.jpg)
សិស្សសាលា ៣ នាក់ ត្រូវមន្ត្រីព្រៃឈើបើកឡានបុកស្លាប់។ សហការី
ព្រះវិហារៈ ឪពុក ម្ដាយរបស់សិស្សសាលា ៣ នាក់ ដែលត្រូវបានលោក គឹម ចេត្ថាវី ប្រធានរដ្ឋបាលព្រៃឈើស្រុកជាំក្សាន្ត បើករថយន្តបុកស្លាប់ហើយរត់គេចខ្លួន កាលពីថ្ងៃទី ២២ ខែ មិថុនា បានដាក់ពាក្យប្ដឹងទៅសាលាដំបូងខេត្តព្រះវិហារដើម្បីទាមទារសំណងពី ២ ម៉ឺន ទៅដល់ ៤ ម៉ឺនដុល្លារ ខណៈជនបង្កបានឲ្យតំណាងចូលទៅសុំសម្របសម្រួលជាមួយគ្រួសារសពក្មេងរងគ្រោះដោយផ្តល់សំណងត្រឹម ១ ៥០០ ដុល្លារ សម្រាប់សពក្មេងម្នាក់។
លោក កែវ សុខុន អាយុ ៥៤ ឆ្នាំ រស់នៅភូមិជាំក្សាន្ត ឃុំជាំក្សាន្ត ស្រុកជាំក្សាន្ត និងត្រូវជាឪពុករបស់សពយុវសិស្សឈ្មោះ កែវ ប៊ុនជា ឬហៅក្រៅថា ណារ៉ាត់ អាយុ ១៦ ឆ្នាំ រៀនថ្នាក់ទី ៨ នៃអនុវិទ្យាល័យជាំក្សាន្ត ដែលជាយុវសិស្សម្នាក់ក្នុងចំណោមយុវសិស្សទាំង ៣ នាក់ ត្រូវរថយន្តបុកស្លាប់ បានប្រាប់ភ្នំពេញប៉ុស្ដិ៍ម្សិលមិញថា ពួកលោកជាឪពុកម្ដាយ បាននាំគ្នាដាក់ពាក្យប្ដឹង ទៅអធិការស្រុកជាំក្សាន្តកាលពីថ្ងៃទី ២៤ ខែ មិថុនា និងទើបតែដល់ថ្ងៃទី ៣ កក្កដា ទើបពាក្យបណ្ដឹងនោះត្រូវបានដាក់ទៅតុលាការខេត្តព្រះវិហារ។
លោកបន្តថា ជនបង្កឈ្មោះ គឹម ចេត្ថាវី ដែលបានបើករថយន្តបុកកូនលោកស្លាប់ហើយបានរត់គេចខ្លួនចាប់តាំងពីថ្ងៃទី ២២ ខែ មិថុនា មកនោះ គឺរហូតមកដល់ពេលនេះ មិនទាន់ចូលមកដោះស្រាយនៅឡើយទេ ប៉ុន្តែបងប្អូនរបស់ជនបង្កនេះ បានចេញមកសម្រុះ សម្រួលជំនួសកាលពីថ្ងៃទី ៣០ មិថុនា នៅពេលគ្រួសាររបស់លោក កំពុងរៀបចំពិធី បុណ្យសព ៧ ថ្ងៃ ដោយពួកគេបានចូលបុណ្យចំនួន ៥០០ ដុល្លារ ក្នុងគ្រួសារនីមួយៗ និងបានស្នើសុំផ្ដល់ប្រាក់សំណងចំនួន ១ ៥០០ ដុល្លារក្នុង ១ គ្រួសារ។
លោកថា៖ «តំណាងឱ្យជនបង្កដែលត្រូវជាប្អូនគេថា កូនខាងខ្ញុំវាខុសព្រោះវាទៅបុកឡានគេឱ្យខូចអីណា ហើយគេឱ្យសំណងតែ ១ ៥០០ ក្នុងសពមួយ ប៉ុន្តែពួកខ្ញុំថា មិនអាចទទួលយកបានទេ ព្រោះកូនពួកខ្ញុំមិនខុសទេ ប្រសិនបើឡាននោះមិនបត់ទៅបុកកូនខ្ញុំ កូនខ្ញុំក៏មិនស្លាប់ដែរ»។
លោកអះអាងថា ឈ្មោះ គឹម ចេត្ថាវី បានផឹកស្រាស្រវឹងហើយបានបើកឡានរបស់ខ្លួន ដើម្បីបន្តមកច្រៀងនៅហាងខារ៉ាអូខេឈ្មោះវីឡាផ្កាយមាស ហើយនៅពេលដល់ចំណុចត្រូវបត់ឆ្លងផ្លូវ ចូលទៅក្នុងហាងខារ៉ាអូខេនោះ ជននេះ មិនបានបើកភ្លើងស៊ីញ៉ូសុំឆ្លងផ្លូវឡើយគឺបត់យកតែម្តងទើបត្រូវបុកម៉ូតូដែលជិះដោយយុវសិស្សទាំង ៣ នាក់ ក្នុងទិសដៅស្របគ្នាប៉ុន្តែស្ថិតនៅចំណុចផ្លូវអាទិភាពរបស់ខាងភាគីម៉ូតូ។
លោកបញ្ជាក់ថា៖ «នៅលើផ្លូវអាទិភាពរបស់យើង ហើយបត់ហ្នឹង មិនបានឱ្យស៊ីញ៉ូអីទេ គឺបត់មកបុកផាំងតែម្ដងហ្នឹង។ គេផឹកគ្រឿងស្រវឹងរួច គេជិះឡានប្រុងមកច្រៀង»។
បើតាមរបាយការណ៍របស់នគរបាលស្រុកជាំក្សាន្តបញ្ជាក់ថា ករណីគ្រោះថ្នាក់ចរាចរណ៍រវាងម៉ូតូម៉ាក Dream ឆ្នាំ ២០១៨ ជាមួយរថយន្ត Ford Ranger ស្លាកលេខ 2AY 9595 បានកើតឡើងនៅថ្ងៃទី ២២ ខែ មិថុនា វេលាម៉ោង ២ និង ១០ នាទីរសៀល ស្ថិតនៅលើដងផ្លូវជាតិលេខ ៦៩ B ក្នុងភូមិស្រអែមខាងត្បួង ឃុំកន្ទួត ស្រុកជាំក្សាន្ត។ មុនពេលមន្ត្រីចរាចរណ៍ចុះទៅដល់កន្លែងកើតហេតុ ម្ចាស់រថយន្តដែលជាជនបង្ក បានរត់គេចខ្លួនបាត់ ខណៈជនរងគ្រោះទាំង ៣ នាក់ជាសិស្សសាលាមានឈ្មោះ កែវ ប៊ុនជា ឈ្មោះ ចំរើន ណារ៉ុង និងឈ្មោះ ប៊ុនលី កាណៈ បានស្លាប់នៅកន្លែងកើតហេតុចំនួន ២ នាក់ និងម្នាក់ទៀតស្លាប់ នៅពេលបញ្ជូនទៅដល់មន្ទីរពេទ្យស្រុក។
លោកឲ្យដឹងថា ក្នុងពាក្យបណ្ដឹងដាក់ទៅតុលាការគឺគ្រួសារលោកបានទាមទារសំណងចំនួន ៤ ម៉ឺនដុល្លារ ខណៈ ២ គ្រួសារទៀត ១ គ្រួសារ ទាមទារសំណងតែ ២ ម៉ឺនដុល្លារប៉ុណ្ណោះ ប៉ុន្តែលោកថា កាលពីព្រឹកថ្ងៃទី ៤ ខែ កក្កដាម្សិលមិញនេះ ខាងអាជ្ញាធរស្រុកជាំក្សាន្ត បានហៅពួកលោកទៅប្រជុំ ហើយអាជ្ញាធរបានដើរតួនាទីជំនួសឱ្យជនបង្ក ដើម្បីសុំឱ្យពួកលោកទទួលយកសំណងត្រឹមតែ ៤ ពាន់ដុល្លារបានហើយ ក្នុង ១ គ្រួសារ ប៉ុន្តែពួក លោកបានបដិសេធសំណើនេះ និងបានស្នើឱ្យបុគ្គលឈ្មោះ គឹម ចេត្ថាវី ត្រូវចេញមុខមកសម្រុះសម្រួលដោយផ្ទាល់។
លោក កែវ សុវណ្ណារ៉ា អាយុ ៤៨ ឆ្នាំ រស់នៅឃុំកន្ទួត និងត្រូវជាឪពុករបស់យុវជនរងគ្រោះឈ្មោះ ប៊ុនលី កាណៈ អាយុ ១៥ ឆ្នាំ បានប្រាប់ភ្នំពេញប៉ុស្តិ៍ថា មូលហេតុដែលលោកមិនទទួលយកសំណងចំនួន ៤ ពាន់ដុល្លារ ដោយសារគ្រាន់តែលោកបានរៀបចំពិធីបុណ្យសព គឺចំណាយអស់ប្រហែលពី ២ ទៅ ៣ ពាន់ដុល្លារហើយ ប៉ុន្តែលោកថា សំណងដែលលោកដាក់ក្នុងពាក្យបណ្ដឹងចំនួន ២ ម៉ឺនដុល្លារ នឹងអាចចុះខ្លះប្រសិនបើជនបង្កចេញមកសម្រុះសម្រួលដោយផ្ទាល់។
លោកបានថ្លែងទៀតថា៖ «យើងទារ ២ ម៉ឺនហ្នឹង ព្រោះកូនយើងគ្មានកំហុសទេព្រោះវាជិះបញ្ច្រាសទិសគ្នា»។
លោក ឈឺម មេធា មន្ត្រីនគរបាលចរាចរណ៍ស្រុកជាំក្សាន្ត បានប្រាប់ភ្នំពេញប៉ុស្ដិ៍ថា លោកមិនអាចធ្វើអធិប្បាយលើបញ្ហានេះបានឡើយដោយសារសំណុំរឿងនេះបានដាក់ទៅដល់តុលាការរួចហើយ។ ប៉ុន្តែលោកថា បើយុវជនទាំង ៣ នាក់ បានពាក់មួកសុវត្ថិភាពប្រហែលមិនអាចគ្រោះថ្នាក់ដល់ស្លាប់ឡើយ។
លោកស្រីជុំ កន្និយ៉ា អ្នកនាំពាក្យសាលាដំបូងខេត្តព្រះវិហារថ្លែងថា លោកស្រីបានឃើញមន្ត្រីចរាចរណ៍បាននាំពាក្យបណ្ដឹងនោះ មកកាន់តុលាការហើយ កាលពីល្ងាចថ្ងៃទី ៣ កក្កដា។
លោកស្រីថា៖ «ចាំមើលខ្ញុំមើលពាក្យបណ្ដឹងសិននៅពេលទៅដល់កន្លែង ព្រោះម្សិលមិញភ្លៀង»។
ភ្នំពេញប៉ុស្ដិ៍មិនទាន់អាចរកប្រភពទាក់ទង ទៅលោក គឹម ចេត្ថាវី បានទេខណៈលោក ពឹង ទ្រីដា ប្រធានមន្ទីរកសិកម្មខេត្តព្រះវិហារ បញ្ជាក់យ៉ាងខ្លីកាលពីម្សិលមិញថា លោក ចេត្ថាវី បានសុំសម្រាកពីការងារមួយរយៈហើយ។ លោកថា៖ «ឮថា គេមានអ្នកតំណាងសម្រុះសម្រួលគ្នាហើយ»។
លោក ឡោ ចាន់ មន្ត្រីសម្របសម្រួលអង្គការអាដហុកខេត្តព្រះវិហារបានលើកឡើងថា នៅក្នុងបទល្មើសព្រហ្មទណ្ឌដែលបើកបរបណ្ដាលឱ្យអ្នកដទៃស្លាប់ ថ្វីដ្បិតមានការផ្ដល់សំណងជារដ្ឋប្បវេណីក្ដី ប៉ុន្តែជនបង្កគឺនៅតែប្រឈមមុខទៅនឹងបទល្មើសព្រហ្មទណ្ឌដដែល ហើយអាជ្ញាធរគ្មានសិទ្ធិចេញមុខសម្របសម្រួលរឿងផ្ដល់ប្រាក់សំណងនោះទេ។
លោកថា៖ «គាត់អាជ្ញាធរ ក្នុងតួអង្គរដ្ឋ គាត់មិនអាចសម្របសម្រួលរឿងព្រហ្មទណ្ឌបានទេ ប្រសិនបើរឿងរដ្ឋប្បវេណី គាត់មានសិទ្ធិសម្របសម្រួលបាន ហើយបើរឿងព្រហ្មទណ្ឌ គ្មាននរណាម្នាក់មានសិទ្ធិសម្របសម្រួលបានទេ គឺមានតែចាត់វិធានការតាមផ្លូវច្បាប់»៕
