.jpg)
ភ្នំពេញៈ សាលាឧទ្ធរណ៍កាលពីម្សិលមិញ បានលើកពេលជំនុំជម្រះជនជាប់ចោទ ២ នាក់ប្តីប្រពន្ធ ដោយសារអវត្តមានបុរសជាប្តីពាក់ព័ន្ធនឹងការចាក់សម្លាប់ជនរងគ្រោះប្រព្រឹត្តកាលពីឆ្នាំ ២០១៦ នៅភូមិ ស្លែងរលើង សង្កាត់ទឹកថ្លា ខណ្ឌ សែនសុខ រាជធានី ភ្នំពេញ។
លោកស្រីចៅក្រម គឹម ដានី ប្រធានក្រុមប្រឹក្សាជំនុំជម្រះបានប្រាប់ស្រ្តីជាប់ចោទដែលឈរនៅមុខក្រចកសេះក្នុងសវនាការថា៖ «សំណុំរឿងនេះ តុលាការមិនអាចជំនុំជម្រះបានទេ ព្រោះសវនាការតម្រូវឲ្យមានវត្តមានជនជាប់ចោទជាប្តីមកឆ្លើយបំភ្លឺ ដោយសាររឿងនេះជារឿងឧក្រិដ្ឋ ព្រោះជនជាប់ចោទទាំង ២ នាក់ត្រូវតុលាការថ្នាក់ក្រោមផ្តន្ទាទោសម្នាក់ៗដល់ទៅ ១០ ឆ្នាំ»។
ស្រ្តីជាប់ចោទបានប្រាប់ចៅក្រមថា៖ «ខ្ញុំទើបតែឃើញឈ្មោះលើក្តារខៀន ហើយខ្ញុំត្រូវបានដឹកមកជំនុំជម្រះភ្លាមៗ។ ឯប្តីខ្ញុំគាត់ជាប់ឃុំនៅពន្ធនាគារត្រពាំងផ្លុង ហើយប្រហែលជាគាត់មិនដឹងអំពីការជំនុំជម្រះថ្ងៃនេះទេ»។
ព្រះរាជអាជ្ញាគឺ កញ្ញា គឹម កែវកល្យាណ តំណាងមហាអយ្យការសន្និដ្ឋានថា ដោយសាររឿងនេះជាបទល្មើសឧក្រិដ្ឋ ដូច្នេះត្រូវឲ្យមានវត្តមានជនជាប់ចោទបំភ្លឺ។ ដូច្នេះសូមក្រុមប្រឹក្សាជំនុំជម្រះលើកទៅពេលក្រោយចុះ។
តាមអង្គហេតុបង្ហាញថា កាលពីថ្ងៃទី៦ ខែកក្កដា ឆ្នាំ ២០១៦ ស្រ្តីជាប់ចោទឈ្មោះ ឆោម ណៃ អាយុ ៣៥ ឆ្នាំនិងប្តីឈ្មោះ ឡឹង សុខរ៉ា អាយុ ៣៧ ឆ្នាំ បានទាស់សម្តីជាមួយស្រ្តីរងគ្រោះឈ្មោះ ឈួន ចាន់ថា អាយុ ៣៣ ឆ្នាំរឿងបង្ហូរទឹកដាក់មុខតូបលក់ដូរ។
អង្គហេតុបង្ហាញបន្តថា ក្នុងជម្លោះនោះស្រ្តីជាប់ចោទបានយកកាំបិតបុ័ងតោ គប់លើស្រ្តីរងគ្រោះចំដើមទ្រូងជាប់កាំបិត។ ភ្លាមៗនោះបុរសជាប្ដីដែលជាអ្នកលក់ទឹកអំពៅបានរត់ទៅដកកាំបិតចេញ តែបែរជាសង្កត់ឲ្យកាំបិតកាន់តែមុតជ្រៅទើបដកចេញ។ ភ្លាមនោះក្រុមគ្រួសារបានដឹកស្រ្តីរងគ្រោះទៅពេទ្យ ប៉ុន្តែដោយមុខរបួសធ្ងន់ពេកក៏ដាច់ខ្យល់ស្លាប់ទៅ៕
