.jpg)
លោក W. Patrick Murphy ដែលនឹងមកធ្វើជារដ្ឋទូតនៅកម្ពុជា។ សហការី
ភ្នំពេញៈ ឯកអគ្គរដ្ឋទូតសហរដ្ឋអាមេរិក ប្រចាំកម្ពុជា កំពុងរង់ចាំការតែងតាំងរូបលោកជាផ្លូវការដោយព្រឹទ្ធសភាសហរដ្ឋអាមេរិក មុនពេលលោកមកដល់ប្រទេសកម្ពុជា ដែលរំពឹងថា នៅដើមខែក្រោយ។
លោក W. Patrick Murphy ជាឧបការីរងដ៏សំខាន់ នៅការិយាល័យកិច្ចការអាស៊ីបូព៌ា និងប៉ាស៊ីហ្វិក ធ្លាប់ត្រូវតែងតាំងកាលពីខែសីហាកន្លងមកម្ដងហើយ ដោយប្រធានាធិបតីលោក ដូណាល់ ត្រាំ ដើម្បីជំនួសកន្លែងឯកអគ្គរដ្ឋទូត William Heidt ដែលផុតអាណត្តិ។ ប៉ុន្តែសំណើរបស់លោក ដូណាល់ ត្រាំ ត្រូវបានបញ្ជូនត្រឡប់ទៅវិញដោយព្រឹទ្ធសភាអាមេរិកនាថ្ងៃទី ៣ ខែ មករា អំឡុងពេលរដ្ឋាភិបាលអាមេរិកបានបិទទ្វារ។
អ្នកនាំពាក្យស្ថានទូតអាមេរិក លោក Arend Zwartjes បានថ្លែងកាលពីថ្ងៃចន្ទថា តាមនីតិវិធី លោក ត្រាំ បានតែងតាំងលោក Patrick Murphy ម្តងទៀត ដើម្បីធ្វើជាឯកអគ្គរដ្ឋទូតប្រចាំកម្ពុជានាថ្ងៃទី ១៦ ខែ មករា នៅក្នុងពេលបើកអង្គប្រជុំសមាជថ្មីលើកទី១១៦ របស់សហរដ្ឋអាមេរិក។
យោងតាមប្រតិទិនប្រតិបត្តិរបស់ព្រឹទ្ធសភាអាមេរិកឲ្យដឹងថា ការតែងតាំងលោក Patrick Murphy ត្រូវបាន ដាក់ក្នុងប្រតិទិនប្រតិបត្តិព្រឹទ្ធសភាលេខ ១៨១ ចុះថ្ងៃទី ៣ ខែ មេសា។ ប្រតិទិនបញ្ជាក់ថា លោក Murphy នៃរដ្ឋ Vermont នឹងត្រូវ «ធ្វើជាឯកអគ្គរដ្ឋទូតវិសាមញ្ញនិងពេញសមត្ថភាពនៃសហរដ្ឋអាមេរិកប្រចាំកម្ពុជា»។
យោងតាមក្រសួងការបរទេសអាមេរិក លោក Murphy ពីមុនធ្លាប់បម្រើកិច្ចការជាអនុប្រធានបេសកកម្ម និងភារធារីនៅប្រទេសថៃ (២០១៣-២០១៦) និងប្រទេសឡេសូតូ (២០០៦-២០០៨)។ លោកធ្លាប់ធ្វើជាអ្នកតំណាងពិសេសសម្រាប់ប្រទេស ភូមា ជានាយកនិងនាយករងនៃការិយាល័យប្រចាំតំបន់អាស៊ីអាគ្នេយ៍ដីគោក ទីប្រឹក្សានយោបាយសម្រាប់ក្រុមការងារប្រទេស ហៃទី និងមន្រ្តីព័ត៌មានសម្រាប់ភូមា និងឡាវ។
អ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន ថ្លែងថា ជាគោលការណ៍អន្តរជាតិ តួនាទីរបស់ឯកអគ្គរដ្ឋទូត គឺត្រូវពង្រឹងទំនាក់ទំនងនិងកិច្ចសហប្រតិបត្តិការជាមួយប្រទេសជាម្ចាស់ ប្រកបដោយវិជ្ជាជីវៈ។
លោក ស៊ីផាន ថ្លែងថា៖ «ប្រសិនបើឯកអគ្គរដ្ឋទូតរូបហ្នឹង ប្រចាំទីនេះ នៅលើករបៀបវារៈនយោបាយ ដើម្បីបង្កបញ្ហា នោះជាអ្វីដែលយើងមិនរំពឹងទុកនឹងឃើញទេ។ អ្វីដែលយើងមិនចង់ គឺការជ្រៀតជ្រែកណាមួយ នៅក្នុងកិច្ចការរបស់កម្ពុជាដែលជាប្រទេសឯករាជ្យ»។
លោក មាជ សុវណ្ណារ៉ា ជាសមាជិក ១ រូប នៃអតីតគណបក្សសង្គ្រោះជាតិ ដែលទទួលបានសញ្ជាតិអាមេរិកផងដែរនោះបានថ្លែងថា តាមលោកដឹងព្រឹទ្ធសភាអាមេរិក ត្រូវការសំឡេងចំនួន ៥០ បូក ១ ដើម្បីអនុម័តការតែងតាំងលោក Murphy។
លោក សុវណ្ណារ៉ា ថ្លែងថា លោក Murphy នឹងក្លាយជាឯកអគ្គរដ្ឋទូតបន្ទាប់របស់សហរដ្ឋអាមេរិកប្រចាំកម្ពុជា ព្រោះ សមាជិកព្រឹទ្ធសភា នៃគណបក្សសាធារណរដ្ឋរបស់លោក ត្រាំ មានសំឡេងភាគច្រើននៅព្រឹទ្ធសភា។ លោកសុវណ្ណារ៉ាបន្ថែមថា ការប្រកាសតែងតាំងឯកអគ្គរដ្ឋទូតថ្មី ជាទូទៅ នឹងប្រព្រឹត្តទៅនៅចំថ្ងៃទិវាឯករាជ្យសហរដ្ឋអាមេរិកនាថ្ងៃទី ៤ ខែ កក្កដា។
លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិថ្លែងថា ជាដំណើរការ ប្រទេស កម្ពុជា គួរតែបានទទួលព័ត៌មានពីរបីខែ មុនពេលដំណើរការអនុម័តចាប់ផ្តើមនៅក្នុងរដ្ឋដែល បញ្ជូនឯកអគ្គរដ្ឋទូតមក។ ក៏ប៉ុន្តែលោក សុផាន់ ថ្លែងថា គិតមកត្រឹមពេលនេះក្រសួងការបរទេស មិនបានទទួលព័ត៌មានអំពីការតែងតាំងឯកអគ្គរដ្ឋសហរដ្ឋអាមេរិកថ្មីនេះទេ។
លោក សូ ចន្ថា សាស្រ្តាចារ្យផ្នែកវិទ្យាសាស្រ្តនយោបាយ យល់ឃើញថា លោក Patrick Murphy បានប្តេជ្ញាចិត្តក្នុងការលើកតម្កើងសិទ្ធិមនុស្ស និងប្រជាធិបតេយ្យ ចំពោះមុខព្រឹទ្ធសភាអាមេរិក។ ដូច្នេះ ជំហររឹងមាំរបស់សហរដ្ឋអាមេរិកចំពោះកម្ពុជា ស្តីពីប្រជាធិបតេយ្យ និងសិទ្ធិមនុស្ស គឺជាអាទិភាពរបស់លោក Murphy។
កាលពីខែកុម្ភៈកន្លងទៅ ស្ថានទូតសហរដ្ឋអាមេរិក និងចិនប្រចាំកម្ពុជា បានជះទឹកដាក់គ្នា ជុំវិញរឿងរដ្ឋប្រហារឆ្នាំ ១៩៧០ ដឹកនាំដោយលោកសេនាប្រមុខ លន់ នល់ ដើម្បីផ្តួលរំលំរដ្ឋាភិបាលរបស់សម្តេចឪ នរោត្តម សីហនុ។ ស្ថានទូតអាមេរិកបានឲ្យដឹងថា ខ្លួនពុំបានពាក់ព័ន្ធនឹងរដ្ឋប្រហារនោះទេ ផ្ទុយទៅវិញស្ថានទូតចិនថា ទីភ្នាក់ងារស៊ើបការណ៍កណ្តាល (CIA) អាមេរិក បានពាក់ព័ន្ធនៅក្នុងរឿងនេះ។
លោក ចន្ថា បន្តថា៖ «សហរដ្ឋអាមេរិក អាចនឹងគិតថា នរណាជាឯកអគ្គរដ្ឋទូតដ៏ស័ក្តិសមប្រចាំកម្ពុជា ចាប់តាំងពីទំនាក់ទំនងរវាងប្រទេសទាំង ២ នេះបានតានតឹងហើយប្រទេស កម្ពុជា ក៏ជាចំណុចក្តៅ សម្រាប់ការប្រកួតប្រជែងភូមិសាស្រ្តនយោបាយ រវាងសហរដ្ឋអាមេរិក និងចិនផងដែរ។ ដូច្នេះ អ្នកកាទូតឯកទេសខ្លាំងជាតម្រូវការចាំបាច់»។
អ្នកវិភាគនយោបាយ លោក ឡៅ ម៉ុងហៃ មានយោបល់ថា ចាប់តាំងពីការបង្កើតទំនាក់ទំនងកាទូត រវាងកម្ពុជា និងសហរដ្ឋអាមេរិក មិនមានករណីដែលឯកអគ្គរដ្ឋទូតសហរដ្ឋអាមេរិក មានពេលលំបាកក្នុងប្រទេស កម្ពុជា ទេ លើកលែងតែពីរបីឆ្នាំមុនពេលកាត់ផ្តាច់ទំនាក់ទំនងទាំងនោះនាឆ្នាំ ១៩៦៥ ហើយអំឡុងពេល សង្រ្គាមវៀតណាម ទៅក្នុងកម្ពុជានាឆ្នាំ ១៩៧០ ដែលនាំឲ្យមានការផ្តួលរំលំរបប លន់ នល់ គាំទ្រដោយសហរដ្ឋអាមេរិកដោយ ប៉ុល ពត នៅឆ្នាំ ១៩៧៥។
លោក ម៉ុងហៃ បន្ថែមថា ទាក់ទងនឹងមហាអំណាចទាំង ២ ដែលប្រើប្រាស់កម្ពុជាជាសមរភូមិសម្រាប់សង្រ្គាមពាក្យសម្តីរបស់ពួកគេ រដ្ឋាភិបាលនៃប្រទេសកម្ពុជាដែលមានអធិបតេយ្យ និងឯករាជ្យពិតប្រាកដ អាចឬគួរតែកោះហៅឯកអគ្គរាជទូត និងភារធារីទាំង ២ ប្រទេសនេះប្រចាំភ្នំពេញដើម្បីជំរុញពួកគេឲ្យបញ្ចប់ សង្រ្គាមពាក្យសម្តីនេះ៕
