.jpg)
អ្នកគ្រូ ពិនិត្យកម្តៅសិស្សកាលពីខែមករាឆ្នាំ ២០២០។ ហេង ជីវ័ន
ភ្នំពេញៈ ឪពុកម្ដាយមួយចំនួន មិនពេញចិត្តការធ្វើតេស្ដរកជំងឺកូវីដ ១៩ លើសិស្សសាលាដោយត្រូវចំណាយពី ១០០ ទៅ ១១០ ដុល្លារ សម្រាប់សិស្សម្នាក់ៗនោះឡើយ ដោយសារពួកគេព្រួយបារម្ភថា ក្មេងៗនឹងមានការឈឺចាប់ ដោយសារការយកសំឡីរុកចូលច្រមុះយកសំណាកទៅធ្វើតេស្ដ។ ប៉ុន្តែមន្ត្រីថា សាលារៀនគឺត្រូវតែអនុវត្តតាមការសម្រេចរបស់អន្តរក្រសួង។
បុរសសុំលាក់អត្តសញ្ញាណម្នាក់បានប្រាប់ភ្នំពេញប៉ុស្ដិ៍ម្សិលមិញថា លោករួមទាំងឪពុកម្ដាយប្រហែល ១០០ នាក់ផ្សេងទៀតបាននាំគ្នាប្រឆាំងទៅនឹងសាលាដែលបានតម្រូវឱ្យឪពុកម្ដាយត្រូវយល់ព្រមឱ្យកូនៗរបស់ខ្លួនធ្វើតេស្ដរកជំងឺកូវីដ១៩ជាមុន មុនអនុញ្ញាតឱ្យចូលទៅក្នុងសាលារៀនដែលគ្រោងបើកដំណើរការវិញនៅខែសីហា។
បុរសដែលមានកូនអាយុ ៨ ឆ្នាំម្នាក់ និង ១២ ឆ្នាំម្នាក់រៀននៅសាលារៀនអន្តរជាតិឯកជនមួយបានបន្តថា ឪពុកម្ដាយទាំងនេះមិនពេញចិត្តចំពោះវិធានការនេះឡើយ ដោយពួកគេយល់ថា ការយកសំឡីយ៉ាងវែងរុកចូលទៅក្នុងច្រមុះគឺប្រៀបដូចជាការធ្វើបាបដល់កូនសិស្សដែលមួយចំនួនគឺមានអាយុត្រឹម ៥ ទៅ ៦ ឆ្នាំប៉ុណ្ណោះ។
លោកបន្ថែមថា ការធ្វើតេស្ដនេះគឺសាលារៀនខ្លះតម្រូវឱ្យឪពុកម្ដាយចំណាយ ១០០ ដុល្លារ ខណៈសាលារៀនខ្លះទៀតគឺឱ្យចំណាយ ១១០ ដុល្លារ បើគិតទាំងការចេញវិញ្ញាបនបត្របញ្ជាក់សុខភាពសម្រាប់សិស្សម្នាក់ៗ។
លោកថា៖ «ពួកយើងកំពុងពិភាក្សាគ្នា ដើម្បីរកដំណោះស្រាយពីសាលា ព្រោះធ្វើអ៊ីចឹងដូចធ្វើបាបកូនក្មេង។ ការយកសំឡីយ៉ាងវែងញាត់ចូលច្រមុះ ទោះក្មេងមិនឈឺក៏ត្រូវឈឺ (ឈឺចម្រុះ) ដែរ ហើយពួកខ្ញុំអាណិតកូន ហើយមិនមែនជោះឈាមឯណា បើត្រឹមជោះឈាមមិនអីទេ»។
លោកថា៖ «ខ្ញុំអត់យល់ដែរ ម៉េចបានកំណត់អ៊ីចឹង? គេធ្វើតេស្ដហ្នឹងមុនកូនក្មេងចូល (សាលា) ប៉ុន្តែយើងពិចារណាមើល នៅពេលចូលរៀនហើយក្មេងៗចេញមក (ផ្ទះ) វិញដដែលហើយនៅពេលចូលវិញធ្វើម៉េចទៅ? ក្មេងៗនឹងចេញចូលៗអ៊ីចឹងធ្វើតេស្ដបានប្រយោជន៍អី?»។
សាលារៀនចំនួន ២០ ដែលជាសាលារៀនឯកជនអន្តរជាតិមានស្ដង់ដាសុវត្ថិភាពខ្ពស់គឺបានទទួលការអនុញ្ញាតពីក្រសួងអប់រំ យុវជន និងកីឡា ដើម្បីបើកដំណើរការឡើងវិញនៅក្នុងខែសីហា ប៉ុន្តែពួកគេគឺត្រូវអនុវត្តតាមវិធានការទប់ស្កាត់ជំងឺកូវីដ ១៩ តាមការណែនាំរបស់ក្រសួងសុខាភិបាល និងក្រសួងអប់រំ។
វីដេអូ៖
សាលារៀនខ្លះបញ្ជាក់ថា ការបើកសាលាឡើងវិញនៅក្នុងពេលកំពុងកើតមានជំងឺកូវីដ១៩នេះនឹងចាប់ផ្ដើមពីថ្ងៃទី ១០ ខែសីហា បន្ទាប់ពីត្រូវបានផ្អាកតាំងពីខែមីនាមកក្រោយពីកម្ពុជាបានរកឃើញករណីជំងឺកូវីដលើកដំបូងលើពលរដ្ឋខ្មែរ។
លិខិតរបស់សាលារៀនអន្តរជាតិមួយនៅភ្នំពេញដែលភ្នំពេញប៉ុស្ដិ៍ទទួលបានបញ្ជាក់ថា ឪពុកម្ដាយត្រូវចុះកិច្ចព្រមព្រៀងស្ដីពីការយល់ព្រមចូលរួមសហការ និងបង់ប្រាក់ចំណាយក្នុងការបញ្ជូនកូនឱ្យមកសិក្សាផ្ទាល់នៅសាលារៀនក្នុងបរិបទកូវីដ ១៩។
នៅក្នុងកិច្ចព្រមព្រៀងនោះគឺឪពុកម្ដាយត្រូវយល់ព្រមនាំកូនធ្វើតេស្ដរកមេរោគកូវីដតាមការរៀបចំរបស់ភាគីសាលារៀនស្របតាមលក្ខខណ្ឌតម្រូវរបស់ក្រសួងអប់រំ និងក្រសួងសុខាភិបាលជាមុនសិន មុនពេលសាលាអនុញ្ញាតឱ្យវិលមកកាន់បរិវេណសាលា។
ប៉ុន្តែការតម្រូវនេះបានធ្វើឱ្យឪពុកម្ដាយមួយចំនួនយកទៅបង្ហោះនៅតាមហ្វេសប៊ុកនូវសំណេរអត្ថបទមួយដូចៗគ្នា ដើម្បីប្រឆាំងការបង្ខំឱ្យកូនសិស្សធ្វើតេស្ដរកមេរោគនេះ ហើយបានបញ្ជាក់ថា អ្នកដែលគួរធ្វើតេស្ដ គឺជាគ្រូបង្រៀនបរទេសដែលអាចទើបធ្វើដំណើរមកពីក្រៅប្រទេសក្នុងពេលកំពុងផ្ទុះជំងឺកូវីដ ១៩។
ពួកគាត់បានគាំទ្រចំពោះវិធានការផ្សេងវិញដែលត្រូវអនុវត្តនៅពេលបើកសាលារៀន គឺដូចជាការបាញ់ថ្នាំសម្លាប់មេរោគញឹកញាប់ការវាស់កម្ដៅសិស្ស និងបុគ្គលិកឱ្យបានជាប្រចាំថ្ងៃមានទឹកអាល់កុលលាងដៃ និងបង្រៀនសិស្សឱ្យលាងដៃតម្រូវឱ្យពាក់ម៉ាស់ និងរក្សាគម្លាតពីគ្នាជាដើម។
ប៉ុន្តែលោក រស់ សុវាចា អ្នកនាំពាក្យក្រសួងអប់រំប្រាប់ភ្នំពេញប៉ុស្ដិ៍ថា ការតម្រូវឱ្យសាលាទាំង ២០ ត្រូវចុះកិច្ចព្រមព្រៀងជាមួយក្រសួង ដើម្បីអនុវត្តនូវវិធានការមួយចំនួន នៅពេលបើកសាលានាពេលខាងមុខដូចជាការធ្វើតេស្ដរកជំងឺកូវីដលើសិស្ស និងបុគ្គលិកជាដើម គឺជាការសម្រេចដោយកិច្ចប្រជុំរបស់អន្តរក្រសួងស្ដីពីការទប់ស្កាត់ ការឆ្លងជំងឺកូវីដ ១៩។
លោកបន្តថា ថ្វីដ្បិតសាលាទាំងនេះអនុញ្ញាតឱ្យបើកដំណើរការឡើងវិញ ប៉ុន្តែមិនអនុញ្ញាតឱ្យសិស្សទាំងអស់ត្រូវត្រឡប់ទៅរៀនផ្ទាល់នៅសាលានោះទេ គឺត្រូវបែងចែកសិស្សឱ្យប្ដូរវេនគ្នា ទៅរៀននៅសាលាខ្លះ និងបន្តរៀនតាមអនឡាញខ្លះ។ «នោះគឺជាវិធានការរបស់សុខាភិបាលដែលគណៈកម្មការអន្តរក្រសួងសម្រេច»។
ភ្នំពេញប៉ុស្ដិ៍មិនអាចសុំការបញ្ជាក់ពីលោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានទេដោយទូរស័ព្ទលោកស្រីមិនអាចទាក់ទងបាន។ ទោះយ៉ាងណា ក្រសួងអប់រំព្រមានថា ចំពោះសាលាដែលបើកដំណើរការក្នុងដំណាក់កាលទី ១ ហើយពុំបានអនុវត្តតាមអ្វីដែលបានចុះកិច្ចព្រមព្រៀងជាមួយក្រសួងនឹងត្រូវប្រឈមនឹងការព្រមាន និងការផ្អាកដំណើរការឡើងវិញ៕
