ភ្នំពេញៈ សាលាឧទ្ធរណ៍នៅថ្ងៃទី១៤ខែសីហានេះ បានបើកសវនាការជំនុំជម្រះស្រ្តីជាប់ចោទម្នាក់ ដែលត្រូវសាលាដំបូងខេត្ត ព្រះវិហារ ផ្តន្ទាទោសដាក់ពន្ធនាគារ ១ ឆ្នាំ កន្លះដោយសារតែស្ត្រីរូបនេះឲ្យលេខទូរស័ព្ទគ្រូមន្តអាគម ទៅស្ត្រីរងគ្រោះម្នាក់ហើយស្ត្រីរងគ្រោះបានចាញ់បោកគ្រូមន្តអាគមនោះអស់ប្រាក់ ១៥ ០០០ ដុល្លារ។
ស្រ្តីជាប់ចោទឈ្មោះ ប៊ុន ធឿនរ៉ាយ៉ាអាយុ ៥០ ឆ្នាំនិយាយប្រាប់ចៅក្រមនៅក្នុងសវនាការថា អ្នកស្រីបានស្គាល់ស្រ្តីឈ្មោះ បូ សុខេង រស់នៅភូមិស្ថាពរ សង្កាត់ប៉ាហាល ក្រុង-ខេត្តព្រះវិហារជាមួយអ្នកស្រី។ ស្រ្តីជាប់ចោទបន្តថា បន្ទាប់ពីស្គាល់គ្នារយៈពេល១ខែស្រ្តីរងគ្រោះ បានសួរអ្នកស្រីរកគ្រូទាយ ហើយអ្នកស្រីបានឲ្យលេខទូរស័ព្ទគ្រូមន្តអាគមម្នាក់ ព្រោះគ្រូនោះធ្លាប់ឲ្យលេខឆ្នោតអ្នកស្រី ហើយអ្នកស្រីចាក់ត្រូវ។
ស្ត្រីជាប់ចោទប្រាប់តុលាការថា៖ «រឿងនេះ ខ្ញុំទទួលស្គាល់ថា ខ្ញុំបានផ្តល់លេខទូរស័ព្ទទៅស្រ្តីរងគ្រោះមែន តែខ្ញុំមិនបានចូលរួមក្នុងការបោកលុយទេ ព្រោះ ពេលស្រ្តីរងគ្រោះឲ្យលុយទៅគ្រូទាយនោះខ្ចីក៏គាត់មិនបានប្រាប់ខ្ញុំដែរ។ ខ្ញុំសូមតុលាការដោះលែងខ្ញុំឲ្យមានសេរីភាពវិញផង ព្រោះខ្ញុំមានកូនស្រីតូចម្នាក់គ្មានអ្នកថែទាំទេ ហើយខ្ញុំស៊ីឈ្នួលគេដើម្បីចិញ្ចឹមកូន»។
ស្រ្តីជាប់ចោទត្រូវបានសមត្ថកិច្ចចាប់ឃាត់ខ្លួននៅថ្ងៃទី ២២ ខែ មេសា ឆ្នាំ ២០១៧ និងត្រូវសាលាដំបូងខេត្តព្រះវិហារកាលពីថ្ងៃទី៧ ខែកុម្ភៈ ឆ្នាំ២០១៨ ផ្តន្ទាទោសដាក់គុក ១ ឆ្នាំកន្លះចោទពីបទផ្តើមគំនិត ក្នុងអំពើឆបោក និងបង្គាប់ឲ្យសងលុយទៅស្រ្តីរងគ្រោះ ១៥ ០០០ ដុល្លារ។
ស្រ្តីរងគ្រោះឈ្មោះ បូ សុខេង បានប្រាប់ចៅក្រម ក្នុងសវនាការថា បន្ទាប់ពីអ្នកស្រីបានលេខទូរស័ព្ទហើយ អ្នកស្រីក៏ឲ្យគ្រូមន្តអាគមនោះទស្សន៍ទាយតាមទូរស័ព្ទ ហើយស្រ្តីគ្រូទាយនោះ ប្រាប់ថា អ្នកស្រីត្រូវមានគ្រោះ និង ត្រូវរៀបចំសំណែនឲ្យមានហុងស៊ុយឡើងវិញ ហើយស្រ្តីគ្រូទាយនោះ បានឲ្យអ្នកស្រីផ្ញើលុយទៅឲ្យគាត់នៅខេត្តពោធិ៍សាត់។
បន្ទាប់ពី អ្នកស្រីផ្ញើលុយទៅ គ្រូទាយមន្តអាគមន៍នោះ បានផ្ញើជាក្រមួនទឹកសិល្ប៍និងកន្សែងយន្តតាមរថយន្តឈ្នួលមកឲ្យស្រ្តីជាប់ចោទ នៅខេត្តព្រះវិហារ ហើយស្រ្តីជាប់ចោទ យករបស់នោះទៅឲ្យអ្នកស្រីបន្ត។
ស្ត្រីរងគ្រោះបញ្ជាក់ថា៖ «ខ្ញុំផ្ញើលុយឲ្យគ្រូនោះជាហូរហែ រហូតដល់ ១៥ ០០០ ដុល្លារ ហើយគ្រូទាយនោះ ក៏បិទទូរស័ព្ទ រីឯស្រ្តីជាប់ចោទ ក៏ខ្ញុំមិនអាចទាក់ទងបានទៀត ទើបខ្ញុំប្តឹងសមត្ថកិច្ច ឲ្យចាប់ខ្លួនគាត់ទៅ។ ពេលខ្ញុំផ្ញើលុយម្តងៗខ្ញុំមិនដែលប្រាប់ស្រ្តីជាប់ចោទទេ»។
កញ្ញាព្រះរាជអាជ្ញា យិន សុគន្ធារី តំណាងមហាអយ្យការសន្និដ្ឋានថា៖ «បើពិនិត្យតាមអង្គហេតុស្រ្តីជាប់ចោទត្រឹមតែផ្តល់លេខទូរស័ព្ទទៅឲ្យស្រ្តីរងគ្រោះប៉ុណ្ណោះ។ រឿងនេះខ្ញុំសូមក្រុមប្រឹក្សាជំនុំជម្រះពិចារណាតាមច្បាប់»។
សាលដីកាសំណុំរឿងនេះនឹងត្រូវប្រកាសនៅថ្ងៃទី ២៩ ខែសីហា៕