The Phnom Penh Post Search

Search form




Logo of Phnom Penh Post newspaper Phnom Penh Post - ១០ ខែ​ឆ្នាំ​នេះ​ការ​ផ្ដល់​អត្តសញ្ញាណប័ណ្ណ​មាន​ជិត ៣ លាន​សន្លឹក

១០ ខែ​ឆ្នាំ​នេះ​ការ​ផ្ដល់​អត្តសញ្ញាណប័ណ្ណ​មាន​ជិត ៣ លាន​សន្លឹក

អត្តសញ្ញាណប័ណ្ណ​សញ្ជាតិ​ខ្មែរ​គំរូ​ថ្មី​ដែល​ពលរដ្ឋ​ខ្មែរ​ជាច្រើន​នៅ​មិន​ទាន់​ទទួល​បាន។
អត្តសញ្ញាណប័ណ្ណ​សញ្ជាតិ​ខ្មែរ​គំរូ​ថ្មី​ដែល​ពលរដ្ឋ​ខ្មែរ​ជាច្រើន​នៅ​មិន​ទាន់​ទទួល​បាន។ ហុង មិនា

១០ ខែ​ឆ្នាំ​នេះ​ការ​ផ្ដល់​អត្តសញ្ញាណប័ណ្ណ​មាន​ជិត ៣ លាន​សន្លឹក

ភ្នំពេញៈ រយៈពេល ១០ ខែ​ដើម​ឆ្នាំ ២០១៥ អគ្គនាយកដ្ឋាន​អត្តសញ្ញាណកម្ម​បាន​ផ្តល់​អត្តសញ្ញាណ​ប័ណ្ណ​សញ្ជាតិ​ខ្មែរ​គំរូ​ថ្មី​បែប​អេឡិចត្រូនិក​ជាង​ ២ ​លាន​ ៨ ​សែន​សន្លឹក​បន្ថែម​ទៀត​ដល់​ប្រជាពលរដ្ឋ និង​បាន​កំពុង​ដោះស្រាយ​បញ្ហា​ប្រឈម​ផ្សេងៗ​ដើម្បី​ឲ្យ​ទាន់​ផែនការ​ឆ្នាំ​ ២០១៧ ក្នុង​ការ​ផ្តល់​អត្តសញ្ញាណ​គំរូ​ថ្មី​ដល់​ពលរដ្ឋ​ទូទាំង​ប្រទេស។

ក្នុង​កិច្ចប្រជុំ «បូក​សរុប​លទ្ធផល​ការងារ​ផ្តល់​អត្តសញ្ញាណប័ណ្ណ​សញ្ជាតិ​ខ្មែរ​រយៈពេល ១០ ខែ ឆ្នាំ​ ២០១៥» នៅ​សាល​ប្រជុំ​អគ្គនាយកដ្ឋាន​អត្តសញ្ញាណកម្ម​កាលពី​ថ្ងៃ​ទី​ ១៧ ខែ​វិច្ឆិកា​ប្រធាន​នាយកដ្ឋាន​អត្តសញ្ញាណ​ប័ណ្ណ​សញ្ជាតិ​ខ្មែរ​លោក ឃៀង សុគន្ធា បាន​ឲ្យ​ដឹង​ថា​គិត​ត្រឹម​ខែ​​មករា​ដល់​ខែ​តុលា​ឆ្នាំ​នេះ​សមត្ថកិច្ច​បាន​ផ្តល់​អត្តសញ្ញាណប័ណ្ណ​គំរូ​ថ្មី​ដល់​ពលរដ្ឋ​ចំនួន ២ ៨២៤ ៥៣២ ​សន្លឹក។

លោក​ថា​ តាម​សន្ទស្សន៍​ប្រមូល​ទិន្នន័យ​ក្រោម​ការ​បន្ថែម​ថវិកា​ឧបត្ថម្ភ​ដល់​ប្រតិបត្តិ​នេះ​តួលេខ​នៃ​ពលរដ្ឋ​ដែល​ទទួល​បាន​អត្តសញ្ញាណ​ថ្មី​បាន​កើន​ឡើង​ដល់​ទៅ​ ៣៩៧ ៦៤០ នាក់​ក្នុង​ ១ ខែ​សម្រាប់​រយៈពេល​ ៣ ខែ​ចុង​ក្រោយ​នេះ​បើ​ធៀប​នឹង​ ៧ ខែ​មុន​គឺ​បាន ២៣៣ ៦៥៨ នាក់​ក្នុង​ ១ ខែ​តែ​ប៉ុណ្ណោះ។

បើ​តាម​លោក ឃៀង សុគន្ធា ការ​ផ្តល់​អត្តសញ្ញាណប័ណ្ណ​គំរូ​ថ្មី​ត្រូវ​បាន​ដំណើរការ​តាម​ផែនការ​ជា ៣ ជំហាន​ក្នុង​នោះ​ជំហាន​ទី ១ ការ​ផ្តល់​ចំនួន​ ២,២ ​លាន​សន្លឹក​ចាប់ផ្តើម​ពី​ខែ​មិថុនា​ឆ្នាំ​ ២០១២ ដល់​ខែ​មីនា ឆ្នាំ ២០១៤ ជំហាន​ទី ២ ចំនួន​ ៥ ​លាន​សន្លឹក​ពី​ខែ​មេសា ឆ្នាំ​២០១៤ ដល់​ខែ​ធ្នូ​ឆ្នាំ ២០១៦ តែ​ជា​លទ្ធផល​គិត​ត្រឹម​ខែ​កក្កដា​ឆ្នាំ​ ២០១៥ គឺ​បាន​ចំនួន ២ ៩៧០ ១៩៩ សន្លឹក​រីឯ​ជំហាន​ទី ៣ ចំនួន​ជាង ៥,៧ សែន​សន្លឹក​ដែល​ក្នុង​នោះ​មួយ​ចំនួន​នៅ​សេសសល់​ពី​ផែនការ​ជំហាន​ទី ២ ជា​លទ្ធផល​គិត​ពី​ខែ​សីហា​ដល់​ខែ​តុលា ឆ្នាំ​ ២០១៥ គឺ​បាន ១ ១៩២ ៩២២ ​សន្លឹក។

តាមរយៈ​សន្ទស្សន៍​នេះ​ការ​ផ្តល់​អត្តសញ្ញាណប័ណ្ណ​សញ្ជាតិ​ខ្មែរ​គំរូ​ថ្មី​ទាំង ​៣ ​ជំហាន​សរុប​មាន​ចំនួន​ ៦ ៣៦៣ ១២១ សន្លឹក​លើ​ចំនួន​ប៉ាន់ស្មាន​ពលរដ្ឋ​នៅ​ឆ្នាំ​ ២០១៧ ដែល​គ្រប់​អាយុ​ត្រូវ​ផ្តល់​អត្តសញ្ញាណប័ណ្ណ​សញ្ជាតិ​ខ្មែរ​ប្រមាណ​ ១០ ៩៤៤ ១០១ នាក់។

យ៉ាង​នេះ​ក្តី​អគ្គនាយករង​នៃ​អគ្គនាយកដ្ឋាន​អត្តសញ្ញាណកម្ម​ក្រសួង​មហាផ្ទៃ​លោក ចាន់ គីមសេង បាន​អះអាង​ថា​ការ​ផ្តល់ និង​ផ្លាស់ប្តូរ​អត្តសញ្ញាណប័ណ្ណ​សញ្ជាតិ​ខ្មែរ​គំរូ​ថ្មី​នេះ​ត្រូវ​បាន​រៀបចំ​តាម​ដំណាក់កាល​ហើយ​ការ​ចំណាយ​ក៏​ត្រូវ​​បាន​បែងចែក​ជាច្រើន​ផ្នែក​មាន​ទាំង​ឧបករណ៍​សម្ភារ​បច្ចេកទេស​ប្រើប្រាស់ និង​បុគ្គលិក​តែ​លោក​មិន​បាន​ដឹង​ពី​ចំណាយ​សរុប​នោះ​ទេ។

លោក​ថា​ទោះ​ជា​ការ​ផ្តល់​នេះ​កំពុង​ដំណើរការ​ល្អ​ក្តី​តែ​លោក​នៅ​តែ​បារម្ភ​ថា​ប្រតិបត្តិការ​នេះ​នឹង​​មិន​អាច​រួចរាល់​តាម​គម្រោង​ព្រោះ​មាន​បញ្ហា​ប្រឈម​មួយ​ចំនួន​ដែល​មន្ត្រី​ជំនាញ​បាន​កំពុង​ជួប​ប្រទះ​ហើយ​ស្វែងរក​វិធី​ដោះស្រាយ​។

លោក ចាន់ គីមសេង បាន​បញ្ជាក់​ថា៖ «បញ្ហា​ប្រឈម​គឺ​ការ​ចូលរួម​ពី​ប្រជាពលរដ្ឋ​ព្រោះ​គាត់​អត់​ទាន់​យល់​ច្បាស់​ពី​សារប្រយោជន៍​នៃ​​អត្តសញ្ញាណប័ណ្ណ​នោះ​ទេ, បញ្ហា​ចំណាក​ស្រុក, អ្នក​ផ្តល់​សេវា​ដែល​ជា​សមត្ថកិច្ច​ប្រឈម​បច្ចេកទេស​ប្រព័ន្ធ​អ៊ីនធឺណិត​មិន​អាច​គ្រប​ដណ្តប់​គ្រប់​តំបន់​បាន, ការ​ចុះ​ឈ្មោះ​ស្ទួន ក៏​ដូចជា​បញ្ហា​សម្បក​អត្តសញ្ញាណប័ណ្ណ​ថ្មី​គ្មាន​គុណភាព​ដែល​អាច​របក​ចេញ​ជាដើម»។

ទោះបី​ជា​យ៉ាង​ណា​ក៏ដោយ​លោក គីម សេង បាន​ឲ្យ​ដឹង​ថា​ថ្មីៗ​នេះ​ក្រសួង​មហាផ្ទៃ​ក៏​បាន​បំពាក់​នូវ​ឧបករណ៍​ទំនើប​ជាង ៥០០ ​គ្រឿង​សម្រាប់​ដំណើរការ​ផ្តល់​អត្តសញ្ញាណប័ណ្ណ​ថ្មី​នេះ​ទូទាំង​រាជធានី​ខេត្ត​ហើយ​ព្រម​ទាំង​បាន​ផ្លាស់ប្តូរ​ក្រុមហ៊ុន​ផ្គត់ផ្គង់​ដើម្បី​ធានា​គុណភាព​នៃ​អត្តសញ្ញាណប័ណ្ណ​ថ្មី​នោះ​ដោយ​លោក​បាន​ស្នើ​ដល់​ពលរដ្ឋ​ដែល​ជួប​ប្រទះ​បញ្ហា​ត្រូវ​ទាក់ទង​មក​កាន់​អាជ្ញាធរ​ដើម្បី​ដោះស្រាយ​ផង​ដែរ។

កន្លង​ទៅ​ក្រសួង​មហាផ្ទៃ​បាន​អំពាវនាវ​ឲ្យ​ប្រជាពលរដ្ឋ​ដែល​កាន់​អត្តសញ្ញាណប័ណ្ណ​ហួស​សុពលភាព​មុន​ឆ្នាំ​ ២០១៨ និង​​អ្នក​មាន​អាយុ​ ១៥ ​ឆ្នាំ​ឡើង​ត្រូវ​រួសរាន់​ទៅ​ធ្វើ​អត្តសញ្ញាណប័ណ្ណ​គំរូ​ថ្មី​សម្រាប់​ប្រើប្រាស់​ជា​ប្រយោជន៍​ផ្ទាល់​ខ្លួន ​និង​ការ​បោះឆ្នោត​ថ្នាក់​ជាតិ​ឆ្នាំ ២០១៨ ដែល​ការ​ធ្វើ​អត្តសញ្ញាណប័ណ្ណ​ខ្មែរ​មួយ​សន្លឹក​តម្លៃ​​ ១ ​ម៉ឺន​រៀល។

ទោះ​ជា​យ៉ាង​នេះ​ក្តី​កន្លង​មក​ ​ប្រជាពលរដ្ឋ​មួយ​ចំនួន​ក៏​បាន​ត្អូញត្អែរ​ផង​ដែរ​ពី​ការ​យឺតយ៉ាវ​របស់​អាជ្ញាធរ​មូលដ្ឋាន​ដែល​មិន​គោរព​តាម​គោលការណ៍​របស់​ក្រសួង​មហាផ្ទៃ​ហើយ​បង្ក​នូវ​ផលវិបាក​ជាច្រើន​ដល់​ពួកគេ​ក្នុង​ការ​ប្រើប្រាស់​អត្តសញ្ញាណប័ណ្ណ​ទាក់ទង​នឹង​កិច្ចការ​ផ្សេងៗ៕

អត្ថបទគួរចាប់អារម្មណ៍