.jpg)
ភ្នំពេញៈ សាលាឧទ្ធរណ៍កាលពីម្សិលមិញបានជំនុំជម្រះក្រុមជនជាប់ចោទ ៣ នាក់ ក្នុងចំណោម ៦ នាក់ ពាក់ព័ន្ធករណីប៉ុនប៉ងគាស់ទូកុងតឺន័រលួចយកទំនិញ ប្រព្រឹត្តក្នុងឆ្នាំ ២០១៦ នៅរាជធានីភ្នំពេញជាសំណុំរឿងដែលតុលាការថ្នាក់ក្រោមផ្តន្ទាទោសម្នាក់់ៗ ៦ ឆ្នាំ។
នៅក្នុងបន្ទប់សវនាការនៃសាលាឧទ្ធរណ៍ពីម្សិលមិញបុរសជាប់ចោទឈ្មោះ ហម ប្រីយ៉ា អាយុ ២៥ ឆ្នាំ បានប្រាប់ចៅក្រមថា ខ្លួនជាអ្នកបើករថយន្តកុងតឺន័រឲ្យក្រុមហ៊ុនសូងួន រយៈពេល ៦ ឆ្នាំហើយ។
លុះនៅថ្ងៃទី ១១ ខែ វិច្ឆិកា ឆ្នាំ ២០១៦ ស្រាប់តែឈ្មោះ គង់ នៅ ជាមេការនៅក្នុងក្រុមហ៊ុនផែស្ងួតសូងួនបានរៀបចំគម្រោងលួចគាស់យកទំនិញក្នុងទូកុងតឺន័រដោយបង្គាប់ឲ្យឈ្មោះ ធី ទិត្យអេង អាយុ ៣៨ ឆ្នាំ និងឈ្មោះមាន រើន អាយុ ២២ ឆ្នាំ កំណត់ទីតាំងនៅខេត្តកំពង់ស្ពឺដើម្បីចាំយកទំនិញដែលគាស់យកបានពីក្នុងទូកុងតឺន័រ។
ជនជាប់ចោទ ហម ប្រីយ៉ា បានបន្តថានៅថ្ងៃ ១១ វិច្ឆិកានោះ ខាងក្រុមហ៊ុនបានបញ្ជាឲ្យខ្លួនបើករថយន្តកុងតឺន័រទៅកំពង់ផែភ្នំពេញ ប៉ុន្តែខ្លួនបានបង្វែរទិសទៅខេត្តព្រះសីហនុវិញ តែត្រូវបានខាងក្រុមហ៊ុនប្តឹងសមត្ថកិច្ចឲ្យចាប់ខ្លួនតែម្តង។
ជនជាប់ចោទថា សំណុំរឿងនេះ ត្រូវបានសាលាដំបូងរាជធានីភ្នំពេញប្រកាសសាលក្រមនៅថ្ងៃទី ៧ ខែ ធ្នូ ឆ្នាំ ២០១៧ ដោយផ្ដន្ទាទោសពួកគេម្នាក់ៗ ៦ ឆ្នាំ ចោទពីបទប៉ុនប៉ងលួចមានស្ថានទម្ងន់ទោសដោយគាស់ទម្លុះទម្លាយ តាមបញ្ញត្តិមាត្រា ៣៥៧ នៃក្រមព្រហ្មទណ្ឌ ។
ជនជាប់ចោទរូបនេះបញ្ជាក់ថា៖ «ខ្ញុំត្រូវបានឈ្មោះគង់ នៅប្រាប់ខ្ញុំពីគម្រោងលួចគាស់ទូកុងតឺន័រមែន ប៉ុន្តែនៅថ្ងៃនោះខ្ញុំពិតជាច្រឡំបើករថយន្តខុសគោលដៅរបស់ក្រុមហ៊ុនកំណត់មែននិងសុំបន្ថយទោស»។
ដោយឡែក ជនជាប់ចោទឈ្មោះធី ទិត្យអេង និងឈ្មោះមាន រើន បានឆ្លើយប្រាប់ចៅក្រមដែរថា ពួកគេត្រូវបានឈ្មោះ គង់ នៅ ហៅឲ្យទៅលើកអីវ៉ាន់នៅខេត្តកំពង់ស្ពឺ ប៉ុន្តែពេលទៅដល់គោលដៅ ក៏ត្រូវឈ្មោះ គង់ នៅ ទូរស័ព្ទឲ្យរំសាយវិញ ព្រោះគម្រោងនោះបានបែកការដល់ក្រុមហ៊ុន។
ជនទាំង ២ នាក់ បាននិយាយថា៖ «ពួកខ្ញុំប្តឹងមកសាលាឧទ្ធរណ៍ដោយសារតុលាការថ្នាក់ក្រោមដាក់ទោសពួកខ្ញុំច្រើនពេក ព្រោះពួកខ្ញុំមិនទាន់លួចទំនិញនោះបានទេ ប៉ុន្តែពួកខ្ញុំធ្លាប់លួចទំនិញកុងតឺន័របាន ២ ទៅ ៣ ដងដែរ។ពួកខ្ញុំសុំតុលាការបន្ថយទោសនៅត្រឹម ៣ ឆ្នាំម្នាក់បានហើយ»។
លោក តាន់ សេណារ៉ុង តំណាងមហាអយ្យការសន្និដ្ឋានថា ពិតមែនតែក្រុមជនជាប់ចោទមិនទាន់បានលួចទំនិញពីទូកុងតឺន័រមែន ប៉ុន្តែមិនគួរអត់ឱនឲ្យបានទេ ពីព្រោះបានធ្វើឲ្យប៉ះពាល់ដល់ការវិនិយោគទុនរបស់បរទេស។
លោកថ្លែងថា៖ «វាប៉ះពាល់ដល់មុខមាត់ប្រទេសកម្ពុជាហើយករណីលួចទំនិញពីក្នុងទូកុងតឺន័រនេះ ជួនកាលទៅដល់ប្រទេសគេទំនិញក្នុងទូនៅសល់តែ ២-៣ កេសប៉ុណ្ណោះ។ដូច្នេះខ្ញុំសុំតម្កល់ទោសម្នាក់ៗ ៦ ឆ្នាំដដែល»។
លោកស្រី ពឹង យក់ហៀប មេធាវីការពារសិទ្ធិឲ្យជនជាប់ចោទទាំង ៣ នាក់ សន្និដ្ឋានថារឿងនេះកូនក្តីរបស់លោកស្រីមិនទាន់បានលួចយកទំនិញនៅឡើយទេ ហើយតុលាការថ្នាក់ក្រោមចោទពួកគេពីបទលួចតាមមាត្រា ៣៥៧ (លួចប្រើហិង្សាគាស់ទម្លុះទម្លាយ) និងសុំប្តូរពីមាត្រា ៣៥៧ មកមាត្រា ៣៥៦ បទលួចធម្មតាវិញ។
ក្រោយជំនុំជម្រះ លោកចៅក្រម អុិន វ៉ាន់វិបុល ប្រធានក្រុមប្រឹក្សាជំនុំជម្រះថ្លែងថា សាលដីកានេះនឹងប្រកាសនៅថ្ងៃទី ១៧ ខែ មិថុនា ខាងមុខនេះ៕
