ភ្នំពេញៈ ឯកអគ្គរដ្ឋទូតសហរដ្ឋអាមេរិកសរសើរកិច្ចខិតខំប្រឹងប្រែងរបស់ក្រសួងការងារ និងបណ្ដុះបណ្ដាលវិជ្ជាជីវៈដែលអនុវត្តបានល្អក្នុងការចូលរួមធានានូវនិរន្តរភាពនៃដំណើរការអាជីវកម្ម ផលិតកម្ម និងពាណិជ្ជកម្មតាមរយៈការដាក់ចេញនូវវិធានការ សេចក្តីណែនាំ និងតាមដានត្រួតពិនិត្យមើលការអនុវត្តរបស់រោងចក្រសហគ្រាស គ្រឹះស្ថាន ព្រមទាំងការចូលរួមដោះស្រាយបញ្ហាពាក់ព័ន្ធនឹងការព្យួរ ឬបិទរោងចក្រ។
រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង បានជួបពិភាក្សាជាមួយឯកអគ្គរដ្ឋទូតសហរដ្ឋអាមេរិកលោក Patrick Murphy ស្ដីពីកិច្ចសហប្រតិបត្តិការលើការអនុវត្តគោលនយោបាយផ្សារភ្ជាប់ពាណិជ្ជកម្មទៅនឹងបទដ្ឋានការងារអន្តរជាតិ។ ជំនួបនេះធ្វើឡើងកាលពីថ្ងៃទី ២៣ ខែកុម្ភៈ នៅក្រសួងការងារ។
លោក អ៊ិត សំហេង បង្ហោះសារលើហ្វេសប៊ុករបស់លោកថា លោក Murphy បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រសួងការងារ និងបណ្តុះបណ្តាលវិជ្ជាជីវៈដែលបានដាក់ចេញនូវវិធានការ សេចក្តីណែនាំ និងតាមដានត្រួតពិនិត្យមើលការអនុវត្តរបស់រោងចក្រ សហគ្រាស គ្រឹះស្ថាន។ លោកក៏កោតសរសើរដល់ការទូទាត់អត្ថប្រយោជន៍ និងប្រាក់ឧបត្ថម្ភជូនកម្មករនិយោជិត ពេលរោងចក្រព្យួរការងារ និងដោះស្រាយទូទាត់ប្រាក់អតីតភាពការងារ និងអត្ថប្រយោជន៍ពេលរោងចក្របិទទ្វារ ឬរោងចក្រក្ស័យធន ឬម្ចាស់រត់ចោល។
លោក អ៊ិត សំហេង បានថ្លែងអំណរគុណដល់សហរដ្ឋអាមេរិកដែលទទួលស្គាល់នូវវឌ្ឍនភាពនៃការអនុវត្តសិទិ្ធសេរីភាព អង្គការវិជ្ជាជីវៈ ការធានាបាននូវលក្ខខណ្ឌការងារ ស្របតាមបទដ្ឋានការងារអន្តរជាតិ។ លោកថា នេះជាកត្តាស្នូលសម្រាប់ភាគីសហរដ្ឋអាមេរិក បន្តផ្តល់ភាពអនុគ្រោះពាណិជ្ជកម្មដល់កម្ពុជារហូតមកទល់បច្ចុប្បន្ន។
លោកបន្តថា បច្ចុប្បន្នក្រសួងការងារ និងបណ្តុះបណ្តាលវិជ្ជាជីវៈ និងក្រសួងពាណិជ្ជកម្មកំពុងជំរុញការពង្រីកវិសាលភាពគម្រោងរោងចក្រកាន់តែប្រសើរឡើងនៅកម្ពុជាទៅលើរោងចក្រផលិតផលិតផលធ្វើដំណើរ និងកាបូប (TGB) បន្ទាប់ពីមើលឃើញថា គម្រោងនេះបានធ្វើការវាយតម្លៃប្រកបដោយតម្លាភាពនូវលក្ខខណ្ឌការងារ នៅក្នុងវិស័យកាត់ដេរ សម្លៀកបំពាក់ និងផលិតស្បែកជើង។
លោក ងុយ រិទ្ធ អនុរដ្ឋលេខាធិការ ក្រសួងការងារបានថ្លែងនៅក្រោយជំនួបនោះថា ដោយសារកិច្ចសហប្រតិបត្តិការល្អរវាងប្រទេសទាំង ២ ធ្វើឱ្យកំណើននៃការនាំចេញផលិតផលសម្លៀកបំពាក់ ស្បែកជើង សម្ភារធ្វើដំណើរ និងកាបូបបានកើនឡើង ២៣ ភាគរយ នៅឆ្នាំ ២០២០ ដែលមានទំហំពាណិជ្ជកម្មនាំចេញជាង ៦ ពាន់លានដុល្លារ។
លោកថ្លែងថា៖ «តួលេខទាំងអស់នេះបង្ហាញឱ្យឃើញពីអ្វីដែលជាការខិតខំអនុវត្តបានល្អត្រឹមត្រូវរបស់រាជរដ្ឋាភិបាលកម្ពុជា ដែលយើងមានគោលនយោបាយយ៉ាងច្បាស់លាស់ តាំងពីយើងចុះកិច្ចព្រមព្រៀងជាមួយសហរដ្ឋអាមេរិកក្នុងការផ្សារភ្ជាប់លក្ខខណ្ឌការងារទៅនឹងពាណិជ្ជកម្មអន្តរជាតិ ដែលធ្វើឱ្យវិស័យឧស្សាហកម្មខាងកាត់ដេរសម្លៀកបំពាក់ និងស្បែកជើងរបស់យើងបន្តដណ្ដើមបានទីផ្សារដ៏ធំនៅសហរដ្ឋអាមេរិក»។
បើតាមលោក ងុយ រិទ្ធ ថ្មីៗនេះ កម្ពុជាទទួលបានប្រព័ន្ធអនុគ្រោះពន្ធខាងផ្នែកសម្ភារធ្វើដំណើរ និងកាបូប ដែលធ្វើឱ្យកម្ពុជាអាចបង្កើនរោងចក្រផលិតសម្ភារធ្វើដំណើរ និងកាបូបដល់ទៅ ១២៥ រោងចក្រ ហើយពង្រីកទំហំនាំចេញ និងបង្កើតការងារបានយ៉ាងច្រើន។
លោកថ្លែងដូច្នេះថា៖ «ដោយសារតែយើងបានអនុវត្តបានល្អនេះ គឺសហរដ្ឋអាមេរិកបន្តគាំទ្រដល់ប្រទេសកម្ពុជាផ្ដល់ភាពអនុគ្រោះ ដើម្បីឱ្យយើងអាចនាំផលិតផលរបស់យើង ទៅកាន់ទីផ្សារសហរដ្ឋអាមេរិកបាន ហើយយើងមានកិច្ចការជាច្រើនទៀត ដែលយើងត្រូវបន្តជាមួយគ្នា ដោយសារតែយើងបានធ្វើការក្នុងភាពជាដៃគូដ៏ល្អជាមួយសហរដ្ឋអាមេរិក ហើយសហរដ្ឋអាមេរិកបានពេញចិត្ត និងការខិតខំរបស់យើង»។
អ្វីដែលភាគីទាំង ២ កំពុងបន្តធ្វើការជាមួយគ្នាតទៅទៀតនៅក្នុងវិស័យការងារ ដូចជាធ្វើឱ្យប្រសើរឡើងដូចជាបញ្ហាជួញដូរកម្លាំងពលកម្ម ការលុបបំបាត់ពលកម្មកុមារ និងការផ្ដល់កិច្ចគាំពារដល់ពលករទេសន្តរប្រវេសន៍ជាដើម។
លើសពីនេះទៀតភាគីទាំង ២ នឹងធ្វើការរួមគ្នាក្នុងការពង្រឹងសមត្ថភាពមន្ត្រីអធិការកិច្ចការងារពីសហរដ្ឋអាមេរិក។ នេះបើតាមលោក ងុយ រិទ្ធ។
ឯកអគ្គរដ្ឋទូតសហរដ្ឋអាមេរិកលោក Murphy បានថ្លែងនៅលើបណ្ដាញធ្វីធើររបស់លោកថា៖ «ជំនួបប្រកបដោយផ្លែផ្កាជាមួយរដ្ឋមន្ត្រីការងារ លោក អ៊ិត សំហេង យើងបានពិភាក្សាអំពីសារៈសំខាន់នៃការអនុវត្តច្បាប់ដែលដោះស្រាយលើការកេងប្រវ័ញ្ចពលកម្ម និងជួញដូរកម្លាំងពលកម្ម និងធ្វើការជាមួយគ្នា ដើម្បីធ្វើឱ្យប្រសើរឡើងសេរីភាពសមាគម និងតម្លៃស្នូលនៃការងារនៅកម្ពុជា»៕