.jpg)
លោក មិកាមិ ម៉ាសាហ៊ីរ៉ូ (Mikami Masahiro) ឯកអគ្គរាជទូតជប៉ុនថ្មី ប្រចាំកម្ពុជា។ រូបថត សហការី
ភ្នំពេញៈ ឯកអគ្គរាជទូតជប៉ុនថ្មីប្រចាំប្រទេសកម្ពុជាលោក មិកាមិ ម៉ាសាហ៊ីរ៉ូ (Mikami Masahiro) បានមកដល់ប្រទេសកម្ពុជាហើយកាលពីថ្ងៃអាទិត្យ ដោយបានសម្តែងភាពរីករាយយ៉ាងក្រៃលែង និងបានចាត់ទុកកម្ពុជាជាប្រទេសដែលមានវប្បធម៌ដ៏អស្ចារ្យ។
លោក មិកាមិ ម៉ាសាហ៊ីរ៉ូ ត្រូវមកកាន់តំណែងជាឯកអគ្គរាជទូតជប៉ុនជំនួស លោក ហ៊ីដេហ៊ីសា ហូរីណូអ៊ុជិ (Hidehisa Horinouchi) ដែលផុតអាណត្តិ។
តាមរយៈហ្វេសប៊ុកស្ថានទូតជប៉ុនប្រចាំកម្ពុជាកាលពីថ្ងៃចន្ទលោក មិកាមិ ម៉ាសាហ៊ីរ៉ូ បានថ្លែងថា លោកមានកិត្តិយស និងសប្បាយរីករាយយ៉ាងក្រៃលែងដែលបានមកធ្វើជាឯកអគ្គរាជទូតប្រចាំនៅប្រទេសកម្ពុជាដែលជាមិត្តជិតស្និទ្ធរបស់ប្រទេសជប៉ុន និងជាប្រទេសដែលមានវប្បធម៌ដ៏អស្ចារ្យ។ លោកបន្តថា៖ «ខ្ញុំទន្ទឹងរង់ចាំជួបជាមួយលោក លោកស្រី ក្មួយៗ និងទស្សនាទីកន្លែងនានានៅប្រទេសកម្ពុជា»។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានប្រាប់ភ្នំពេញប៉ុស្តិ៍កាលពីថ្ងៃអង្គារថា រដ្ឋាភិបាលស្វាគមន៍ការមកដល់របស់ឯកអគ្គរាជទូតជប៉ុនថ្មីរូបនេះ ហើយវាជាប្រពៃណី និងជាប្រវត្តិសាស្ត្រដែលលោកថា កម្ពុជា និងជប៉ុនមានទំនាក់ទំនងល្អនឹងគ្នា។ លោកបន្ថែមថា៖ «ពី ១ អាណត្តិទៅ ១ អាណត្តិរបស់ទូតនីមួយៗតែងតែបន្ថែមនូវគុណភាព បន្ថែមនូវអត្ថន័យនៃការពង្រឹងនូវទំនាក់ទំនងល្អកម្ពុជា-ជប៉ុន ក៏ដូចជារាល់កិច្ចសហប្រតិបត្តិការរវាងប្រជាជាតិទាំង ២ នេះ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាបានថ្លែងកាលពីថ្ងៃម្សិលមិញថា ទំនាក់ទំនងកម្ពុជា-ជប៉ុននៅតែល្អប្រសើរ និងយល់ចិត្តគ្នា ហើយនយោបាយការបរទេសជប៉ុនក៏មិនផ្លាស់ប្តូរដែរ ទោះបីមានការផ្លាស់ប្តូរឯកអគ្គរាជទូតក៏ដោយ ពីព្រោះវាជានយោបាយការបរទេសរបស់ជប៉ុនផង និងជាឥរិយាបថការទូតរបស់ប្រទេសជប៉ុនផងដែរចំពោះបណ្តាប្រទេសផ្សេងៗ។
លោក គិន ភា បានបន្ថែមថា៖ «យើងឃើញសារដែលគាត់មកដល់ភ្លាមហ្នឹង គឺគាត់បានផ្ញើសារជូនជនរួមជាតិប្រទេសកម្ពុជានៅក្នុងបណ្តាញហ្វេសប៊ុកផ្លូវការរបស់ស្ថានទូត (ជប៉ុន)។ គឺជាសារដែលប្រកបដោយការលើកទឹកចិត្ត។ គឺមានន័យជាសារដែលមានកម្លាំងជំរុញសម្រាប់ទំនាក់ទំនងរវាងប្រទេសយើងទាំង ២ កម្ពុជា-ជប៉ុន»។
លោក គិន ភា បានថ្លែងទៀតថា ប្រវត្តិនៃទំនាក់ទំនងកម្ពុជា-ជប៉ុនគឺឃើញមានភាពផ្អែមល្ហែម និងមានទិដ្ឋភាពវិជ្ជមានច្រើន។ ទិដ្ឋភាពអវិជ្ជមានដូចជាមិនសូវឃើញមាននៅក្នុងទំនាក់ទំនងប្រទេសទាំង ២ នោះទេ។
ចំណែកលោក ឯម សុវណ្ណារ៉ា អ្នកជំនាញខាងវិទ្យាសាស្ត្រនយោបាយក៏យល់ឃើញស្រដៀងគ្នានេះផងដែរថា ទំនាក់ទំនងកម្ពុជា-ជប៉ុន មានភាពល្អប្រសើរជាមួយគ្នាច្រើនមកហើយ បើទោះបីជាមានការតែងតាំងឯកអគ្គរាជទូតថ្មីក៏ដោយ ក៏មិនប៉ះពាល់អ្វីទៅលើនយោបាយទំនាក់ទំនងកម្ពុជា-ជប៉ុននោះដែរ។
លោកបានថ្លែងថា៖ «ឯកអគ្គរាជទូត គាត់មិនមែនជាអ្នកសម្រេចចិត្តទៅលើគោលនយោបាយការបរទេសរបស់ខ្លួនទេ។ គឺនៅលើរដ្ឋាភិបាល នាយករដ្ឋមន្ត្រីជប៉ុន និងទៅលើរដ្ឋមន្ត្រីការបរទេសទេ។ អ៊ីចឹងកិច្ចការនេះ ខ្ញុំគិតថានយោបាយការបរទេសកម្ពុជា-ជប៉ុន នៅតែរក្សាបានល្អកាន់តែល្អឡើងទេ។ មិនមានបញ្ហាអ្វីទេ»៕
