The Phnom Penh Post Search

Search form




Logo of Phnom Penh Post newspaper Phnom Penh Post - ឧទ្ធរណ៍​បដិសេធ​បណ្តឹង​សុំ​នៅ​ក្រៅ​ឃុំ ហុង សុខហួរ

ឧទ្ធរណ៍​បដិសេធ​បណ្តឹង​សុំ​នៅ​ក្រៅ​ឃុំ ហុង សុខហួរ

លោក ហុង សុខហួរ ត្រូវ​ប៉ូលិស​ចាប់​អូស​ឡើង​តុលាការ​កន្លង​មក​។
លោក ហុង សុខហួរ ត្រូវ​ប៉ូលិស​ចាប់​អូស​ឡើង​តុលាការ​កន្លង​មក​។ ហេង ជីវ័ន

ឧទ្ធរណ៍​បដិសេធ​បណ្តឹង​សុំ​នៅ​ក្រៅ​ឃុំ ហុង សុខហួរ

ភ្នំពេញៈ សាលា​ឧទ្ធរណ៍​កាលពី​ម្សិលមិញ​បាន​សម្រេច​បដិសេធ​ដោយ​ផ្ទាល់​មាត់​លើ​បណ្តឹង​សុំ​នៅ​ក្រៅ​ឃុំ​របស់​លោក ហុង សុខហួរ សមាជិក​ព្រឹទ្ធសភា​គណបក្ស សម រង្ស៊ី ដោយ​មិន​បាន​បញ្ជាក់​ប្រាប់​​ភ្លាមៗ​អំពី​មូលហេតុ​នោះ​ទេ​ដោយ​គ្រាន់តែ​ថា​មូលហេតុ​លម្អិត​ចំពោះ​ការ​បដិសេធ​នេះ​នឹង​ត្រូវ​ធ្វើ​ជា​លាយ​លក្ខណ៍​អក្សរ​លើ​សាល​ដីកា​នៅ​ពេល​ក្រោយ។

សវនាការ​ជំនុំជម្រះ​លើ​បណ្តឹង​ស្នើសុំ​នៅ​ក្រៅ​ឃុំ​នេះ​ត្រូវ​បាន​ធ្វើ​ឡើង​ដោយ​លោក​ចៅក្រម ប្លង់ សំណាង និង​តំណាង​អយ្យការ​លោក ង៉ែត សារ៉ាត ព្រម​ទាំង​មេធាវី​ការពារ​ក្តី​តែ​មិន​មាន​វត្តមាន​របស់​ជន​ជាប់ចោទ​លោក សុខហួរ ​នោះ​ទេ។

ក្នុង​ដំណើរការ​សវនាការ​មេធាវី​ការពារ​ក្តី​ជន​ជាប់ចោទ​លោក ជូង ជូងី បាន​លើក​នូវ​សំអាង​ហេតុ​មួយ​ចំនួន​ក្នុង​ការ​ស្នើសុំ​ដោះលែង​កូនក្តី​របស់​ខ្លួន​ក្នុង​នោះ​រួម​មាន​ការ​តម្កល់​ប្រាក់​ធានា​នៅ​ក្រៅ​ឃុំ​ចំនួន ២០ លាន​រៀល ការ​ធានា​ចូល​​ខ្លួន​​ទៅ​បំពេញ​គ្រប់​នីតិវិធី​របស់​តុលាការ និង​ការ​ធានា​មិន​បង្ក​ហេតុ​ធ្វើឲ្យ​ប៉ះពាល់​ដល់​សន្តិសុខ​សង្គម។

ប៉ុន្តែ​តំណាង​អយ្យការ​លោក​ព្រះរាជអាជ្ញា ង៉ែត សារ៉ាត បាន​អះអាង​ថា​ការ​ស្នើសុំ​របស់​ជន​ជាប់ចោទ​គឺ​ពុំ​មាន​ភ័ស្តុតាង​ថ្មី​ណា​មួយ​ដែល​ជា​មូលដ្ឋាន​ក្នុង​ការ​ពិចារណា​ខុស​ពី​មុន​ដែល​សាលា​ដំបូង​បាន​ចេញ​សាលក្រម​បដិសេធ​នៅ​ក្រៅ​ឃុំ​នោះ​ទេ។

បន្ទាប់​ពី​បើក​សវនាការ​អស់​រយៈពេល​ប្រមាណ​ជា​កន្លះ​ម៉ោង​កាលពី​ព្រឹក​ម្សិលមិញ​លោក ប្លង់ សំណាង ក៏​បាន​ប្រកាស​បិទ​សវនាការ​ហើយ​ក្នុង​រយៈពេល​ជាង​ពីរ​ម៉ោង​ក្រោយ​មក​បាន​ចេញ​មក​ប្រកាស​ផ្ទាល់​មាត់​ដោយ​ច្រាន​ចោល​សំណើ​​សុំ​នៅ​ក្រៅ​ឃុំ​នេះ។

លោក​មេធាវី ជូង ជូងី បាន​ថ្លែង​ប្រាប់​អ្នក​សារព័ត៌មាន​បន្ទាប់ពី​តុលាការ​ប្រកាស​ថា៖ «វា​អត់​យុត្តិធម៌​សម្រាប់​លោក ហុង សុខហួរ គាត់​មាន​វ័យ​ចំណាស់​ទៅ​ហើយ​គាត់​ជា​សមាជិក​ព្រឹទ្ធសភា​ផង​រហូត​មក​ទល់​ពេល​នេះ​ព្រឹទ្ធសភា​ក៏​មិន​ទាន់​បាន​ដក​អភ័យ​ឯកសិទ្ធិ​របស់​គាត់​នៅ​ឡើយ​ទេ​គាត់​មាន​តួនាទី​ក្នុង​វិស័យ​យុត្តិធម៌ និង​ធ្វើ​ច្បាប់​ទៀត​ខ្ញុំ​ស្តាយ​ណាស់​ដែល​គេ​មិន​ដោះលែង​គាត់... ខ្ញុំ​សង្ឃឹម​ថា​មហាជន​នឹង​តាម​ដាន​រឿង​នេះ»។

បើ​តាម​លោក ជូង ជូងី ក្រុម​មេធាវី​របស់​លោក ហុង សុខហួរ នឹង​ពិភាក្សា​ជាមួយ​កូន​ក្តី​ដើម្បី​បន្ត​នីតិវិធី​ប្តឹង​សារទុក្ខ​ទៅកាន់​តុលាការ​ស្នើ​សុំ​ឲ្យ​កូន​ក្តី​បាន​នៅ​ក្រៅ​ឃុំ។ លោក ជូងី បន្ថែម​ថា​ក្រុម​មេធាវី​មាន​សុទិដ្ឋិនិយម និង​បាន​ត្រៀម​ខ្លួន​រួច​ជា​ស្រេច​នូវ​ការ​ដាក់​បង្ហាញ​ភ័ស្តុតាង​ដែល​មាន​ក្នុង​ប្រព័ន្ធ​អ៊ីនធឺណិត​ដើម្បី​ដោះ​បន្ទុក​កូន​ក្តី​ឲ្យ​រួច​ផុត​ពី​ការ​ចោទ​ប្រកាន់។

លោក ហូរ វ៉ាន់ តំណាងរាស្ត្រ​គណបក្ស​សង្គ្រោះ​ជាតិ​ដែល​បាន​ទៅ​តាម​ឃ្លាំ​មើល​សវនាការ​នេះ​បាន​ថ្លែង​ថា​ផ្អែក​តាម​សំអាង​ហេតុ​ដែល​មេធាវី​បាន​ដាក់​បង្ហាញ​តុលាការ​គប្បី​បង្ហាញ​ជំហរ​ឯករាជ្យ​ទទួល​យក និង​អនុញ្ញាត​ឲ្យ​លោក ហុង សុខហួរ នៅ​ក្រៅ​ឃុំ។

លោក​ថា៖ «គាត់​មាន​ប្រាក់​គ្រប់គ្រាន់​ដាក់​តម្កល់ ដី និង​អាស័យដា្ឋន​ច្បាស់លាស់ និង​ការ​ធានា​គោរព​តាម​នីតិវិធី​មិន​គួរណា​បដិសេធ​ទេ។ ខ្ញុំ​សង្ឃឹម​ថា​តុលាការ​កំពូល​នឹង​ផ្តល់​យុត្តិធម៌​លើ​រឿង​នេះ»​។

ទីប្រឹក្សា​បច្ចេកទេស​នៃ​អង្គការ​សិទ្ធិ​មនុស្ស​លីកាដូ​លោក អំ សំអាត យល់​ថា​ការ​សម្រេច​របស់​ចៅក្រម​បដិសេធ​លើ​ការ​ស្នើសុំ​នេះ​ដោយ​មិន​ទាន់​បាន​បញ្ជាក់​ពី​មូលហេតុ​នេះ​គឺ​បាន​បង្ហាញ​យ៉ាង​ច្បាស់​ពី​សម្ពាធ​នយោបាយ​មក​លើ​​ប្រព័ន្ធ​តុលាការ។

លោក​ថា៖ «បច្ចុប្បន្ន​យើង​ឃើញ​ថា​គណបក្ស​ទាំង​ពីរ​កំពុង​តែ​តានតឹង​នឹង​គ្នា​អ៊ីចឹង​ហើយ​តុលាការ​គឺ​មិន​ហ៊ាន​សម្រេច​នោះ​ទេ។ ធម្មតា​រឿង​ក្តី​បែប​នេះ​កាលណា​មាន​ភ័ស្តុតាង និង​សំអាង​ហេតុ​សមរម្យ​ជន​ជាប់​ចោទ​គប្បី​ត្រូវ​បាន​អនុញ្ញាត​ឲ្យ​នៅ​ក្រៅ​ឃុំ»​។

លោក ហុង សុខហួរ ត្រូវ​បាន​សមត្ថកិច្ច​ចាប់​ខ្លួន​កាលពី​ថ្ងៃ​ទី ១៥ ខែ​សីហា ឆ្នាំ ២០១៥ ដែល​ការ​ចាប់​ខ្លួន​នេះ​ធ្វើ​ឡើង​បន្ទាប់ពី​លោក​នាយក​រដ្ឋមន្ត្រី ហ៊ុន សែន បាន​ចេញ​បញ្ជា​ឲ្យ​តាម​ចាប់​ខ្លួន​។

បច្ចុប្បន្ន​លោក សុខហួរ ត្រូវ​បាន​ឃុំ​ខ្លួន​នៅ​ពន្ធនាគារ​ព្រៃស​ដោយ​រង​ការ​ចោទ​ប្រកាន់​បី​បទល្មើស​រួមមាន​ការ​ក្លែង​ឯកសារ​សាធារណៈ​ការ​ប្រើប្រាស់​ឯកសារ​ក្លែង និង​បទ​ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម​ពាក់ព័ន្ធ​នឹង​បកស្រាយ​សន្ធិសញ្ញា​ព្រំដែន​កម្ពុជា-វៀតណាម ឆ្នាំ ១៩៧៩ ដែល​ត្រូវ​បាន​ដាក់​បង្ហោះ​នៅលើ​ទំព័រ​ហ្វេសប៊ុក​របស់​លោក សម រង្ស៊ី ប្រធាន​គណបក្ស​សង្គ្រោះ​ជាតិ៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។