ភ្នំពេញៈ សាលាឧទ្ធរណ៍កាលពីម្សិលមិញ បានសម្រេចបន្ធូរបន្ថយទោសអតីតគ្រូបង្រៀនសាលាបឋមសិក្សាថ្មកែវ ក្នុងស្រុករលាប្អៀរ ខេត្តកំពង់ឆ្នាំងម្នាក់ដែលជាប់ចោទពីបទបៀតបៀនកេរ្តិ៍ភេទក្មេងស្រីជាសិស្សរបស់ខ្លួនឯងចំនួន ៤ នាក់ដែលមានអាយុពី ១៣ ទៅ ១៤ ឆ្នាំកាលពីឆ្នាំ ២០១៣ ត្រូវបានបន្ថយទោសពី ៥ ឆ្នាំមកនៅត្រឹម ៣ ឆ្នាំវិញ។
សំណុំរឿងនេះជនជាប់ចោទបានរត់គេចខ្លួនចាប់តាំងពីថ្ងៃផ្ទុះរឿងអាស្រូវនេះមក។នៅក្នុងបន្ទប់សវនាការកាលពីម្សិលមិញដែលអវត្តមានទាំងជនជាប់ចោទ ទាំងមេធាវីការពារសិទ្ធិ ឲ្យជនជាប់ចោទនោះលោកចៅក្រមចាយ ច័ន្ទតារាវណ្ណ បានអានសាលដីកាថា នៅក្នុងសំណុំរឿងនេះ មានជនជាប់ចោទឈ្មោះកែម ចាន់ឆេនជាអតីតគ្រូបង្រៀន នៅសាលាបឋមសិក្សាមួយ ក្នុងស្រុករលាប្អៀរខេត្តហើយក្រោយពីបានសួរដេញដោលផ្ទាល់មាត់ និងបានស្តាប់ចម្លើយរបស់ជនជាប់ចោទនិងសេចក្តីសន្និដ្ឋានរបស់មេធាវីការពារសិទ្ធិឲ្យជនជាប់ចោទ និងក្រោយពីបានពិនិត្យលើអង្គហេតុព្រមទាំងបានផ្ទៀងផ្ទាត់ចម្លើយរបស់ក្មេងស្រីរងគ្រោះទាំង ៤ នាក់មកក្រុមប្រឹក្សាជំនុំជម្រះសាលាឧទ្ធរណ៍យល់ឃើញថា ចម្លើយកាលពីនៅសាលាដំបូងខេត្តកំពង់ឆ្នាំង របស់ក្មេងស្រីទាំង ៤ នាក់ គឺចម្លើយខ្លះមានលក្ខណៈស្របគ្នា និងចម្លើយខ្លះ មានលក្ខណៈមិនស្របគ្នា នឹងអង្គហេតុឡើយ។
ចម្លើយរបស់ក្មេងស្រីរងគ្រោះថា ជនជាប់ចោទជាគ្រូបង្រៀនរបស់ពួកគេបានច្របាច់ដោះនិងលូកស្ទាបអង្អែលប្រដាប់ភេទ និងឱបថើប ហើយមានពេលខ្លះលោកគ្រូជាជនជាប់ចោទនោះ បានសម្រាតសំពត់ពួកគេនៅនឹងមុខថ្នាក់រៀនផង។
លោកចៅក្រមថ្លែងក្នុងអង្គសវនាការថា៖ «ហេតុដូច្នេះ ក្រុមប្រឹក្សាជំនុំជម្រះ យល់ថា រឿងនេះ មានតែបទល្មើសប្រទូស្តកេរ្តិ៍តែប៉ុណ្ណោះ ហើយអំពើនេះជនជាប់ចោទប្រព្រឹត្តតែ ទៅលើក្មេងស្រីម្នាក់ប៉ុណ្ណោះ។ ដូច្នេះគប្បីសាលាឧទ្ធរណ៍ពិចារណានិងកែប្រែទណ្ឌកម្មទោស ពីជាប់ពន្ធនាគារ ៥ ឆ្នាំមក ៣ ឆ្នាំវិញ ហើយត្រង់សំណងជំងឺចិត្តដែលអាណាព្យាបាលសិស្ស៣នាក់ប្តឹងទាមទារនោះ ក៏តុលាការមិនតម្រូវឲ្យជនជាប់ចោទសងទៅក្មេងទាំង ៣ នាក់ ដែលមានឈ្មោះក្នុងបណ្តឹងដែរ។ ប៉ុន្តែជនជាប់ចោទ ត្រូវសងសំណងជំងឺចិត្តទៅក្មេងស្រីរងគ្រោះម្នាក់ឈ្មោះ ម.ស.ល ចំនួន ១០ លានរៀល»។
លោកមេធាវី គា អ៊ាវ បានថ្លែងកាលពីម្សិលមិញថា ក្នុងនាមលោកជាមេធាវីការពារសិទ្ធិឲ្យកូនក្តី ហើយនៅពេលដែលសាលាឧទ្ធរណ៍ បន្ថយទោស ឲ្យកូនក្តី គឺគ្មានអ្វីក្រៅពីសប្បាយចិត្តនោះទេ មានន័យថា តុលាការបានផ្តល់នូវយុត្តិធម៌ដល់កូនក្តីរបស់លោកបើទោះបីជាកូនក្តីរបស់លោកបានរត់គេចខ្លួនចាប់តាំងពីមានការប្តឹងរូបលោកក៏ដោយ។
លោកបញ្ជាក់ថា៖ «រឿងនេះគឺសាក្សីទាំងអស់ មិនបានឆ្លើយថា បានឃើញលោកគ្រូហ្នឹង បានបៀតបៀនទៅលើក្មេងស្រីដទៃទៀត ក្រៅតែពីក្មេងស្រីម្នាក់ឈ្មោះ ម.ស.លនោះទេ។ អ៊ីចឹងបានន័យថា ការផ្ដន្ទាទោសដល់កូនក្តីខ្ញុំពីថ្នាក់ក្រោមមក ដោយសំអាងថា គាត់បៀតបៀនកេរ្តិ៍ភេទ ទៅលើក្មេងដទៃក្រៅពីក្មេងម្នាក់ឈ្មោះម.ស.ល គឺខ្ញុំគិតថា ជាការយល់ច្រឡំ។ តុលាការឧទ្ធរណ៍ លោកពិតជាមានការស្វែងយល់ និងពិតជាមានគតិបណ្ឌិត ផ្តល់យុត្តិធម៌ត្រឹមត្រូវហើយ»។
សូមរំឭកថា ក្នុងពាក្យបណ្តឹងរបស់អាណាព្យាបាលសិស្សទាំង ៤ នាក់បានរៀបរាប់ថា លោកគ្រូបង្រៀនសិស្សថ្នាក់ទី ៦ (ក) នៃសាលាបឋមសិក្សា ថ្មកែវ ឈ្មោះ កែម ចាន់ឆេន បានប្រព្រឹត្តទៅលើសិស្សស្រីខ្លួនឯង មានអាយុចន្លោះពី ១៣ ឆ្នាំទៅអាយុ ១៤ ឆ្នាំចំនួន ៤ នាក់ ដោយប្តឹងចោទប្រកាន់ពីបទប្រទូស្តកេរ្តិ៍។
ពាក្យបណ្តឹងបានរៀបរាប់ថា នៅក្នុងអំឡុងចាប់ពីខែកុម្ភៈមកដល់ពាក់កណ្តាលខែឧសភាឆ្នាំ ២០១៣ ឈ្មោះ កែម ចាន់ឆេន តែងលបចាប់ឱប និងបានច្របាច់សុដន់កូនៗរបស់ពួកគាត់ជារឿយៗដែលពេលខ្លះនៅក្នុងថ្នាក់ម្នាក់ឯង ពេលសិស្សឯទៀតចេញលេង ហើយពេលខ្លះទៀតបានធ្វើបែបនេះនៅផ្ទះរបស់គ្រូបង្រៀនជាប់ចោទទៀតផង នៅពេលដែលកូនៗពួកគាត់ទៅរៀនគួរនៅផ្ទះគ្រូបង្រៀននោះ ពេលដែលប្រពន្ធគាត់មិននៅផ្ទះ៕