.jpg)
អាជ្ញាធរខេត្តព្រះសីហនុសង្គ្រោះទូករកកលលិចដោយការបោកបក់ពីរលក ថ្ងៃទី ២៩ មិថុនា។រូប FB
ភ្នំពេញៈ រយៈពេល ១០ ខែនៃឆ្នាំនេះ គ្រោះថ្នាក់ចរាចរណ៍ផ្លូវទឹកកើតឡើងចំនួន ២១ លើក បណ្តាលឱ្យមនុស្សស្លាប់ចំនួន ១២ នាក់ និងរបួសចំនួន ៨ នាក់ ដែលតួលេខនេះ បើប្រៀបធៀបទៅនឹងឆ្នាំមុន គ្រោះថ្នាក់កើនឡើងចំនួន ៣ លើក។ នេះបើយោងតាមរបាយការណ៍របស់អគ្គស្នងការដ្ឋាននគរបាលជាតិ។
លោក ហេង ចាន់ធារី ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃអគ្គស្នងការដ្ឋាននគរបាលជាតិប្រាប់ ភ្នំពេញ ប៉ុស្ដិ៍ ពីម្សិលមិញថា គ្រោះថ្នាក់ចរាចរណ៍ផ្លូវទឹកដែលបានកើតឡើងនេះ គឺបង្កឡើងដោយអ្នកបើកបរក្នុងល្បឿនលឿន គ្មានភ្លើងបំភ្លឺពេលយប់ កត្តាសុខភាព និងកត្តាអាកាសធាតុជាដើម។
លោកបានបញ្ជាក់ថា៖ «គិតពីខែវិចិ្ឆកា ឆ្នាំ ២០១៩ ដល់ខែកញ្ញា ឆ្នាំ ២០២០ មានគ្រោះថ្នាក់ចរាចរណ៍ផ្លូវទឹកកើតឡើងចំនួន ២១ លើក បណ្តាលឱ្យមនុស្សស្លាប់ចំនួន ១២ នាក់ (ស្រី ១ នាក់) របួសស្រាលចំនួន ៧ នាក់ (ស្រី ៣ នាក់) និងរបួសធ្ងន់ចំនួន ១ នាក់ (ប្រុស)។ ប្រៀបធៀបឆ្នាំ ២០១៩ គ្រោះថ្នាក់កើនឡើងចំនួន ៣ លើក»។
បើតាមលោក ចាន់ធារី ដើម្បីចូលរួមទប់ស្កាត់កាត់បន្ថយគ្រោះថ្នាក់ចរាចរណ៍ផ្លូវទឹក អគ្គស្នងការដ្ឋាននគរបាលជាតិក៏កំពុងបើកវគ្គបំប៉នជំនាញនគរបាលចរាចរណ៍ផ្លូវទឹកដល់សមត្ថកិច្ចជំនាញពាក់ព័ន្ធមកពីរាជធានីខេត្ដចំនួន ១៧ ដែលមានភូមិសាស្ដ្រជាប់ផ្លូវទឹកផងដែរ។ វគ្គបំប៉នជំនាញនេះមានរយៈពេល ៥ ថ្ងៃ គឺចាប់ពីថ្ងៃទី ២ ដល់ថ្ងៃទី ៦ ខែវិច្ឆិកា ឆ្នាំនេះ។
លោកបន្តថា តាមរយៈវគ្គបណ្ដុះបណ្ដាលនេះ សិក្ខាកាមដែលទទួលបានការបណ្ដុះបណ្ដាលសរុបចំនួន ៥០ នាក់មកពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈព្រមទាំងអង្គភាពការិយាល័យនគរបាលចរាចរណ៍ផ្លូវទឹកទាំង ១៧ រាជធានី-ខេត្តដែលមានភូមិសាស្ដ្រជាប់ផ្លូវទឹក។
លោក ហ៊ឹម យ៉ាន អគ្គស្នងការរងនគរបាលជាតិបានលើកឡើងក្នុងពេលធ្វើជាអធិបតីបើកវគ្គបណ្ដុះបណ្ដាលជំនាញដល់ចរាចរណ៍ផ្លូវទឹកកាលពីថ្ងៃទី ២ ខែវិច្ឆិកានេះនៅអគ្គស្នងការដ្ឋាននគរបាលជាតិថា៖ «នគរបាលចរាចរណ៍ផ្លូវទឹកត្រូវតែមានជំនាញបច្ចេកទេស និងចំណេះដឹងផ្នែកច្បាប់»។
លោកបានបន្តថា តាមរយៈវគ្គបណ្ដុះបណ្ដាលនេះសិក្ខាកាមនឹងទទួលបានចំណេះដឹងស្របទៅតាមប្រធានបទសំខាន់ៗចំនួន ៨ គឺ ១ សុវត្ថិភាពនាវាចរណ៍ គ្រោះថ្នាក់នាវាចរណ៍។ ២ វិធានអន្តរជាតិស្តីពីការបង្ការប៉ះទង្គិចនៅសមុទ្រ។ ៣ ការប្រើទង់សញ្ញាអន្តរជាតិ ឬទង់ជាតិ។ ៤ ការធ្វើនាវាចរណ៍។ ៥ ការឆ្លើយតបនឹងគ្រោះអាសន្ននៅលើនាវា។ ៦ បច្ចេកទេសបើកបរនាវា។ ៧ ភូមិសាស្ត្រផ្លូវទឹកក្នុងព្រះរាជាណាចក្រ កម្ពុជា និង ៨ សញ្ញាជំនួយនាវា។
លោក ហ៊ឹម យ៉ាន បានណែនាំដល់សិក្ខាកាមទាំងអស់ក្នុងពេលបើកវគ្គបណ្ដុះបណ្ដាលនេះត្រូវយកចិត្តទុកដាក់ក្នុងការសិក្សា និងត្រូវយកចំណេះដឹងទាំងនេះទៅបណ្តុះបណ្តាលបន្តដល់មន្ត្រីផ្សេងទៀតក្នុងអង្គភាពជំនាញ ដើម្បីជាមូលដ្ឋានចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវទឹក ក្នុងភូមិសាស្ត្ររាជធានី ឬខេត្តរបស់ខ្លួន៕
