នុងបន្ទប់សវនាការនៅថ្ងៃទី ៨ កញ្ញា នេះ លោកចៅក្រម សេង ស៊ីវុត្ថា បានអានសាលដីកានៅចំពោះមុខជនជាប់ចោទ ឈ្មោះ ឌុច សុវណ្ណារ៉េត អាយុ ៣៤ ឆ្នាំ ថា កាលពីថ្ងៃជំនុំជម្រះជនជាប់ចោទបានសារភាពកំហុស និងសុំបន្ថយទោសដល់ខ្លួន។ ចំណែកមេធាវីការពារសិទ្ធិឲ្យជនជាប់ចោទក៏បានស្នើសុំក្រុមប្រឹក្សាជំនុំជម្រះឲ្យបន្ថយទោសដោយថាកូនក្តីរបស់គាត់ភ្ញាក់រឭកដឹងកំហុស។ ម៉្យាងដើមបណ្តឹងឈ្មោះ បៀ សំអឿន ក៏បានដកពាក្យបណ្តឹងផងដែរ។
លោកបន្តថា បើយោងតាមកំណត់ហេតុរបស់ដើមបណ្តឹង ឈ្មោះ បៀ សំអឿន បាននិយាយដែរថា គាត់សុខចិត្តដកពាក្យបណ្តឹងវិញក៏ដោយសារគាត់យល់ថារវាងជនជាប់ចោទនិងគាត់ជាមនុស្សរាប់អានគ្នា។ ម៉្យាងគាត់ជាជនរងគ្រោះក៏បានទទួលសំណងជំងឺចិត្តពីជនជាប់ចោទផងដែរដែលព្រមបញ្ចប់បញ្ហាត្រឹមនេះ។
លោកចៅ ក្រម សេង ស៊ីវុត្ថា ថ្លែងថា៖«យោងអង្គហេតុខាងលើក្រុមប្រឹក្សាជំនុំជម្រះសម្រេចព្យួរទោសកន្លះឆ្នាំនិងឲ្យជនជាប់ចោទឈ្មោះឌុច សុវណ្ណារ៉េត អនុវត្តទោស២ឆ្នាំក្នុងពន្ធនាគារ»។
យោងកំណត់ហេតុរបស់សាលាឧទ្ធរណ៍បង្ហាញថា ឈ្មោះ ឌុច សុវណ្ណារ៉េត ដែលជាអតីតមន្រ្តីនៃក្រសួងទំនាក់ទំនងរដ្ឋសភា-ព្រឹទ្ធសភាកាលពីខែ វិច្ឆិកា ឆ្នាំ ២០១៧ បានមានជម្លោះជាមួយបុរសម្នាក់ឈ្មោះសីហានៅក្លិប
កម្សាន្ត Rock។
ពេលនោះអ្នកចាក់ភ្លេងកំដរម្នាក់ឈ្មោះបៀ សំអឿន អាយុ ៣៣ ឆ្នាំចូលឃាត់ តែត្រូវជនជាប់ចោទឈ្មោះឌុច សុវណ្ណារ៉េតបាញ់២គ្រាប់បណ្ដាលឲ្យរបួសជើងស្តាំ ១ គ្រាប់ និងត្រគាកខាងឆ្វេង១គ្រាប់និងបាញ់ជាច្រើនគ្រាប់ទៀតមុនរត់គេចខ្លួន។ ប៉ុន្តែក្រោយមកនៅខែមករា ឆ្នាំ ២០១៨ សមត្ថកិច្ចបានស្រាវជ្រាវតាមចាប់ជនសង្ស័យបាននៅខេត្តឧត្តរមានជ័យហើយនាំខ្លួនមករាជធានីភ្នំពេញវិញ។
សំណុំរឿងនេះត្រូវបានសាលាដំបូងរាជធានីភ្នំពេញបើកសវនាការជំនុំជម្រះកាលពីខែមករាឆ្នាំ ២០១៨ ហើយបានប្រកាសសាលក្រមនៅថ្ងៃទី ២១ ខែ មីនា ឆ្នាំ ២០១៩ ដោយសម្រេចប្តូរបទចោទពីបទឃាតកម្មតាមបញ្ញត្តមាត្រា១៩៩ នៃក្រមព្រហ្មទណ្ឌមកជាបទអំពើហិង្សាមានស្ថានទម្ងន់ទោសផ្តន្ទាទោសដាក់ពន្ធនាគារ ២ ឆ្នាំកន្លះវិញ។
សូមបញ្ជាក់ផងដែរថានៅថ្ងៃទី ៨ កញ្ញា នេះ លោកចៅក្រមសេង ស៊ីវុត្ថា ក៏បានប្រកាសសាលដីកាលើសំណុំរឿងមួយផ្សេងទៀតលើជនជាប់ចោទ ឌុច សុវណ្ណរ៉េត ពាក់ព័ន្ធនឹងករណីប្រើហិង្សាវាយគ្នាហើយបានយកខ្សែកពីជនរងគ្រោះ ១ ខ្សែ ។ សំណុំរឿងនេះត្រូវសាលាដំបូងរាជធានីភ្នំពេញផ្តន្ទាទោសដាក់ពន្ធនាគារ ៤ ឆ្នាំ។
លោកចៅក្រមថ្លែងថា ក្រោយពីក្រុមប្រឹក្សាជំនុំជម្រះពិភាក្សាគ្នាមកបានសម្រេចទោសដល់ជនជាប់ចោទពីជាប់ពន្ធនាគារ ៤ ឆ្នាំមកអនុវត្តទោសក្នុងពន្ធនាគារ ៣ ឆ្នាំវិញ រីឯទោសនៅសល់ ១ ឆ្នាំត្រូវព្យួរ៕