The Phnom Penh Post Search

Search form




Logo of Phnom Penh Post newspaper Phnom Penh Post - ឯក​អគ្គ​រដ្ឋទូត​អាមេរិក​បារម្ភ​ពី​ទង្វើ​មិន​ល្អ​លើ​ជន​ម៉ុងតាញ៉ា​ស្វែង​រក​សិទ្ធិ​ជ្រក​កោន

ឯក​អគ្គ​រដ្ឋទូត​អាមេរិក​បារម្ភ​ពី​ទង្វើ​មិន​ល្អ​លើ​ជន​ម៉ុងតាញ៉ា​ស្វែង​រក​សិទ្ធិ​ជ្រក​កោន

ជន​ម៉ុងតាញ៉ា​ដែល UNHCR និង​អាជ្ញាធរ​នាំ​មក​ភ្នំពេញ។
ជន​ម៉ុងតាញ៉ា​ដែល UNHCR និង​អាជ្ញាធរ​នាំ​មក​ភ្នំពេញ។ រូប អាដហុក

ឯក​អគ្គ​រដ្ឋទូត​អាមេរិក​បារម្ភ​ពី​ទង្វើ​មិន​ល្អ​លើ​ជន​ម៉ុងតាញ៉ា​ស្វែង​រក​សិទ្ធិ​ជ្រក​កោន

ភ្នំពេញៈ ឯក​អគ្គ​រដ្ឋ​ទូត សហរដ្ឋ​អាមេរិក ប្រចាំ​កម្ពុជា លោក William Todd បាន​ថ្លែង​លើក​ឡើង អំពី​ការ​មក​ដល់​ជា​បន្ត​បន្ទាប់​នៃ​ជនជាតិ​ម៉ុង​តា​ញ៉ា ពី​ប្រទេស​វៀតណាម ដែល​ស្វែង​រក​ការ​សុំ​សិទ្ធិ​ជ្រក​កោន​ថា សហគមន៍​អន្តរជាតិ​មាន​ក្តី​បារម្ភ​អំពី​ការ​ទទួល​រង​ការ​ប្រព្រឹត្ត​មិន​ល្អ​ទៅ​លើ​ពួក​គេ ហើយ​លោក​បាន​ជំរុញ​ឲ្យ​រាជ​រដ្ឋាភិបាល​កម្ពុជា ផ្តល់​នូវ​លទ្ធភាព​ដែល​មិន​មាន​ការ​រារាំង​ចំពោះ​នីតិវិធី​សុំ​សិទ្ធិ​ជ្រក​កោន ដែល​ទទួល​ស្គាល់​ជា​អន្តរជាតិ» ទៅ​ដល់​ជនជាតិ​ភាគ​តិច​កាន់​សាសនា​គ្រិស្ត​ម៉ុង​តា​ញ៉ា ដែល​កំពុង​រត់​គេច​ចេញ​ពី​ប្រទេស​វៀតណាម មក​កម្ពុជា​នេះ។

នៅ​ក្នុង​ការ​រាប់​ចុង​ក្រោយ យ៉ាង​ហោច​ណាស់​មាន​ជន​ជាតិ​ម៉ុង​តា​ញ៉ា​សុំ​សិទ្ធិ​ជ្រក​កោន​ចំនួន ៣២ នាក់ ត្រូវ​បាន​គេ​ជឿ​ថា កំពុង​លាក់​ខ្លួន នៅ​ក្នុង​ព្រៃ​នៃ ខេត្ត​រតនគិរី ខណៈ​អាជ្ញាធរ​ខេត្ត កំពុង​បន្ត​ស្រាវជ្រាវ​ស្វែង​រក​ពួក​គេ។

ចាប់​តាំង​ពី ខែ​ធ្នូ ឆ្នាំ​២០១៤ មាន​ជនជាតិ​ម៉ុង​តា​ញ៉ា ២០ នាក់​បាន​មក​ដល់​រាជធានី​ភ្នំពេញ ដើម្បី​ស្នើ​សុំ​សិទ្ធិ​ជ្រកកោន ប៉ុន្តែ ក្រសួង​មហាផ្ទៃ​បាន​ថ្លែង​ថា បើ​សូម្បី​ពួកគេ​ត្រូវ​បាន​រក​ឃើញ​ថា ពិត​ជា​ជនជាតិ​ម៉ុង​តា​ញ៉ា ប្រាកដ​ក៏​ដោយ ក៏​ពួកគេ​នឹង​ត្រូវ​បញ្ជូន​ត្រឡប់​ទៅ​ប្រទេស​វៀតណាម វិញ​ដែរ ប្រសិន​បើ​ពួក​គេ​មិន​អាច​ស្វែង​រក​ប្រទេស​ទី​បី សម្រាប់​ការ​តាំង​ទីលំនៅ​ថ្មី​របស់​ពួកគេ​ទេ​នោះ។

ដោយ​ប្រើ​ប្រាស់​អត្ថបទ​ប្រចាំ​សប្តាហ៍​របស់​ខ្លួន​ដែល​ចេញ​ផ្សាយ​កាល​ថ្ងៃ​អាទិត្យ​ដោយ​កាសែត​រស្មី​កម្ពុជា និង​វេបសាយ CEN លោក William Todd បាន​ថ្លែង​ថា ស្ថានភាព​នេះ គឺជា «ឱកាស​មួយ» សម្រាប់​រដ្ឋាភិបាល​ធ្វើការ​បង្ហាញ​ការ​ប្តេជ្ញា​ចិត្ត​របស់​ខ្លួន ចំពោះ​សិទ្ធិ​មនុស្ស​និង​សេរីភាព​សាសនា។

លោក​បាន​លើក​ឡើង អំពី​កាតព្វកិច្ច​របស់​កម្ពុជា ក្នុង​ការ​ចុះ​ឈ្មោះ​អ្នក​សុំ​សិទ្ធិ​ជ្រក​កោន និង​ការ​ផ្តល់​ការ​កំណត់​ស្ថានភាព​ត្រឹម​ត្រូវ នៃ​ជន​សុំ​សិទ្ធិ​ជ្រក​កោន​ក្រោម​អនុសញ្ញា​ជន​ភៀស​ខ្លួន របស់​អង្គការ​សហ​ប្រជាជាតិ។

លោក​បាន​សរសេរ​ថា៖ «កម្ពុជា​អាច​ធ្វើ​រឿង​នេះ​តាម​រយៈ​ការ​ធានា​នូវ​ការ​អនុវត្ត​ជាប់​លាប់ រាល់​នីតិរដ្ឋ​និង​ធ្វើ​ការ​ជាមួយ​អង្គការ​សហ​ប្រជាជាតិ​និង​សង្គម​ស៊ីវិល​ដើម្បី​បំពេញ​បាន​នូវ​អ្វី​ជា​តម្រូវការ។ ជន​សុំ​សិទ្ធិ​ជ្រក​កោន​មិន​គួរ​ត្រូវ​បាន​បដិសេធ​ដោយ​អាជ្ញាធរ​ណា​មួយ មុន​ពេល​ដំណើរការ​នេះ​ត្រូវ​បាន​ធ្វើ​ឡើង​ឡើយ»។

ក្រសួង​ការ​បរទេស​និង​អ្នក​នាំ​ពាក្យ​រាជ​រដ្ឋាភិបាល​កម្ពុជា មិន​អាច​ទាក់ទង​សុំ​ការ​អត្ថាធិប្បាយ​បាន​ទេ៕

អត្ថបទគួរចាប់អារម្មណ៍