.jpg)
លោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា (ឆ្វេង) ក្នុងជំនួបជាមួយលោក ស ខេង រដ្ឋមន្រ្តីក្រសួងមហាផ្ទៃ កាលពីថ្ងៃទី ២៦ ខែឧសភា។ រូបថត ក្រសួងមហាផ្ទៃ
ភ្នំពេញៈ លោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានជួបលោក ស ខេង រដ្ឋមន្រ្តីក្រសួងមហាផ្ទៃ កាលពីថ្ងៃទី ២៦ ខែឧសភា ដោយបានពិភាក្សា អំពីកិច្ចសហប្រតិបត្តិការ រវាងប្រទេសទាំងពីរ រួមទាំងបញ្ហាអង្គការសង្គមស៊ីវិល និងលទ្ធិប្រជាធិបតេយ្យនៅកម្ពុជា។
លោក Murphy បានសរសេរនៅលើប្រព័ន្ធ Twitter របស់លោកថា ការជួបប្រជុំជាមួយលោក ស ខេង ទទួលបានលទ្ធផលផ្លែផ្កា ដោយជំនួបនោះ បានពិភាក្សាលើបញ្ហាមួយចំនួន ដូចជាស្ដីពីការពង្រឹងកិច្ចសហប្រតិបត្តិការ ពង្រឹងការអនុវត្តច្បាប់កម្ពុជា-សហរដ្ឋអាមេរិក ការផ្ដល់ជំនួយចំនួន ១១ លានដុល្លារ ដែល អាមេរិកផ្ដល់ឱ្យកម្ពុជា ដើម្បីប្រយុទ្ធជំងឺកូវីដ ១៩ ការពិភាក្សាអំពីសារៈសំខាន់ នៃសង្គមស៊ីវិលដ៏រស់រវើកមួយ និងតម្រូវការឱ្យមានគ្រប់សំឡេង ដើម្បីចូលរួមនៅក្នុងសង្គមប្រជាធិបតេយ្យ។
គេហទំព័ររបស់ក្រសួងមហាផ្ទៃ ក៏បានបញ្ជាក់ដែរថា នៅក្នុងជំនួបនោះ គឺលោក ស ខេង សង្ឃឹមថា ទំនាក់ទំនងរវាងប្រទេសទាំង២ ជាពិសេសក្នុងអាណត្តិការងាររបស់លោក Murphy នឹងនៅតែបន្តរីកចំរើនបន្ថែមទៀត។
ក្នុងជំនួបនោះ លោក ស ខេង បានប្រាប់លោក Murphy ថា កម្ពុជាកំពុងពន្លឿនការធ្វើសេចក្ដីព្រាងច្បាប់ ស្ដីពីការបង្ការ ការរីកសាយភាពអាវុធមហាប្រល័យ និងច្បាប់ប្រឆាំងនឹងការសម្អាតប្រាក់ ដោយលោកស ខេង បញ្ជាក់ថា ច្បាប់ទាំង២នេះ គឺមានសារៈសំខាន់សម្រាប់កម្ពុជា។ នេះបើតាមហ្វេសប៊ុកលោក ស ខេង។
ទំព័រហ្វេសប៊ុកដដែលបន្តថា ចំណែកលោក Murphy បានបង្ហាញការចាប់អារម្មណ៍ ចំពោះការធ្វើសេចក្ដីព្រាងច្បាប់របស់រដ្ឋាភិបាលកម្ពុជា ស្ដីពីការប្រឆាំងបទល្មើសបច្ចេកវិទ្យា ដែលលោក Murphy បញ្ជាក់ថា សហរដ្ឋអាមេរិក ចង់បញ្ជូនអ្នកជំនាញសហរដ្ឋអាមេរិកមកជួយកម្ពុជាថែមទៀត ក្នុងការធ្វើសេចក្ដីព្រាងច្បាប់នេះ។
លោកស្រី Emily Zeeberg អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជា បានប្រាប់ភ្នំពេញប៉ុស្ដិ៍ តាមអ៊ីមែល កាលពីម្សិលមិញថា បទល្មើសបច្ចេកវិទ្យា គឺជាការគំរាមកំហែង ដែលកំពុងកើនឡើងនៅទូទាំងពិភពលោក ហើយរដ្ឋាភិបាលសហរដ្ឋអាមេរិក បានចូលរួមជាទៀងទាត់ ជាមួយរដ្ឋាភិបាលជាច្រើន លើបញ្ហាសន្តិសុខ តាមអ៊ីនធឺណិតនេះ។
លោកស្រីបន្តថា អ្នកជំនាញមកពីក្រសួងយុត្តិធម៌សហរដ្ឋអាមេរិក បានចូលរួមសិក្ខាសាលាមួយ ជាមួយមន្រ្តីក្រសួងមហាផ្ទៃកម្ពុជា កាលពីខែមករា ឆ្នាំ ២០២០ ដើម្បីពិភាក្សាលើសេចក្តីព្រាងច្បាប់ ស្តីពីឧក្រិដ្ឋកម្មតាមអ៊ីនធឺណិតនៅកម្ពុជានេះ។
លោកស្រីបន្ថែមថា អ្នកជំនាញក្រសួងយុត្តិធម៌សហរដ្ឋអាមេរិក បានចែករំលែកនូវមតិយោបល់ ក៏ដូចជាការអនុវត្តដ៏ល្អប្រសើរ តាមអ៊ិនធឺរណែត ដើម្បីធានាថា ច្បាប់នោះ ការពារសេរីភាពបញ្ចេញមតិ តាមអ៊ិនធឺណិត និងការច្នៃប្រឌិតក្នុងស្រុក ដែលនឹងធ្វើឱ្យសេដ្ឋកិច្ចឌីជីថលរបស់កម្ពុជា ទាក់ទាញដល់ក្រុមវិនិយោគិន។
លោកស្រីថា៖« ស្ថានទូតសហរដ្ឋអាមេរិក បានផ្តល់ការជួយសម្រួលដល់ការចូលរួមនាពេលអនាគត ពីក្រុមហ៊ុនបច្ចេកវិទ្យា ឈានមុខគេរបស់សហរដ្ឋអាមេរិក ដើម្បីជួយរដ្ឋាភិបាលកម្ពុជាឱ្យយល់ថា ពួកគេ(ក្រុមហ៊ុនអាមេរិក)អាចចូលរួមចំណែកដល់កិច្ចខិតខំប្រឹងប្រែងការពារសន្តិសុខ តាមប្រព័ន្ធអ៊ីនធឺណិតរបស់ប្រទេសកម្ពុជា ក៏ដូចជាដើម្បីប្រាប់ពួកគេថា តើច្បាប់នេះអាចជះឥទ្ធិពលយ៉ាងដូចម្តេច ទៅលើការសម្រេចចិត្តវិនិយោគ»។
ជាមួយគ្នានេះ លោក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យា បានថ្លែងពីថ្ងៃពុធថា សេចក្ដីព្រាងច្បាប់កំពុងធ្វើឡើងយ៉ាងរលូនថ្វីបើកំពុងមានការផ្ទុះឡើង នៃជំងឹកូវីដ ១៩ ក្ដី។ លោកបញ្ជាក់ថា ការធ្វើសេចក្ដីព្រាងច្បាប់នេះ គឺសម្រេចបានប្រហែល ៧០ ភាគរយហើយ ដែលគ្រោងនឹងបញ្ចប់ត្រឹមឆ្នាំ ២០២០ នេះ។
លោកបញ្ជាក់ថា សហរដ្ឋអាមេរិក គឺតែងជួយជាបន្តបន្ទាប់ នៅក្នុងការធ្វើសេចក្ដីព្រាងច្បាប់ ហើយអ្វីដែលលោក Patrick Murphy បានលើកឡើង នៅពេលជួបលោក ស ខេង គឺសហរដ្ឋអាមេរិក ចង់បញ្ជូនអ្នកជំនាញមកពីក្រុមហ៊ុនបច្ចេកវិទ្យាធំៗរបស់ខ្លួន ដើម្បីជួយដល់ការធ្វើសេចក្ដីព្រាងច្បាប់នេះបន្ថែមទៀត ប៉ុន្តែមិនទាន់ដឹងច្បាស់អំពីឈ្មោះក្រុមហ៊ុនទាំងនោះនៅឡើយទេ។
លោកថា៖ «គេមកជួយយើងតាំងពីយូរ ហើយគេគ្រាន់តែចង់បន្ថែមអ្នកជំនាញបន្ថែមទៀត។ គេបានជួយយើងជាបន្តបន្ទាប់។ កន្លងមកគេជួយហ្នឹង ដូចជាពាក្យនេះ គេនិយាយអ៊ីចេះ ហើយគេពន្យល់យើងអំពីនិយមន័យ អ៊ីចឹងយកពាក្យខ្មែរណាដាក់មកឱ្យត្រូវតាមនិយមន័យដែលគេឱ្យមក»៕
